Proverbs 31

aymara-1997

1Masá chiqankir Lemuel reyin säwi arunakapa; uka arunakampiw taykapax jupar yatichawayäna:

2Purakaxat yurir munat wawaxay, mayisitaxar Diosan churat wawaxay, ¿kamsarakïmasti?

3Ch'amamxa warminakar jan tukjasimti; warminakampi sarnaqañaw reyinakar aynacht'ayi.

4Lemuel, janiw walïkiti reyinakan vino umañapaxa janirakiw walïkiti jilïr irpirinakan machjasiñ umañanakampi machañtasiñapaxa,

5machantasisinsti, kamachi arunak armasipxaspa, jan kunan jaqinakar chiqapar uñjañat armasipxaspa.

6Machañanakxa, aynacht'atanakataki, llakitanakatak apanukum;

7machantasipxpan, aynacht'at kankañapat armasipxpan, t'aqhisiñanakapatsa jan amtasipxpati.

8Jan arsusirjamäpki uka jaqinakat jach'at arsum; ¡jan arxatasirjamäpki uka jaqinakat arxatasim!

9Arxatam, jupanakar chiqapar uñjam; ¡pist'añan sarnaqir jaqinakampiru, llamp'u chuyman jaqinakampir arxatam!

10Yatiqaskay suma warmix janiw jikxatañjamäkiti; ¡jupax suma k'ajkir qalanakat sipan juk'amp jilawa!

11Chachapax taqpach chuymampiw jupar alkati; janipuniw kunapachas pist'añanakan sarnaqkiti.

12Jupasti chachaparux suma askinak lurasaw sarnaqäwipan yanapi.

13Jupax t'awrampi, linompi thaqhiriw sari, kusisiñampiw amparamp taqi kun luri.

14Aljañanaka apanir barcor uñtatawa; jaya chiqanakat manq'añanak utapar apani.

15Wali willjtat sartasin wawanakapar manq'ayi, uywatanakaparus manq'ayarakiwa.

16Mä uraqi jikxati, ukatsti sum uñjasin alasi, jikxatatapampiw uva alinak ayrusiraki.

17Jupax ch'amañchasiwa, taqi chuymampiw irnaqañatak wakichasi.

18Aljasiñanakap jupax sumaruw sarayi, arumkamaw irnaqi, janiw ch'am jiwt'ayaskiti.

19Pachpa amparapampiw t'awra qapu, ukat sawuraki.

20Jan kuna utjirin jaqinakarusa, pist'ayasiñan jikxatasirinakarus khuyapt'ayapuniwa.

21Janiw khunu thayar axsarkiti utapankirinakax taqpachaniw suma thuru isinak uchasipxi.

22Jupa pachpaw ikiñanak sawst'asi, suma telat lurat isinakampiw isisiraki.

23Chachapasti markan suma uñt'atawa, wali aytat jilïr chachanak taypin qunt'asi.

24Jupax isinaka, wak'anak lurasinxa, alakip luririnakaruw alji.

25Jupax askin sarnaqañampiw ch'amañchasi, jutir urunakatsti janiw axsarayaskiti.

26Jupax yatiñ kankañampipuniw parli, munasiñampiw wawanakapar yaticharaki.

27Jupax utap sum uñjasi, janipuniw ina ch'usat jikxatat manq'a manq'kiti.

28Wawanakapasa, chachapasa juparux jach'añchiwa, sapxarakiwa:

29“Aski lurir warminakax waljaniw utji, ukampis jumax taqi uka warminakat sipan juk'ampïtawa” sasa.

30Suma uñnaqan warmix k'arikiwa, jiwakïñas inamayakiwa, Tatitur axsartir warmiw jach'ar aptkañaxa.

31¡Taqi jaqinak nayraqatan jupar jach'añchapxam! ¡Taqi luratanakapar jach'añchapxarakim!