Proverbs 27

aymara-1997

1Qharürutxa jan jach'a jach'a tukkamti; janiw khitis yatkiti kuntix jutir urunakax apankani ukxa.

2Janiw walïkiti juma pachpa jach'achasiñamaxa, mayninakäpan jumar jach'achirinakaxa.

3Qalanakampi, ch'allampix jathiwa, jan amuyt'asir jaqin q'apisitapasti juk'amp jathiwa.

4Q'apisiñax chuyma ch'amakt'ayasiñ apani, munapayañax ukat sipan juk'amp jan waliwa.

5Qhana chuymamp maynir chiqachañax juk'amp askiwa, jamasataki munañat sipana.

6Chuyma usuchjasir jilat masir alkatañax juk'amp askiwa uñisirin jamp'atip katuqañat sipana.

7Manq'amp sist'at jaqitakix, misk'is janiw sumäkxiti, manq'at awtjat jaqitakisti, k'allk'u manq'as muxsakiwa.

8Yurïwipat jayan sarnaqir jaqix, tapapat jayan sarnaqir jamach'ir uñtatawa.

9Q'apkir qullanakax chuymaruw kusisiyi; jilat masinakan iwxa arupax, jakäwiruw kusisiyi.

10Janipun jilat masinakamarux apanukumti, janirak awkiman jilat masinakaparusa apanukumti. Janipuniw jilaman utaparux jan walt'añanakamat parlir sarätati. Uta jak'ankir jaqi masiw juk'amp askixa jayankir jilatat sipana.

11Munat wawaxay, yatiñanïmaya, nayarux kusisiyitätawa; ukhamat nayar jisk'achir jaqinakatak arsusï.

12Ch'ikhi jaqix jan walt'añ uñjasinxa jaltxiwa; jan amuyt'asir jaqisti saraskakiwa, ukat t'aqhisiñan uñjasi.

13Jan uñt'at jaqin manup phuqhañatak sayt'ir jaqirux, isipa apaqam, phuqhañapkam uka isip katxäsim.

14Jilat masir willjtat jach'at aruntañax, jupatakix tuqinuqatäkaspas ukamp sasiwa.

15Ch'axwañak munir warmixa, jallu pachan jan sayt'as ch'aqir umar uñtatawa.

16Ukham warmir jark'añ munañasti thayar jark'añ munksna ukamp sasiwa, jan ukax, amparar aceite katxäsiñ munksna ukhamawa.

17Hierrox yaqha hierromp liq'jas ariptayatawa, aski jaqïñatakisti, jilat masimp amuyt'ayatäñawa.

18Higo yapu sum uñjir jaqix, achupat manq'asini; uywiripar sum uñjir jaqisti, jach'añchäwinak katuqani.

19Kamisatix umar uñxatasin ajanup uñjaskixa, ukhamarakiw jaqix chuymap uñantasi.

20Jiwampi, amay imäwimpi, jaqin yänakap munapayañ chuymampix janipuniw kunapachas sisthapipkiti.

21Qurirusa, qullqirus ninaw yant'i; jaqirusti jach'añchäwinakaw yant'araki.

22Jan amuyt'asir jaqirux walja kutis nuwjaskam, janipuniw jan amuyt'asir chuymap apaqkasmati.

23Uywanakam sum uñjasim, ovej tamanakamat llakisipunim,

24qamir kankañasa, reyïñasa janiw wiñayäkiti.

25Kunapachatix quranakax ch'uxñatatkani, alinakax qullut apthapiskani ukapachasti,

26ovejanakamat t'awra yawisïta, isi lurasiñamataki, cabritonakamatsti qullq katuqarakïta, uraqinak alasiñamataki,

27cabranakamax manq'añamatakiw jilarkir leche churätam, utamankirinakar manq'ayañataki, uywatanakamas taqpachan manq'asipxañapataki.

← Chapter 26 Chapter 28 →