Proverbs 23

aymara-1997

1Mä aytat jilïritix manq'añatak jawsaykätam ukkhaxa, sum amuyt'asim khitis juman nayraqatamanki uka.

2Jumax wali manq'at awtjatäskamsaya, juk'ak manq'asim;

3uka suma manq'anakap jan munaraqamti, jumarux sallqjaskiristamwa.

4Qamiriptañatak jan ch'amachasimti; jan ukxat llakisimti.

5Qamir kankañax mä juk'atakikiwa; pakanakar uñtataw akatjamat chhaqtawayxi, chhiqhanakapas tukuskaspa ukhama.

6Mich'a jaqimp manq'añatak jan qunt'asimti, janirak suma manq'anakapsa munapayamti,

7uka manq'anakax mallq'aman mä t'awrar uñtatäniwa. Uka jaqix manq'añampitaki, umt'añampitakiw jawsätam, ukampis janiw taqi chuyma siskätamti;

8ukatsti kuntix manq'kta uk waq'aqsütawa, suma arunakamasti inamayakïniwa.

9Jan amuyt'an jaqirux janiy jinchu jak'at parlxayamti, jupax yatiñ kankañan arunakamat sawkasïtamwa.

10Nayra pacha uchat qurpanak jan jithiyamti, janirak wajchanakan uraqip katuntasimti;

11jupanakan qhispiyiripax wali ch'amaniwa; jupaw jupanakat arxatasisin jumatak sayt'ani.

12Yatichäwi arunak sum chuymamar katuqam, suma iwxa arunakarjam jaysas sarnaqam.

13Wawanakar chiqachañ wakischi ukaxa, wakisiw jawq'antañaxa, mä qawqha jawq'antax janiw jiwaykaniti;

14wawarutix ukham chiqachäta ukax, jiwañat qhispiyäta.

15Munat wawaxay, jumatix yatiñ kankañ jikxatät ukaxa, chuymaxax wal kusisini;

16jumatix chiqap parläta ukaxa, nayax walipuniw kusisï.

17Jucharar jaqinakat jan munapayasimti, ukat sipana, axsartañ chuymamax Tatitutakïpan;

18tukuy urunakamasti sumäniwa, suyt'äwimas janiw t'unatäkaniti.

19Wawaxay, sum ist'am, yatiqarakim; suma thakhinjampun saram.

20Machir jaqinakampix jan mayachasimti, janirak sinti manq'ir jaqinakampisa.

21Machirinakasa, sinti manq'irinakas aynacht'añaruw puri, jayra jaqinakasti isitsa jalstataw sarnaqapxi.

22Jumar jathasir awkimar ist'am; taykamax ch'ama qaritäxani ukkhax jan jisk'achamti.

23Chiqa kankañampi, yatiñ kankañamp jikxatam, yatichäwimpi, amuyt'a kankañampi, ¡ukanaksti jan chhaqhayasimti!

24Awkix wal kusisi, jach'achasirakiwa, wawapan yatiñ kankañanïtapata, suma jaqïtapata.

25¡Jumasti awkimarusa, taykamarus kusisiyamaya, jach'ar aptayarakim!

26Munat wawaxay, taqi chuymamamp nayar ist'ita, iwxa arunakaxarjam sarnaqarakim.

27Jan uñt'at jan wali sarnaqir warmix, wali manqhi k'ullk'u phuch'ur uñtatawa;

28uka warmix lunthatjamaw katuntañatak suyxati, walja chachanakaruw chhaqhañar puriyi.

29¿Khitisa t'aqhisixa? ¿Khitisa ayquxa? ¿Khitis ch'axwañana, jachañansa sarnaqixa? ¿Khitis jan juchat chhuxriñchjat uñjasixa? ¿Khitis nayras ch'uxñantat sarnaqixa?

30Machañanakan sarnaqir jaqiw ukham t'aqhisiski, yaqha machjasiñ umañanak uñstayir jaqiw t'aqhisiskaraki.

31Machjayasir umañanak jan uñtamti, ¡suma llijkirik jupuqtaskatapsa, suma quñak umt'añjamätapsa!

32Tukuyarux katarir uñtatawa, achjasaw mich'intasi.

33Jan uñjañanak uñjayätam, jan amuyt'amp parlañanak parlayarakïtam.

34Jach'a quta taypinkkasmas ukham amuyasïta, jach'a lawxan jipt'atäkasmas ukham amuyasïta,

35ukatsti sätawa: “Nuwapxituwa, janiw uskituti; jawq'japxituwa, janiw amuyaskti, ikit sartasinsti, umañ thaqhiriw wasitat sarä” sasa.

← Chapter 22 Chapter 24 →