1 Kings 5

Baoule (NYANMIƐN NDƐ'N 1998)

1Famiɛn kanngan nga be o nzue ba bɔ be flɛ i Efrat'n ɔ nin Filistifuɛ'm be mɛn'm, be afiɛn lele ɔ fa to Ezipt mɛn'n, Salomɔn sieli be. Be kwlakwla nga be o lɛ'n be o Salomɔn bo. Be suli lapo be mɛnnin i lele yɛ ɔ fa wuli-ɔ.

2Like nga Salomɔn nin i awlofuɛ'm be di i cɛn kun'n yɛ: sanmlɛn ng'ɔ fie-man kpa'n, ɔ ti tɔnun ngwlan, sanmlɛn ng'ɔ fie kpa'n, ɔ ti tɔnun blu-nin-mɔcuɛ,

3yɛ nannin bɔ be ta be bé sa nun bɔ b'a lo kpa'n i sɔ blu, ɔ nin nannin nga be didi be sin'n ablaɔn, yɛ bua ya, ɔ nin wannzannin mun, yɛ flete mun, ɔ nin anunman nga be ta be bé sa nun mun.

4Salomɔn sieli lika ng'ɔ o Efrat'n i sin lɔ'n, kɛ ɔ fɛ i Tifsak b'ɔ fa ju Gaza'n. Famiɛn nga be o afiɛn sɔ'n nun lɛ'n be o i bo. Sran fi ɔ'a jaso-mɛn i wun.

5Salomɔn blɛ su'n kɛ ɔ fɛ i Dan b'ɔ ´fa ju Beɛr-Seba'n, Izraɛl nvle wunmuan'n nun'n, Zidafuɛ mun nin Izraɛlfuɛ'm be kwlakwla be o be vinyi fie mun, ɔ nin be figie fie'm bé su sɛsɛsɛ, be klun ti-man be.

6Salomɔn lɛ nnɛn kpanngɔ akpi-akpi blu-nin-nnyɔn (12.000), ɔ nin nnɛn kpanngɔ'm bé sua mun bɔ be kwla fa nnɛn kpanngɔ akpi-akpi ablanan (40.000) sie be nun. Nnɛn kpanngɔ sɔ'm be cuɛn i alɛ kakaklolo mun.

7Salomɔn i prefe blu-nin-nnyɔn mun, be yɛ be mɛn i aliɛ ng'ɔ nin i awlofuɛ'm be di nin-ɔn. Prefe kun man like anglo kun, prefe kun man like anglo kun. Kɛ ɔ ko to sran kun'n, i wafa ng'ɔ ko yo nan ninnge'n kwlakwla ti ɔ'a yia'n yɛ ɔ yo-ɔ.

8Prefe'm be fa ɔrz nin ijre be fa ba kan nga be kle be lɛ'n. Ɔrz nin ijre sɔ'n yɛ be fa man nnɛn kpanngɔ mun, ɔ nin nnɛn uflɛ nga be cuɛn kakaklolo mun nin-ɔn.

9Nyanmiɛn mannin Salomɔn ngwlɛlɛ dan, ɔ nin silɛ dan kpa. Like ng'ɔ kannin bé su ndɛ'n be sɔnnin kpa kɛ jenvie nuan aunnyan sa.

10Salomɔn i ngwlɛlɛ liɛ'n ɔ tra wia afiliɛ lɔfuɛ mun, ɔ nin Ezipt lɔfuɛ mun be kwlakwla be liɛ'n.

11Sran fi i ngwlɛlɛ nin i liɛ'n sɛ-man. I ngwlɛlɛ'n ɔ tra Etan b'ɔ ti Ɛzrafuɛ'n i liɛ'n. Ɔ tra Eman, nin Kalkɔl, ɔ nin Darda b'ɔ be ti Masɔl i mma mun be liɛ'n. I ngwlɛlɛ dan'n ti'n, i dunman'n ɔ truli mɛn nga be mantan be lɛ'n be nun.

12Ɔ buli nyanndra akpi nsan (3.000), yɛ ɔ kpɛli jue akpi kun ɔ nin jue nnun.

13Ɔ kannin waka'm bé wun ndɛ. Ɔ kannin waka dandan bɔ be ti kɛ Liban lɔ sɛdri'n sa'n bé wun ndɛ. Ɔ kannin waka kanngan nga be ti kɛ waka nga be fifi talɛ'm be bo sa'n bé wun ndɛ. Ɔ kannin nnɛn mun, nin anunman mun, nin nnɛn nga be cuɛn bé wun ase mun, ɔ nin jue'm bé wun ndɛ.

14Sran'm be fɛli i mɛn'n kwlakwla nun be bali Salomɔn i ngwlɛlɛ ndɛ'm be tielɛ. Famiɛn nga be tili Salomɔn i ngwlɛlɛ'n i ngan'n, be kwlaa be sunmannin be sran be bali.

15Iram b'ɔ ti Tir i famiɛn'n, i janvuɛ yɛlɛ David. Kɛ ɔ tili kɛ Salomɔn yɛ be fa sieli i si David i osu'n, ɔ sunmannin i sran'm be nun wie mun kɛ be ko yo i mo.

16Salomɔn kusu sunmannin sran Iram sin kɛ be se i kɛ:

17«A si kɛ mín si David'n, kɛ i kpɔfuɛ nga be bo sin yiɛ i'n be ko kle i yalɛ'n yɛ be kleli i-ɔ. Ɔ man ɔ'a kwla kplan-man sua ɔ'a man-man Anannganman i Nyanmiɛn'n, sanngɛ Anannganman i fanngan nun'n, ɔ man i agualiɛ su'n, ɔ nyannin kwlalɛ bé su.

18Yɛ Anannganman min Nyanmiɛn'n, ɔ man m'an di alaje. E kpɔfuɛ'm bɔ a ´ti-ɔ, be waan b'a ba bue nga su o e, b'a bo nun wa o e, be nun-man lɛ kun. Be kle-man e nyrɛnnɛn kun.

19I sɔ'n ti, m'an fa akunndan kɛ n ´kplan sua kun m ´man Anannganman min Nyanmiɛn'n, afin i bɔbɔ seli mín si David kɛ: ‹Ɔ wa bɔ n ´kpɛ i kɛ ɔ sin wɔ ajalɛ nun'n, i yɛ ɔ ´kplan sua ´man min-ɔn.›

20I ti'n, n ´srɛ wɔ kpa, se ɔ sufuɛ'm be kɛ be `wɔ Liban oka'n su lɔ be ko kpɛ sɛdri waka be man min. Ɔ bɔbɔ a si kɛ waka kpɛlɛ nun'n, sran fi to-man amun Fenisifuɛ mun. Ɔ sufuɛ'm be akatua nga a bo'n, n ´tannin i kwlakwla'n m ´man wɔ. Min sufuɛ liɛ'm be ´uka ɔ liɛ mun.»

21Kɛ famiɛn Iram tili ngaliɛ nga Salomɔn ko mɛnnin i'n, i klun jɔli. I ti ɔ seli kɛ: «Ndɛ aliɛ ba nga nun n ´la Anannganman ase, ba ngwlɛlɛfuɛ dan b'ɔ fa mannin David kɛ ɔ sie Izraɛlfuɛ kpanngban nga mun'n ti!»

22Yɛ Iram sunmannin sran kɛ be ko se Salomɔn kɛ: «Ngaliɛ nga a wlali'n, n tili. Sɛdri nin siprɛs waka nga a klo'n, n ´fa man wɔ.

23Min sufuɛ'm be ´fa waka mun oka'n su lɔ be ´fa ba jenvie'n nuan lɔ, kpɛkuun e ´cici be fiɛnfiɛn e ´fa yi i jenvie'n nyin su. E ´fa be kɔ lele ju kan a kle ye lɛ'n. Kɛ ɔ ko ju lɛ'n, e ´nyannji be, kpɛkuun amun su wa fa. Nga n ´usa wɔ'n, yɛlɛ kɛ a man e nin min awlofuɛ mun e like diwa. Yɛ ɔ ti min akatua nin-ɔn.»

24Iram fa sɛdri waka, nin siprɛs waka kwlaa nga Salomɔn usali'n ɔ fa mɛnnin i.

25Salomɔn kusu, afuɛ nuan kwlakwla ɔ fa ble tɔnun akpi nsiɛn (6.000), ɔ nin olivie ngo kpafuɛ'n i litri akpi mɔcuɛ (8.000) fa man Iram. Ɔ ti i awlo'n i liɛ.

26Anannganman mannin Salomɔn i ngwlɛlɛ kɛ ɔ kan kleli i'n sa. Ɔ man ɔ nin Iram be afiɛn a fɔn-man, be trali aenguɛ.

27Salomɔn fali Izraɛlfuɛ akpi-akpi ablasan (30.000) kɛ be di plɔtrɔ junman.

28Anglo kwlakwla sran akpi blu (10.000) be kɔ Liban, i sin be wa di anglo nnyɔn be awlo. Adɔniram yɛ ɔ ti junman'n i su kpɛn nin-ɔn.

29Salomɔn lɛ sran akpi-akpi ableso (70.000) uflɛ. Be yɛ be sua i trɔ mun-ɔn. Yɛ sran akpi-akpi ablaɔcuɛ (80.000) be sɛ yɛbuɛ oka'n su lɔ be man Salomɔn.

30Sran akpi nsan sran ya nsan (3.300) be o be liɛ lɛ kusu. Prefe'm be sieli be kɛ be nian sran tandra sɔ'm be junman'n su.

31Salomɔn seli kɛ be `nian yɛbuɛ kpakpa mun be `yi nan be `sɛ be nan be `yo nglannglan. I waan be sɛ be dandan nan b'a fa wla sua'n i ase.

32Salomɔn nin Iram be junman difuɛ mun, be nin Giblifuɛ'm be wieli yɛbuɛ'n sɛ. Be yoli man yɛbuɛ nin waka nga be ko fa ko kplan sua'n i ngba ti yiali.

← Chapter 4 Chapter 6 →