Proverbs 25

aymara-1997

1Aka arunakax Salomonan säwi arunakaparakiwa, ukanakasti Judá uraqi apnaqir Ezequías reyin uywat jaqinakapan qillqatänwa.

2Chuymar imxäsiñax Diosan jach'a kankañapawa, uka imantat yatxatañasti reyinakan jach'a kankañaparakiwa.

3Ukampis janiw amuyt'añjamäkiti, alaxpach amstata, uraq manqhita, reyinakan amtäwinakapatsa.

4Qullqin q'añup apaqam, qullqi yänak luriristi ukat mä chuwa lursuni;

5reyir luqtir jucharar jaqirux apanukum, ukat reyi qunuñapax chiqa kankañxar sayt'ayatäni.

6Reyin nayraqatapan jach'a jach'a jan tukumti, aytat jaqinakan qunuñaparus janirak qunt'asimti:

7“Akkhar qunt'asim” satäñax juk'amp askiwa, aytat jaqinak nayräxan p'inqachat uñjasiñat sipana. Kuntix nayramamp uñjkäta ukxa,

8jan mäki taripañ utar yatiyir jalamti, yaqha jaqiw jutasin may qhanañcharakispa, jumasti p'inqa tukusma.

9Jumar juchañchir jaqitakix arsusim, kuntix yaqhanakax yatiyapktam uksti, jan khitirus arsumti;

10yaqha jaqix jumar ist'asin p'inqachayiristamwa, jan wali jaqit uñt'ayasitamasti jan askichkayäspawa.

11Wakisitapar arsut arunakax, qullqimp k'iñintat quri manzanar uñtatawa.

12Yatiñan jaqin chiqachäwi arunakap katuqasir jaqitakix suma quri sortijampiru, suma quri wallqampir uñtatawa,

13Kunjämtix junt'u urun khunu thayax thayart'ayki, ukar uñtataw yatiyir aski jaqixa, uywiripan chuymapsa juyart'ayiwa.

14Jan kuna churkasa: “Nayax churtwa” sasa jach'achasiri jaqix; mä thayjamaw thayi, jan uman qinayar uñtatarakiwa.

15Llamp'u chuymax q'apisit chuymarux sumaptayiwa; suma arunakasti q'apisiñampi arsut arunakarux quñaptayiwa.

16Misk'i jikxatät ukaxa, jan jilañchjas manq'amti, jilañchjas manq'asma ukasti waq'aqjasïtawa.

17Jilat masiman utaparux jan sapa kuti saramti, jumampi amjayasxasinxa, uñisxakiristamwa.

18Jilat masipat jan walinak parlir jaqix, mä espadat sipansa juk'amp usuchji.

19Llakisiñan ch'uxña lurasir jaqir alkatañaxa, kayu p'akjatas sarnaqañäkaspa ukhamawa, jan ukax, laka k'amanpach manq'añäkaspa ukhamawa.

20Llakit jaqitak jayllirapiñax, iñawtatat janchir vinagremp warxatatäkaspa ukhamawa, jan ukax, wali thayansa isi apsusitäkaspa ukhamawa.

21Uñisirimatix manq'at awtjayaschixa, manq'a churam; umat pharjayaschisti, uma churarakim;

22ukham lurasax, juparux llakthapisiyätawa, Tatitusti jumarux kutiyxätamwa.

23Amsta tuqit thayt'anir thayax jallu purxatayi, jan wali arunakasti q'apisiñ utjayi.

24Uta anqa k'uchun jakasiñax juk'amp askiwa, suma jach'a utan tuqisir warmimp jakañat sipana.

25Umat pharjat jaqitakix thaya uma umt'añax sumawa, ukhamarakiw jayat jutir suma yatiyäwinakax kusist'ayi.

26Aski jaqin ñanqha lurir jaqir jaysatapax, qunchu umani jawirampi q'añuchaskaspa ukhamawa.

27Walja misk'i manq'añax janiw walïkiti, walja jach'añchäwinak katuqañas walïkarakiti.

28Jalta chuymap jan apnaqañ yatir jaqix, jan pirqani, chijitak jan wakichat markar uñtatawa.

← Chapter 24 Chapter 26 →