2 Kings 24

Baoule (NYANMIƐN NDƐ'N 1998)

1Zozakim blɛ su'n, Nɛbikadnɛzar b'ɔ ti Babilɔni famiɛn'n nin i sonja'm be fali Zida mɛn'n, nan Zozakim ɔ'a su i afuɛ nsan. I sin'n Zozakim jasoli famiɛn'n i wun.

2Yɛ Anannganman man Babilɔni sonja akpasua wie mun, nin Siri sonja akpasua wie mun, ɔ nin Amɔn sonja akpasua wie'm be fali alɛ wlali Zozakim nin Zidafuɛ'm be sin. Be sacili Zida mɛn'n kɛ Anannganman fa wlɛli i sufuɛ bɔ be ti i nuan ijɔfuɛ'm be nuan bɔ be kannin'n sa.

3Like ti bɔ Nyanmiɛn yoli man sa sɔ'n juli Zida mɛn'n su'n yɛlɛ kɛ i waan ɔ ´fuan Zidafuɛ mun, afin famiɛn Manase yoli sa tɛ sunman.

4Sran nga b'a yo-man like fi, b'ɔ Manase kunnin be'n, sɛ e ´kwla se'n, be mmoja'n yili Zerizalɛm'n klɔ'n. I sɔ'n ti, Anannganman waan ɔ yaci cɛ-man be.

5Zozakim i wun ndɛ'n i onga'n, ɔ nin like ng'ɔ yoli'n, i kwlakwla ti klɛwa Izraɛl famiɛn'm bé wun ndɛ fluwa'n nun.

6Zozakim wuli, nan i wa Zozakin ɔ'a sin i osu.

7Ezipt famiɛn'n ɔ'a fin-mɛn i mɛn'n nun lɔ ɔ'a fite-man ɔ'a ɔ-man lika fi kun, afin i lika'n nga be o Ezipt nzue ba'n nin nzue ba nga be flɛ i Efrat'n be afiɛn'n nun'n, Babilɔni famiɛn'n fɛli i ngba.

8Kɛ Zozakin ´yo famiɛn'n, wuun ɔ lɛ afuɛ blu-nin-mɔcuɛ. Ɔ dili anglo nsan Zerizalɛm lɛ. I nin suan Nɛista. Ɛlnatan ng'ɔ fin Zerizalɛm'n i wa-a.

9Ɔ yoli like ng'ɔ yo-man Anannganman fɛ'n. Like kunngba nga i nannan'm be yoli, i kunngba'n yɛ ɔ yoli-ɔ.

10I blɛ sɔ nun'n, Nɛbikadnɛzar b'ɔ ti Babilɔni famiɛn'n, i sonja'm be bali kɛ be wa fa alɛ wla Zerizalɛmfuɛ'm bé sin. Be wa takali be nanmue'n Zerizalɛm klɔ'n i sin.

11Kɛ sonja'm be o klɔ'n i sin lɛ sɔ'n, Nɛbikadnɛzar bɔbɔ bali lɛ wie.

12Zozakin fin klɔ'n nun fiteli, ɔ nin i nin, nin i sufuɛ mun, nin i sonja'm bé su kpɛn mun, ɔ nin i awlo lɔ sran dandan mun. Be wa fali bé wun mannin Babilɔni famiɛn'n. Yɛ ɔ trali be yoli i kanga-a. Kɛ ɔ ´yo sɔ'n, wuun Nɛbikadnɛzar yoli famiɛn ɔ'a di i afuɛ mɔcuɛ.

13Nɛbikadnɛzar fali Anannganman i sua'n nin famiɛn sua'm be nun ninnge kpakpa mun, kɛ Anannganman fa kannin'n sa. Ɔ sacili sika ɔkwlɛ ninnge nga Salomɔn yoli bɔ be fa be sieli Anannganman i sua'n nun kɛ be fa su Anannganman'n.

14Ɔ trali Zerizalɛm sran'm be kwlaa nin famiɛn'n i awlo lɔ sran dandan mun, nin sran kaklaakla mun bɔ be nuan'n ɔ ju akpi blu (10.000), be lomuɛn. Yɛ ajuin difuɛ mun, ɔ nin blalɛ bofuɛ bɔ be yo anuan'm be nun lakle mun'n, ɔ fali be kwlaa ɔli. Sran nga be ti-man nanndoliɛ'n be yɛ be kali lɛ-ɔ.

15Famiɛn Zozakin, nin i nin, nin i yi mun, nin sran ng'ɔ lafi bé su'n, ɔ nin Zida kpɛnngbɛn mun, Nɛbikadnɛzar fali be Zerizalɛm ɔli Babilɔni.

16Sran ng'ɔ fali be ɔli'n, sran kaklaakla bɔ bé nyin ti tiwa'n be o be nun. Be ti akpi nso (7.000). Yɛ blalɛ bofuɛ mun, nin be nga be yo anuan'm be nun lakle'n be o be nun wie. Be ti akpi kun. Be fa sran sɔ'm be kwlakwla sonja-a, ɔ yo ye.

17I sin'n Babilɔni famiɛn'n fali Matania b'ɔ ti Zozakin i si niaan bian'n, sieli Zozakin osu, kpɛkuun ɔ kacili i dunman kɛ Sedesias.

18Kɛ Sedesias ´yo famiɛn'n, wuun ɔ lɛ afuɛ ablaɔn-nin-kun. Ɔ dili afuɛ blu-nin-kun Zerizalɛm lɛ. I nin suan Amital. Zeremi ng'ɔ fin Libna'n i wa-a.

19Ɔ yoli like ng'ɔ yo-man Anannganman fɛ'n. Like kunngba nga Zozakim yoli'n, i kunngba'n yɛ ɔ yoli-ɔ.

20Sa ti bɔ sa kekle'm be tɔli Zerizalɛmfuɛ mun nin Zidafuɛ'm be su'n yɛlɛ kɛ Anannganman fali ya dan kpa. Ɔ man ɔ fuannin be, ɔ klo-man kɛ ɔ wun be kun. Sedesias jasoli Babilɔni famiɛn'n wun.

← Chapter 23 Chapter 25 →