1 Kings 6

Baoule (NYANMIƐN NDƐ'N 1998)

1Kɛ Izraɛlfuɛ'm be fin Ezipt lɔ bali'n, i afuɛ ya nnan afuɛ ablaɔcuɛ su yɛ Salomɔn boli Anannganman i sua'n i kplanlɛ bo-ɔ. Afuɛ sɔ'n i anglo nnyɔn su yɛ be boli sua'n i junman'n i bo-ɔ. Be flɛ anglo sɔ'n kɛ Ziv. Kɛ ɔ ´yo sɔ'n, wuun Salomɔn yoli famiɛn ɔ'a di afuɛ nnan.

2Sua nga Salomɔn kplannin mannin Anannganman'n i tɛnndɛn nun'n ti mɛtri ablasan. I tɛtrɛ nun'n ti mɛtri blu, yɛ i nglo-nglo su'n ti mɛtri blu-nin-nnun.

3Sua'n i nyrun ala bo'n i tɛnndɛn nun'n ti mɛtri blu kɛ sua'n i tɛtrɛ nun'n sa, kpɛkuun i tɛtrɛ nun'n ti mɛtri nnun.

4Famiɛn'n yoli sua'n i fenɛtri mun. Ɔ fali griazi wlawlali be nun.

5Be kplannin etazi be fa mantannin sua ba dan'n ɔ nin sua ba nga be o siɛn lɔ'n be talɛ'n.

6Etazi'n i sua ba ng'ɔ o asiɛ wun'n, i tɛtrɛ nun'n ti mɛtri nnyɔn nin sin, ng'ɔ o afiɛn'n, i tɛtrɛ nun'n ti mɛtri nsan, yɛ ng'ɔ o nglo kpa'n, i tɛtrɛ nun'n ti mɛtri nsan nin sin. Nyanmiɛn i sua'n i talɛ'n, kɛ ɔ fɛ i ngua lele b'ɔ ´fa ju nglo lɔ'n, i kpikplikpi'n ɔ sɛ-man. Kɛ ɔ ´nyin kɔ'n, wuun ɔ yo fɛtɛfɛtɛ kɔ. I sɔ'n ti, sua'n i su bolɛ waka'n ɔ wlu-man Nyanmiɛn i sua'n i talɛ'n nun.

7Kɛ be ´kplan sua'n, b'a ti-man kɛ be fali marto, annzɛ kpɛliɛ, annzɛ blalɛ be fa kannin like bɔ kaan sa. Yɛbuɛ'n i sɛlɛ wafa nga be sɛli i fawlɛ lɔ'n, i su yɛ ɔ kali-ɔ.

8Anuan kun wo Nyanmiɛn i sua'n i bue ng'ɔ o ngua lɔ'n su. Lɛ yɛ be sin be wlu sua ba ng'ɔ o asiɛ wun'n i nun-ɔn. Kɛ be fɛ i lɛ'n, be fu asikalie wie'm be su yɛ be kpɛn etazi'n i nnyɔn su'n su lɔ-ɔ, kpɛkuun kɛ be fɛ i lɛ'n, wuun be su fu i nsan su'n su lɔ.

9Kɛ sua'n wieli'n, be fali sɛdri waka yoli i plafɔn'n. Waka sɔ'n, wie'm be ti paplaapla, yɛ wie'm be ti floloflolo.

10Etazi nga be kplan mantannin Nyanmiɛn i sua'n i talɛ'n, ɔ bo sin yia sua'n. Etazi sɔ mun'n, kun i nglo-nglo su'n ti mɛtri nnyɔn nin sin, kun i nglo-nglo su'n ti mɛtri nnyɔn nin sin. Be kuatrɛn bɔ be ti sɛdri waka'n, be lala sua'n i talɛ'n su.

11Anannganman kannin ndɛ kleli Salomɔn, ɔ seli i kɛ:

12«Mín sua'n yɛ a su kplɛn i yɛ. Sɛ a fa min mmla fanunfanun'm bé su kpa'n, i liɛ'n ndɛ nga n kan kleli ɔ́ si David'n, n ´yo i nuan like m ´man wɔ.

13N ´tran Izraɛlfuɛ'm be afiɛn, n su kpɔci-man min nvle sɔ'n le.»

14Kɛ Salomɔn wieli sua'n i kplan'n,

15ɔ fali sɛdri waka fa katali i klun lɔ talɛ'n su. Ɔ yoli talɛ'n i sɔ i ngua lele fa ju i nglo lɔ, kpɛkuun ɔ fali siprɛs waka fa yoli i asiɛ wun'n.

16Kɛ be wlu sua'n nun lɔ'n, sua ba kun o be nyrun ndɛnman su lɛ. Salomɔn fali sɛdri waka yɛ ɔ fa yoli-ɔ. I tɛtrɛ nun'n ti mɛtri blu, ɔ fɛ i sɔ asiɛ wun lele to plafɔn'n. Be yoli sua ba sɔ'n i klun'n klanman. Be fa yoli Nyanmiɛn i lika kpa tra su'n. Lɛ yɛ be fali Nyanmiɛn i alaka'n be sieli-ɔ.

17Ɔ man sua ba'n i tɛnndɛn nun'n kali mɛtri ablaɔn.

18Waka ng'ɔ kata talɛ'n su'n, be yoli su nzɔliɛ mun. Wie ti kɛ sɔkɔ sa, wie kusu ti kɛ waka nyrɛ bɔ ɔ'a kpuke'n sa. Sua'n i klun lɔ'n, be fali sɛdri waka be katali talɛ'm be su, ɔ man yɛbuɛ bɔ kun sa ɔ fite-man.

19Kɛ be wlu sua'n i klun lɔ'n, sua ba ng'ɔ o be nyrun ndɛnman su lɛ'n, Salomɔn siesieli i kɛ ɔ ´fa Anannganman i alaka'n ɔ ´sie nun.

20Sua ba sɔ'n i tɛnndɛn nun'n ti mɛtri blu. I tɛtrɛ nun'n ti mɛtri blu, yɛ i nglo-nglo su'n ti mɛtri blu. Salomɔn kloli sika ɔkwlɛ guɛli i talɛ'n kwlakwla wun. Ɔ yoli Nyanmiɛn sɔwlɛ kun sua ba'n i anuan'n i wun lɛ. Be fali sɛdri waka yɛ be fa yoli-ɔ. Be kloli sika ɔkwlɛ guali Nyanmiɛn sɔwlɛ sɔ'n i wun.

21Ɔ kloli sika ɔkwlɛ guali sua'n i gbaun'n i talɛ'n i wun. Ɔ fali sika ɔkwlɛ jrɔkɔ mun jali Nyanmiɛn i lika kpa tra su'n i nyrun lɛ.

22Ɔ man sua'n i talɛ'n i wun ti sika ɔkwlɛ ngunmin. Nyanmiɛn sɔwlɛ'n b'ɔ o kɛ a ´fa wlu Nyanmiɛn i lika kpa tra su'n nun lɔ'n, i kusu sika ɔkwlɛ o i wun bioun.

23Ɔ fali blo olivie waka yoli anz'm be nzɔliɛ sɔ nnyɔn, ɔ fa be sieli i Nyanmiɛn i lika kpa tra su'n nun. Be nglo-nglo su'n ti mɛtri nnun.

24Kun i ndɛwa'n kun ti mɛtri nnyɔn nin sin. I ndɛwa kun ekun'n ti mɛtri nnyɔn nin sin. Kɛ ɔ fɛ i i ndɛwa kun i ti wa fa ju i ndɛwa kun'n i ti lɔ'n, ɔ ti mɛtri nnun. Anz kun'n kusu, kɛ ɔ ti sɔ-ɔ. Be nnyɔn'm be sɛ. Be wafa'n ɔ ti kunngba.

27Ɔ fali anz mun sieli i sua ba'n i afiɛn. Be tinngɛ-tinngɛ be ndɛwa'n nun, ɔ man kun i ndɛwa kun kan talɛ'n kun, kun ekun'n i ndɛwa kun kan talɛ kun'n, kpɛkuun be ndɛwa nnyɔn nga'm be wɔ su.

28Salomɔn kloli sika ɔkwlɛ guali anz nnyɔn'm bé wun.

29Be yoli anz mun, nin mme sa mun, ɔ nin waka nyrɛ bɔ ɔ'a kpuke'n be nzɔliɛ mun. Be yoli nzɔliɛ sɔ mun Nyanmiɛn i sua'n i talɛ'n i klun nin i sin'n kwlaa su.

30Ɔ kloli sika ɔkwlɛ guali sua ba nnyɔn'm be asiɛ wun'n su.

31Anuan nga be fa nyin Nyanmiɛn i lika kpa tra su'n i anuan'n, be yoli i nda ɔ nin blo olivie. Anuan i kadri'n, be fali waka bue nnun yɛ be fa yoli-ɔ.

32Be fali blo olivie waka yɛ be sɛli anuan nda nnyɔn mun-ɔn. Be yoli anz mun, nin mme sa mun, ɔ nin waka nyrɛ nga ɔ'a kpuke'n be nzɔliɛ anuan nda sɔ'n su. Be kloli sika ɔkwlɛ guali anuan sɔ'n wun ekun. Ɔ man sika ɔkwlɛ'n wo anz nin mme sa'm bé wun wie.

33Be fali siprɛs waka yɛ be fa yoli Nyanmiɛn i sua'n i anuan nin-ɔn. Anuan sɔ'n ɔ ti nda nnyɔn. I kadri'n ti blo olivie waka. Be fali waka bue nnan yɛ be yoli kadri sɔ nin-ɔn.

34Be fali waka paplaapla nnyɔn yɛ be yoli anuan'n i bue kun-ɔn. Kɛ be yoli i bue nnyɔn'n be sɔ-ɔ.

35Be yoli anz mun, nin mme sa mun, ɔ nin waka nyrɛ nga ɔ'a kpuke'n be nzɔliɛ anuan sɔ'n su. Ɔ kloli sika guali i wun. Ɔ man sika ɔkwlɛ'n wo nzɔliɛ'm be su wie.

36I sin ɔ sisili awlo klun'n i wun. Ɔ fali yɛbuɛ nga be sɛli'n i wie yɛ ɔ fa sili talɛ nin-ɔn. Ɔ sili talɛ sɔ nsan mantan su. I nnan su'n ti sɛdri waka.

37Kɛ Salomɔn yoli famiɛn'n, i afuɛ nnan su yɛ be wlali Anannganman i sua'n i bo ase-ɔ. Anglo nga be flɛ i Ziv'n i nun yɛ be yoli-ɔ.

38Yɛ kɛ Salomɔn yoli famiɛn sɔ'n i afuɛ blu-nin-kun su yɛ be wieli i kplan-an. Anglo nga be flɛ i Bil b'ɔ ti anglo'n i mɔcuɛ su'n i nun yɛ be wieli i kplan-an. Be niannin sua'n i jajalɛ nga be jajali'n i kwlaa su yɛ be kplannin-ɔn. Sua'n i kplanlɛ'n dili afuɛ nso.

← Chapter 5 Chapter 7 →