Proverbs 21

cebuano-2011

1Ang kasingkasing sa hari diha sa kamot sa Ginoo sama sa mga bul-og sa tubig; palikoon niya kini bisan asa nga buot niya.

2Ang matag dalan sa usa ka tawo matarong diha sa iyang kaugalingong mga mata, apan ang Ginoo magtimbang sa kasingkasing.

3Ang pagbuhat sa pagkamatarong ug hustisya labaw nga dawaton sa Ginoo kay sa halad.

4Ang mapahitas-on nga mga mata ug ang kasingkasing nga mapalabilabihon, nga mao ang lampara sa daotan, sala.

5Ang mga laraw sa makugihon nagpadulong ngadto sa kadagaya, apan ang matag usa nga madalidalion mosangpot lamang sa kawalad-on.

6Ang pagbaton ug mga bahandi pinaagi sa usa ka bakakong dila maoy usa ka gabon nga gipalid, ug lit-ag sa kamatayon.

7Ang kabangis sa daotan magbanlod kanila, tungod kay sila nagdumili sa pagbuhat unsay matarong.

8Ang dalan niadtong sad-an hiwi, apan ang gawi sa putli matarong.

9Maayo pa nga magpuyo diha sa suok sa atop sa balay, kay sa sulod sa balay kauban sa usa ka babaye nga palaaway.

10Ang kalag sa daotan nagtinguha sa daotan; ang iyang silingan dili makakaplag ug kaluoy diha sa iyang mga mata.

11Kon ang mayubiton silotan, ang yano mahimong maalamon; kon ang maalamon pahimangnoan, siya makaangkon ug kahibalo.

12Ang matarong maniid sa balay sa daotan; ang daotan itambog ngadto sa pagkalaglag.

13Siya na nagsampong sa iyang mga dalunggan sa pagpakitabang sa kabos, magpakitabang usab apan dili pamation.

14Ang usa ka gasa sa tago maghupay sa kasuko; ug ang suborno diha sa sabakan, sa hilabihan nga kasuko.

15Sa diha nga mabuhat ang hustisya, kalipay kini sa matarong, apan kapukanan sa tigbuhat ug daotan.

16Ang tawo nga naglatagaw gikan sa dalan sa pagpanabot mopahulay diha sa katilingban sa mga patay.

17Siya nga mahigugma sa kalingawan mahimong kabos nga tawo; siya nga mahigugma sa bino ug lana dili maadunahan.

18Ang daotan maoy usa ka lukat alang sa matarong, ug ang maluibon alang sa ligdong.

19Maayo pa nga magpuyo sa usa ka dapit nga mingaw, kay sa pagpakig-uban sa usa ka palaaway ug masuk-anon nga babaye.

20Bililhon nga bahandi ug lana anaa sa puluy-anan sa tawong maalamon, apan ang usa ka tawong buangbuang maglamoy niini.

21Siya nga magsunod sa pagkamatarong ug sa pagkamaluluy-on makakaplag sa kinabuhi ug kadungganan.

22Ang usa ka maalamon nga tawo misulong sa usa ka siyudad sa manggugubat ug gipukan ang lig-ong salipdanan nga ilang gisaligan.

23Siya nga magbantay sa iyang baba ug sa iyang dila mahikay sa iyang kaugaligon gikan sa kasamok.

24“Mayubiton” ang ngalan sa garboso, mapahitas-on nga tawo, nga magbuhat uban sa mapahitas-ong garbo.

25Ang tinguha sa tapolan magpatay kaniya, kay ang iyang mga kamot nagdumili sa pagbuhat.

26Sa tibuok adlaw ang daotan mangibog, apan ang matarong maghatag ug dili mahinugon.

27Ang halad sa daotan usa ka dulumtanan; unsa pa kaha kon dad-on niya kini uban sa tuyo nga daotan.

28Ang usa ka bakakon nga saksi malaglag, apan ang pulong sa tawo nga namati molungtad sa dayon.

29Ang usa ka tawong daotan isog ug nawong, apan ang matarong nga tawo magpatunhay sa iyang mga pamaagi.

30Walay kaalam, walay salabotan, walay tambag nga magpulos batok sa Ginoo.

31Ang kabayo giandam alang sa adlaw sa gubat, apan ang pagdaog iya sa Ginoo.

← Chapter 20 Chapter 22 →