2 Kings 7

Baoule (NYANMIƐN NDƐ'N 1998)

1Elize tɛli i su kɛ: «Amun `sie bé su be tie. Anannganman wan yoo: ‹Ainman'n, Samari gua bo lɔ'n, dɔ kunngba ng'ɔ o yɛ'n su'n, be ´nyan ble sanmlɛn mlɛnnɛnnɛn kpa'n i kilo blu-nin-nnyɔn jɛtɛ ufue mma kun, yɛ be ´nyan ɔrz'n i kilo ablaɔn-nin-nnan kusu jɛtɛ ufue mma kun.› »

2Famiɛn'n i sonja'm bé su kpɛn ng'ɔ mantan famiɛn'n kpa'n, b'ɔ famiɛn'n kisɛ i sa su'n, tɛli Nyanmiɛn i sran'n su kɛ: «?Kannzɛ Anannganman kpɛ toklo nyanmiɛn su lɔ bɔbɔ'n, i sɔ like'n kwla yo?» Yɛ Elize seli i kɛ: «Ɔ nyinma'n ´wun i, sanngɛ ɔ́ nuan su kɛn-mɛn i.»

3Kokowefuɛ nnan be o klɔ'n i anuan'n sin. Be seli bé wun kɛ: «?E ´ka wa sa lele wie'n ´kun ye?

4Sɛ e waan e ´wlu klɔ'n nun lɔ'n, awe'n ´kun ye. Sɛ kusu e waan man e tran wa'n, e ´wu. I ti, man e wɔ Sirifuɛ'm be nanmue'n nun lɔ. Man e ko fa e wun e man be. Sɛ b'a kun-man ye-ɔ, e ´nyan nguan, sɛ kusu be kun ye-ɔ, wuun yɛ ɔ ti i-ɔ.»

5Nnɔsua nun kɛ sɛnzɛ'n wa tɔ'n, be fali Sirifuɛ'm be nanmue'n i atin'n. Be ɔli lele ko juli nanmue'n i nuan, sanngɛ b'a wun-man sran fi.

6Kannzu Anannganman man nganniɛn wie tɛli Sirifuɛ'm be nanmue'n nun lɔ. Nganniɛn sɔ'n ti kɛ alɛ kunfuɛ kpanngban kpa wie be kakaklolo mun, ɔ nin be nnɛn kpanngɔ'm be nganniɛn sa. Yɛ Sirifuɛ'm be seli kɛ: «Kɛlɛ, Izraɛl famiɛn'n ɔ'a ko yia Ɛtfuɛ mun nin Eziptfuɛ'm be famiɛn mun kɛ be nin ye wa kun!»

7Kɛ ɔ yoli sɔ'n, kpɛkuun nnɔsua nun be jasoli nan b'a wanndi. Kɛ be ´kɔ'n, be nguan'n i sasalɛ ti be yacili bé tannin sua, nin be nnɛn kpanngɔ mun, nin be aflunmun mun, ɔ nin be nanmue'n lɛ cɛ yɛ be ɔli-ɔ.

8Kɛ kokowefuɛ'm be juli nanmue'n nun lɛ'n, be wluli tannin sua kun nun. Be dili like nga be wunnin i lɛ'n, yɛ be nɔnnin like nga be wunnin i lɛ'n kusu. Be fali jɛtɛ ufue, nin sika ɔkwlɛ, ɔ nin tralɛ nga be o sua'n nun'n ko fiali. I sin'n, be wa wluli sua kun ekun nun, be fɛli i nun ninnge mun ekun. Yɛ be fa be ko fiali-ɔ.

9Yɛ be seli bé wun kɛ: «Nán sa kpa yɛ e su yo i yɛ'n! Y'a fite like kpa kun su ndɛkɛn, yɛ y'a muan é nuan yɛ. Sɛ e minndɛ kɛ aliɛ'n cɛn kwlaa nan y'a kan'n, wuun y'a fɔn, ɔ su yo-man é wun kpa. Nyanmiɛn ´bu e fɔ. I sɔ'n ti, man e ko bo su e kle famiɛn'n i awlofuɛ mun.»

10Yɛ be ɔli-ɔ. Kɛ be juli lɔ'n, be flɛli anuan nun gladi difuɛ mun, nan b'a bo jasin'n b'a kle be. Be waan: «E ɔli Sirifuɛ'm be nanmue'n nun lɔ. Sran fi nun-man lɔ, y'a ti-man sran fi ngan. Like nga be o lɔ'n, yɛlɛ nnɛn kpanngɔ mun, ɔ nin aflunmun mun, be minnda-minnda lɛ. Yɛ tannin sua'm be o lɛ bɔ cɛ.»

11Gladi difuɛ'm be flɛli sran kun kɛ ɔ ko bo jasin'n famiɛn'n i awlo lɔ.

12Famiɛn'n jasoli kɔnguɛ, nan ɔ'a se i mantanfuɛ'm be kɛ: «?Kɛlɛ, amun wun sa nga Sirifuɛ'm be yo'n i wlɛ? Kɛ bɔ be si kɛ awe'n su kun ye'n, b'a fin be nanmue'n nun b'a fite, b'a ko fia bo'n nun. Be waan sɛ e fin klɔ'n nun fite'n, be ´tra ye, kpɛkuun be ´fa klɔ'n.»

13I mantanfuɛ'm be nun kun seli i kɛ: «Man e sunman sran, man be fu nnɛn kpanngɔ nga be o klɔ'n nun'n bɔ bé nyin tɛ o su'n be su nan be ko nian sa ng'ɔ o lɔ'n. Izraɛlfuɛ nga bé nyin tɛ o su'n, bɔ be flɛ kɛ b'a wie wu'n, be dunman nun yɛ be wa kɔ lɛ-ɔ.»

14Famiɛn'n man be fali kakaklolo nnyɔn nin nnɛn kpanngɔ nga be fa minnda be su'n. Nan famiɛn'n ɔ'a sunman sran kɛ be ko nian-nian atin nga Sirifuɛ'm be fali su'n. Ɔ seli be kɛ: «Amun `wɔ be ko nian.»

15Be ɔli, be ko kunndɛli be lele be juli Zurdɛn'n i nuan. Kɛ be ´kɔ'n, be wunnin kɛ tralɛ mun, ɔ nin ninnge wie mun be tru atin'n nun kɔ. Kɛ Sirifuɛ'm be ´wanndi kɔ'n, bé wun b'ɔ usu-usu be'n ti, yɛ ninnge sɔ'm be guali atin'n nun-ɔn. Be nga be sunmannin be'n be sali bé sin, be wa kannin sa nga be wunnin i'n kleli famiɛn'n.

16Yɛ Samarifuɛ'm be ɔli nan b'a ko fɛn Sirifuɛ'm be nanmue'n nun ninnge mun. Ɔ man kɛ ɔ yoli sɔ'n, be nyan ble sanmlɛn mlɛnnɛnnɛn kpa'n i kilo blu-nin-nnyɔn jɛtɛ ufue mma kun, yɛ be nyan ɔrz'n i kilo ablaɔn-nin-nnan jɛtɛ ufue mma kun kɛ Anannganman kannin'n sa.

17Sonja'm bé su kpɛn ng'ɔ mantan famiɛn'n kpa'n, bɔ famiɛn'n kisɛ i sa'n su'n, ɔ fɛli i kɛ ɔ nian anuan'n su, kpɛkuun kɛ sran'm be ´kpli be kɔ like tolɛ'n, be tiatiali i su, nan ɔ'a wu kɛ Nyanmiɛn i sran'n kannin i nun bɔ famiɛn'n bali i wun lɛ'n sa.

18Kɛ famiɛn'n bali sɔ'n, Nyanmiɛn i sran'n seli i kɛ: «Ainman'n, Samari gua bo lɔ'n, dɔ kunngba ng'ɔ o yɛ'n su'n, be ´yo ɔrz kilo ablaɔn-nin-nnan jɛtɛ ufue mma kun, yɛ be ´yo ble sanmlɛn mlɛnnɛnnɛn kpa'n kilo blu-nin-nnyɔn atɛ jɛtɛ ufue mma kun.»

19Yɛ sonja'n tɛli Nyanmiɛn sran'n su kɛ: «?Kannzɛ Anannganman kpɛ toklo nyanmiɛn'n su lɔ bɔbɔ'n, i sɔ like'n kwla yo?» Elize kusu tɛli i su kɛ: «Ɔ nyinma'n ɔ ´wun i, sanngɛ ɔ́ nuan su kɛn-mɛn i.»

20Ndɛ'n bɔ be kannin'n, ɔ kpɛnnin su sɛsɛsɛ, nzrafuɛ'm be tiatiali i su anuan'n nun lɔ, nan ɔ'a wu.

← Chapter 6 Chapter 8 →