2 Chronicles 31

Baoule (NYANMIƐN NDƐ'N 1998)

1Kɛ cɛn dilɛ'n wieli'n, Izraɛlfuɛ nga be o lɛ'n be ɔli Zida klɔ'm be su. Be ko sacili yɛbuɛ nga be takali be'n. Be bubuli waka nga be kplannin be bɔ be sɔ be'n mun. Be sacili be nga be si-man Nyanmiɛn'n be sraka yiwlɛ lika nga be o kpɔlɛ'm be su'n mun nin amuɛn sɔwlɛ mun. Be yoli i sɔ Zida nin Bɛnzamɛn akpasua'n, nin Efraim nin Manase be akpasua'm be su. I sin be sali bé sin be ɔli be klɔ'm be su sɛsɛsɛ.

2Ezekias sieli Nyanmiɛn nyrun jranfuɛ mun nin Levifuɛ'm be akpasua-akpasua ekun. Sran kun i junman ng'ɔ di i akpasua'n su'n, ɔ kleli i. Anannganman i sua'n nun'n, Nyanmiɛn nyrun jranfuɛ mun nin Levifuɛ'm be junman'n yɛlɛ tɛ nga be yra be nnɛn'n kɔlikɔli'n nin bo kun yolɛ'n i su tɛ'm be yilɛ. Wie'm be kusu'n Anannganman sulɛ'n wafa'n nin jue nga be to be mɛnmɛn i'n, be yɛ be nian su-ɔ.

3Famiɛn'n fɛli i bo sika'n i bue toli nnɛn nga be fa yi tɛ bɔ be yra be nnɛn'n kɔlikɔli'n. Be yi tɛ sɔ mun nglɛmun nin nnɔsua. Ɔ fali wie ekun toli nnɛn nga be fa yi tɛ wunmiɛn-delɛ-cɛn'n nun'n nin anglo le kun'n, ɔ nin cɛn dilɛ kun nga'm be nun'n. Anannganman i mmla'n yɛ ɔ kan kɛ be `yi tɛ sɔ mun-ɔn.

4Famiɛn'n seli Zerizalɛmfuɛ'm be kwlaa kɛ be fa like ng'ɔ ti Nyanmiɛn nyrun jranfuɛ mun nin Levifuɛ'm be liɛ'n man be, kɛ ɔ ´yo nan b'a fa bé wun b'a man junman nga Anannganman i mmla'n kleli'n i ngunmin'n ti.

5Kɛ Izraɛlfuɛ'm be tili ndɛ sɔ'n, be kwlaa be fali be fie'm be su ninnge'm be mma klikli'm be bali kaka kpa: ble nin nzan, nin ngo, nin awɛma nzue, ɔ nin like uflɛ mun. Yɛ be fali be fie kunngba'm be su ninnge nga be nyannin be'n be blusu'n bali ekun.

6I kunngba'n, nannin nin bua, nin boli, ɔ nin ninnge nga sran'm be fa mannin Anannganman be Nyanmiɛn'n, Izraɛlfuɛ mun nin Zidafuɛ mun bɔ be tran Zida klɔ dandan'm be su'n, be kusu be fali ninnge sɔ'm be blusu'n bali. Yɛ be tiantiannin be nuan kwlekwlekwle.

7Kɛ be boli i nuan tiantianlɛ bo anglo nsan su'n, anglo nso su yɛ be wieli i yo-ɔ.

8Kɛ Ezekias nin i awlo lɔ sran dandan'm be wa wunnin ninnge nga be tiantiannin be nuan'n, be lali Anannganman ase. Yɛ be lali Izraɛlfuɛ'm bɔ be ti Anannganman i sran'n be ase wie.

9Famiɛn'n usali Nyanmiɛn nyrun jranfuɛ mun nin Levifuɛ mun ninnge nga be tiantiannin be nuan sɔ'm bé su ndɛ.

10Azaria b'ɔ ti Nyanmiɛn nyrun jranfuɛ'm be su kpɛn'n, b'ɔ fin Zadɔk awlo nun'n tɛli i su kɛ: «Kɛ ɔ fin cɛn bɔ sran'm be sɔ ninnge nga be fa be be fie'm be su'n i fa balɛ'n su'n, e di like-ɔ, e ku yi, yɛ i wie ka lɛ kpa, yɛlɛ kɛ Anannganman yoli i sran'm be ye dan. Like ng'ɔ kali'n, yɛlɛ ng'ɔ tian yɛ'n.»

11Famiɛn Ezekias waan be siesie ninnge'm be guawlɛ mun Anannganman i sua'n wun lɛ. Yɛ be siesieli be-ɔ.

12Kɛ ɔ fɛ i lɛ'n, fie su ninnge nga sran'm be yi fa ba'n nin blusu'n, ɔ nin ninnge nga be fa man Anannganman'n, siɛn'n be fɛ i kwlakwla sɔ'n be guɛ i ninnge guawlɛ sɔ'm be nun tititi. Kɔnania b'ɔ ti Levifuɛ'n yɛ be fa sieli su kɛ ɔ nian su-ɔ. I niaan bian Simɛi mɛntɛn i.

13Famiɛn Ezekias nin Azaria b'ɔ ti Nyanmiɛn nyrun jranfuɛ dan'n be sieli sran wie'm be kɛ be nian su wie. Be ti Kɔnania nin Simɛi bé bo mma mun. Be yɛ: Zɛiɛl, Azazia, Nabal, Azaɛl, Zɛrimɔt, Zozabad, Eliɛl, Zismakia, Masat, ɔ nin Bɛnaza.

14Zimna wa Kɔre b'ɔ ti Levifuɛ'n, b'ɔ nian anuan ng'ɔ o wia afiliɛ lɔ'n su'n, i yɛ ɔ sɔ be klun klo ninnge nga be fa man Anannganman'n be nun-ɔn. Yɛ fie su ninnge nga be yi man Anannganman'n nin Anannganman i ninnge kpa tra su mun'n, i yɛ ɔ cɛcɛ be nun-ɔn.

15Klɔ nga Nyanmiɛn nyrun jranfuɛ'm be o su'n, be nga be uka Kɔre be di junman'n be yɛ: Edɛni, Mɛnzamɛn, Zozie, Sɛmaɛza, Amaria, ɔ nin Sɛkania. Sran sɔ'm be cɛ aliɛ'n be man be niaan kpɛnngbɛn mun nin kanngan mun. Kɛ be junman'n wafa'n fa ti'n, i su yɛ be nian be fa cɛ be aliɛ nin-ɔn.

16Nán yasua nga be klɛli be dunman be kaan nun kɛ be dili afuɛ nsan annzɛ afuɛ nsan tra su'n be ngunmin yɛ be man be aliɛ nin-ɔn. Sanngɛ be kwlaa nga be wlu Anannganman i sua'n nun be di be junman'n kɛ be cɛn'n ju'n, be man be wie.

17Nyanmiɛn nyrun jranfuɛ nga be nian be awlobo'm bé su'n nin Levifuɛ nga b'a nyan afuɛ ablaɔn annzɛ afuɛ ablaɔn tra su bɔ be nian be junman nin be akpasua'n be su'n bɔ be klɛ be dunman'n, be man be wie.

18Sran kun nga'm be nun'n, be nga be klɛ be dunman nin be anunman mun, nin be yi mun, nin be wa yasua mun, ɔ nin be mma bla mun'n, be man be wie, afin be fa bé wun man Nyanmiɛn i sua'n nun junman'n i dilɛ'n tititi.

19Be klekleli sran mun klɔ dandan'm be su. Be yɛ be cɛ Aarɔn osu'n nunfuɛ bɔ be ti Nyanmiɛn nyrun jranfuɛ'n, bɔ be tran bloblo'n be nun yasua'm be aliɛ liɛ nin-ɔn. Be kunngba'n be yɛ be cɛ Levifuɛ nga be klɛli be dunman'n be aliɛ'n kusu-ɔ.

20Sa nga Ezekias yoli be Zida mɛn wunmuan'n nun'n, be yɛ be o lɛ-ɔ. Ɔ yoli sa kpa. Ɔ yoli sa bɔ be ti su, ɔ yoli nanwlɛ difuɛ, Anannganman wunnin i sɔ.

21Ɔ siesieli Nyanmiɛn i sua'n i ye, ɔ suli sran'm be bo kɛ bé fa Nyanmiɛn i mmla fanunfanun'm be su. Kɛ ɔ ´yo sɔ'n, wuun i bɔbɔ ´miɛn i nyin kɛ ɔ ´mɛntɛn i Nyanmiɛn'n. Ɔ tuli i klun yoli ninnge ng'ɔ yoli be nin i anwlɛn'n kwlaa, yɛ Nyanmiɛn man ninnge sɔ'n be yoli kpa.

← Chapter 30 Chapter 32 →