2 Chronicles 30

Baoule (NYANMIƐN NDƐ'N 1998)

1Famiɛn Ezekias nin Izraɛl famiɛn awlo lɔ sran dandan mun, ɔ nin Zerizalɛmfuɛ'm be yiali, be buli akunndan kɛ be ´di Delɛ-cɛn'n anglo i nnyɔn su'n nun, afin b'a kwla di-mɛn i blɛ nga be di i titi'n nun. Yɛlɛ kɛ Nyanmiɛn nyrun jranfuɛ nga be yoli bé wun saun'n b'a yo-man pɛ, yɛ sran'm b'a yia-man Zerizalɛm lɔ. Kɛ bɔ famiɛn'n nin nzrafuɛ'm be nuan sɛli sa sɔ'n su'n ti'n, ɔ man be waan be ´yia Izraɛlfuɛ'm be kwlaa nga be o kɛ ɔ fɛ i mɛn'n i ngua lɔ lele bɔ fa ju nglo lɔ'n, kɛ be bla Zerizalɛm be wa di cɛn'n, afin nga be klɛli i kɛ be nian su be yo'n, sran kaan sa yɛ be niannin su be yoli-ɔ. Famiɛn'n yili sran ɔli Izraɛl mɛn wunmuan'n nin Zida mɛn wunmuan'n nun. I waan be ko yia sran mun nan be wa di cɛn sɔ'n Anannganman b'ɔ ti Izraɛl Nyanmiɛn'n i dunman nun i bɔbɔ Nyanmiɛn'n i sua'n nun lɔ. Ezekias klɛli fluwa kɛ be ko fa man akpasua nga be tran mɛn'n i nglo lɔ'n bɔbɔ.

6Fluwa nga famiɛn'n nin i awlo lɔ sran dandan mun be klɛli'n, be nga be sunmannin be'n be fa ɔli Izraɛl mɛn wunmuan'n nin Zida mɛn wunmuan'n nun. Famiɛn'n mannin be ngaliɛ. I waan be `se kɛ: «Izraɛlfuɛ mun, amun bɔ amun nyannin amún ti Asirifuɛ'm bé sa nun'n, amun `sa amun sin, amun `bla Anannganman b'ɔ ti Abraam, nin Izaak, ɔ nin Zakɔb be Nyanmiɛn'n i sin, yɛ ɔ ´kɔ amún wun ekun.

7Nán amun yo kɛ amún si nin amun niaan nga be kacili be sin be sili Anannganman b'ɔ ti be nannan'm be Nyanmiɛn'n sa. Nyanmiɛn man awlaboɛ'n yili be, amun bɔbɔ amun nyinma ta nun.

8Nán amun yo nyin kekle kɛ amun nannan'm be yoli'n sa. Amun `fa amun wun man Anannganman man ɔ sie amun. Amun `bla i sua'n bɔ i bɔbɔ ɔ'a yo i saun'n nun. Sua sɔ'n, ɔ ´yo saun tititi. Yɛ amun `su Anannganman amun Nyanmiɛn'n, kɛ ɔ ´yo nan i ya dan'n b'ɔ fɛli i amún wun'n ɔ'a jɔ'n ti.

9Sɛ amun sa amún sin ba Anannganman wun'n, be nga be wa trali amún niaan mun nin amun mma mun'n, be ´si be aunnvuɛ, yɛ be ´yaci be nun be ´ba mɛn nga nun wa ekun. Afin sɛ amun sa amún sin ba Anannganman amun Nyanmiɛn'n sin'n, ɔ su kaci-mɛn i sin si-man amun, afin i klun ti kpa, yɛ ɔ si aunnvuɛ.»

10Be nga be sunmannin be'n, be sinsinnin klɔ'm be su, be ɔli Efraim akpasua'n nin Manase akpasua'n su, i sin be juli Zabilɔn asa'n su, sanngɛ sran'm be toli be mma, be yoli be finfin.

11Sanngɛ sran wie'm be o Azɛr, nin Manase, ɔ nin Zabilɔn akpasua'm be su, be wunnin bé sa tɛ bɔ be yoli'n i wlɛ, ɔ man be ɔli Zerizalɛm.

12Zida lɔ kusu'n, Anannganman dili junman sran'm be nun, ɔ man be kwlaa be kplinnin su kɛ be ´yo sa bɔ Nyanmiɛn man famiɛn'n nin i awlo lɔ sran dandan'm be kannin'n i su sa.

13Sran'm be yiali Zerizalɛm lɔ afuɛ'n i anglo nnyɔn'n su. Be ɔli kɛ be ´ko di kpaun nga kpaun ayre nun-man nun'n i cɛn'n. Sran'm be sɔnnin sɔnlɛ kpa.

14Be dun mmua bubuli sraka yiwlɛ nga be o Zerizalɛm klɔ'n nun'n, yɛ be bubuli ansans yrawlɛ mun. Be ko guali be blo Sedrɔn kongo'n nun lɔ.

15Anglo'n i cɛn ba blu-nin-nnan'n su'n, be kunnin nnɛn nga be fa dili Delɛ-cɛn'n. Nyannzuɛn kunnin Nyanmiɛn nyrun jranfuɛ nin Levifuɛ mun, be yoli bé wun saun. Yɛ tɛ nga be yra be nnɛn'n kɔlikɔli'n, be yili wie Anannganman i sua'n nun lɔ.

16Be jranjrannin be jranwlɛ titi'm be nun kɛ Moiz b'ɔ ti Nyanmiɛn sran'n i mmla'n kle'n sa. Yɛ Levifuɛ'm be fa nnɛn nga be fa yi tɛ'n be mmoja man Nyanmiɛn nyrun jranfuɛ mun. Yɛ Nyanmiɛn nyrun jranfuɛ'm be fa gua Nyanmiɛn sɔwlɛ'n su.

17Sran kpanngban kpa b'a yo-man bé wun saun, be o nzrafuɛ'm be nun. Levifuɛ'm be jrannin be nga be ti-man saun be ja nun be kpɛli nnɛn'm be kɔmin, afin sran sɔ'm b'a siesie-man bé wun kɛ be ´di i sɔ junman'n be man Nyanmiɛn.

18Sran'm be kpanngban lika kpa b'a yo-man bé wun saun. I li Efraim, nin Manase, nin Isakar, ɔ nin Zabilɔn akpasua sufuɛ mun yɛ be sɔnnin-ɔn, sanngɛ be dili Delɛ-cɛn'n aliɛ'n wie. I sɔ liɛ nga be yoli'n, ɔ nin ng'ɔ ti klɛwa Nyanmiɛn i fluwa'n nun'n sɛ-man. I sɔ'n ti Ezekias srɛli Nyanmiɛn mannin be.

19Ɔ seli kɛ: «Anannganman, e nannan'm be Nyanmiɛn, wɔ bɔ a ti kpa'n, be nga be miannin bé nyin kɛ be ´fa bé wun mantan wɔ'n, kannzɛ be ti-man saun'n, yaci bé wun sa'n cɛ be.»

20Anannganman tɛli Ezekias srɛlɛ'n su. Ɔ'a tu-man be fɔ nga i waan ɔ ´tu be'n kun.

21Ɔ man Izraɛlfuɛ nga be o Zerizalɛm'n bé wun kpajali be kpa, be fali cɛn ba nso dili kpaun bɔ kpaun ayre nun-man nun'n i cɛn'n. Cɛn kwlakwla, Levifuɛ mun nin Nyanmiɛn nyrun jranfuɛ mun be bo be ngowa kanlɛ ninnge mun kekle kpa be fa manman Anannganman.

22Levifuɛ nga be tuli be klun be dili Anannganman i junman'n, Ezekias yoli be mo. Sran'm be dili cɛn dilɛ aliɛ'n lele cɛn ba nso. Kɛ ɔ ´yo sɔ'n, wuun be ´yi bo kun yolɛ'n i su tɛ mun, wuun be ´to jue be manman Anannganman b'ɔ ti be nannan'm be Nyanmiɛn'n.

23Sran'm be kwlaa bé nuan sɛli su kɛ be ´uka cɛn dilɛ'n su le nso ekun. Cɛn nso kasiɛn sɔ nun'n, kɛ be ´di cɛn'n, bé wun kpajali be.

24Afin famiɛn Ezekias mannin sran'm be nannin tola akpi nin bua akpi nso (7.000). Famiɛn awlo lɔ sran dandan'm be mannin nannin tola akpi yɛ bua akpi blu (10.000). Ng'ɔ o su ekun'n yɛlɛ kɛ Nyanmiɛn nyrun jranfuɛ nga be yoli bé wun saun'n be sɔnnin kpa.

25Zidafuɛ mun, nin Nyanmiɛn nyrun jranfuɛ mun, nin Levifuɛ mun, ɔ nin be nga be fin mɛn'n i nglo lɔ be bali cɛn'n i dilɛ'n, annzɛ bɔ be o Zida lɔ titi'n, be kwlaa be klun jɔli.

26I li be nga be klun'n jɔli dan tratrali su'n, yɛlɛ Zerizalɛmfuɛ mun, afin kɛ ɔ fɛ i David wa Salomɔn b'ɔ ti famiɛn'n i blɛ su lele b'ɔ ´fa ju blɛ ng'ɔ o lɛ nun'n, b'a di-man cɛn kɛ ng'ɔ o lɛ'n sa Zerizalɛm lɛ kun.

27I sin'n, Nyanmiɛn nyrun jranfuɛ mun nin Levifuɛ'm be jasoli, nan b'a yra sran'm be nguan. Be Nyanmiɛn bɔ be srɛli'n ɔli lele juli nglo lɔ, ɔ juli Anannganman bɔbɔ tranwlɛ'n nun lɔ. Yɛ ɔ tɛli be su.

← Chapter 29 Chapter 31 →