Proverbs 5

aymara-1997

1Munat wawaxay, yatiñ kankañaxar ist'am, ch'ikhi kankañaxar sum ist'arakim.

2Ukhamat suma yatiñampi sarnaqañ yatïta, amuyt'ampiw arsurakïta.

3Jan wali warmin arunakapax misk'ir uñtatawa, arsutapasti aceitet sipan suma quñawa.

4Ukampis qhiparux mullat sipan juk'amp k'allk'uwa, purapar arini espadat sipan juk'amp arirakiwa.

5Uka warmimpi sarnaqañax jiwañaruw puriyi; chillqtatanakapax jiwañar chiqak irparaki.

6Uka warmitakix sum sarnaqañax janiw kunäkisa, janirakiw sarnaqäwipan jan sumätapsa amuyaskiti.

7Munat wawaxay, ist'itaya, janiy yatichäwinakaxat saraqamti.

8Jan wali warmit jithiqtam; uta punkuparus jan jak'achasimti,

9aytat kankañam yaqhanakar jan churaskañamataki, jikxatasitamsa qhuru jaqinakar jan katuyaskañamataki.

10Jan uñt'at jaqis ch'ama tukutamamp jan phuqt'asiskañapataki.

11Jan ukasti, qhiparux jachañakiw wakt'ätam, janchimax juk'at juk'at aynacht'xan ukapacha.

12Ukkhakiw jumax säta: “¡Janik yatichäwi arunakar jisk'achkpachänti! ¡Janik chiqachäwi arunakarus apanukkpachänti!

13¿Kunatarak yatichirinakaxar jan ist'kpachätsti, nayar iwxt'irinakarus jan jayskpachätsti?

14¡Niyapuniw nayax taqi jaqinak nayraqatan jan walt'añar purta!” sasa.

15Jumasti warmimamp jakasim, kunjämatix maynix pachpa phuch'upan umapat umt'aski ukhama.

16Munasiñamax warmimatakikïpan; jan yaqha warminakar churamti.

17Jumampina, warmimampin kusisiñapax, jumatakikïpan,

18¡Juman warmimax aski waxt'äwinak katuqpan! ¡Wayna kankañaman kusisitak jupamp jakasim!

19¡Warmimax suma munkañ tarujar uñtatawa! ¡Munart'asiñapamp jumar kusisiyirïpan! ¡Munasiñapamp jumar wiñay kusisiyirïpan!

20Munat wawaxay, ¿kunatarak chachan warmimp sarnaqaskätasti? ¿Kunatakirak jan uñt'at warmiru qhumaskätasti?

21Tatitux jaqin sarnaqäwip uñjaskiwa, sartatanakapsa sum uñch'ukiskaraki.

22Ñanqha lurir jaqirux pachpa ñanqha luratapaw katunti; pachpa jucha luratapaw chinuñar uñtat chinxäsi.

23Jan chiqachayasiñ munatapaw jiwañar irpani; pisi amuyt'asirïtapasti, chhaqhañaruw aparakini.

← Chapter 4 Chapter 6 →