Nehemiah 3

balinese

1Sang Pandita Agung Elyasib miwah parapandita semeton-semeton danene raris ngwangun malih Gapura Biri-birine, tumuli masang lawang-lawangnyane. Dane taler mlaspas temboke ngawit saking Menara Mea rauh ka Menara Hananeel.

2Tan doh saking irika wong Yerikone taler pada ngwangun, tur tan doh saking wong Yerikone punika, wong Sakur katurunan Dane Imri taler ngwangun.

3Gapura Ulune kawangun antuk palingsehan Dane Senaa. Dane masang kosen miwah lawang-lawang saha pangancing-pangancing lan palang-palangnyane.

4Tan doh saking irika, Dane Meremot okan Dane Uria putun Dane Hakos sane mecikang, tur ring sampingnyane Dane Mesulam okan Dane Berekya putun Dane Mesesabeel. Ring samping danene, kabecikang antuk Dane Sadok okan Dane Baana.

5Miwah tan doh saking irika kabecikang antuk wong Tekoane. Nanging pamimpinnyane nenten nyak sareng-sareng negen pakaryan sane kapategenang ring dane.

6Gapura Lawase kabecikang antuk Dane Yoyada okan Dane Paseah kasarengin antuk Dane Mesulam okan Dane Besoja. Dane masang kosen miwah lawang-lawang saha pangancing lan palang-palangnyane.

7Tan doh saking irika Dane Melaca wong Gibeon miwah Dane Yadon wong Meronot sane mecikang, kasarengin antuk wong Gibeon miwah Mispa, sane wenten ring wewengkon gubernur ring dauh Tukad Eprate.

8Sane mecikang nampek irika, inggih punika Dane Usiel okan Dane Harhaya, sinalih tunggiling tukang mas, tur ring samping danene, Dane Hananya sane dados tukang wewangen. Dane sareng sami pada ngrajegang tembok Yerusaleme kantos rauh ring Tembok Linggahe.

9Sane mecikang ring sampingnyane, Dane Repaya okan Dane Hur, sane ngwengku apahan kota Yerusaleme.

10Sane mecikang ring samping danene, Dane Yedaya okan Dane Harumap, beneng pisan ring arepan jeron danene, tur sane makarya ring samping danene Dane Hatus okan Dane Hasabneya.

11Bagian sane tiosan miwah Menara Prapene kabecikang antuk Dane Malkia okan Dane Harim, miwah Dane Hasub okan Dane Pahat-Moab.

12Tan doh saking genah danene, kabecikang antuk Dane Salum okan Dane Halohes sane ngwengku apahan kota Yerusaleme. Dane makarya kasarengin antuk oka-okan danene sane istri.

13Gapura Lebake kabecikang antuk Dane Hanun miwah wong kota Sanoahe. Dane pada ngwangun gapurane saha masang lawang miwah pangancing lan palang-palangnyane. Dane taler ngamecikang temboknyane kantos rauh ring Gapura Lulu sane panjangnyane 440 meter.

14Gapura Lulune punika kabecikang antuk Dane Malkia okan Dane Rehab sane ngwengku wewidangan Bet-Kereme. Dane ngwangun gapurane punika malih, tur dane masang lawang, pangancing miwah palang-palangnyane.

15Gapura Toya Klebutane kawangun antuk Dane Salum okan Dane Kolhose sane ngwengku wewidangan Mispane. Gapurane punika malih kawangun, kadagingin raab, lawang miwah pangancing-pangancingnyane. Dane taler ngamecikang tembok tlaga panampungan toyane, sane nampek ring taman ida sang prabu kantos rauh ring undag sane nganedunang saking Kota Daud.

16Tan doh saking irika, Dane Nehemia okan Dane Asbuk sane ngereh wewidangan Bet-Sur, ngamecikang kantos rauh ring arepan setran Ida Sang Prabu Daud, tur rauh ring tlaga miwah jeron paraprawirane.

17Tan doh saking irika wong Lewine sane mecikang, inggih punika Dane Rehum okan Dane Bani, tur ring samping danene, kabecikang antuk Dane Hasabya sane ngereh apahan saking wewidangan Kehilane, inggih punika tembok pabuat wewidangan danene.

18Sane mecikang ring samping danene, inggih punika pasemetonan danene, sane mapesengan Binui okan Dane Henadad sane ngereh malih apaha, wewidangan Kehilane.

19Tan doh saking irika, Dane Eser okan Dane Yesua, sane ngereh wewidangan Mispane. Dane mecikang tembok ring arepan margine ngamunggahang sane ngungsi ka gudang sanjatane, nampek ring bucun temboke.

20Tembok sapanglanturipun kabecikang antuk Dane Baruh okan Dane Sabai, ngawit saking bucun temboke iwau kantos rauh ring kurine jaga ngranjing ka purin Pandita Agung Elyasibe.

21Sane mecikang tembok sapanglanturipun, inggih punika Dane Meremot okan Dane Uria putun Dane Hakos, ngawit saking kurine jaga ngranjing ka purin Pandita Agung Elyasibe kantos rauh ka tanggun purine punika.

22Tembok sapanglanturipun kabecikang antuk parapandita sane magenah ring Lebak Yordane.

23Sapanglanturipun wong Benyamin miwah Hasub sane mecikang, kantos rauh ring arepan umahnyane. Tembok sapanglanturipun kabecikang antuk Dane Asarya okan Dane Maaseya, putun Dane Ananya kantos rauh ring samping jeron danene.

24Ngawit saking irika kantos rauh ring bucun temboke, kabecikang antuk Dane Binui okan Dane Henadad.

25Dane Palal okan Dane Usai mecikang ngawit saking bucun temboke punika kantos rauh ring menarane sane tegeh sane ngenjuh saking purin ida sang prabu, nampek ring genah pagebagane. Dane Pedaya okan Dane Paros mecikang saking irika kantos rauh ring Gapura Toyane sane bedangin miwah tembok sane wenten ring arepan menara sane ngenjuh punika. Parapangayahe sane makarya ring Perhyangan Agung sami magenah ring Opel.

27Wong Tekoane mecikang sane sapanglanturipun, saking arepan menarane sane ageng kantos rauh ring temboke sane nampek ring Opel.

28Ngawit saking Gapura Kudane, parapanditane sane mecikang kantos rauh ring arepan jeroan danene suang-suang.

29Sapanglanturipun, Dane Sadok okan Dane Imer sane mecikang kantos rauh ring arepan jeron danene. Tembok sapanglanturipun kabecikang antuk Dane Semaya okan Dane Sekanya, juru gebag Gapura Kangine.

30Tembok sapanglanturipun kabecikang antuk Dane Hananya okan Dane Selemya, kasarengin antuk Dane Hanun okan Dane Salap sane kaping nem. Tembok sapanglanturipun kabecikang antuk Dane Mesulam okan Dane Berekya kantos rauh ring arepan jeron danene.

31Sane mecikang sapanglanturipun inggih punika Dane Malkia, sane dados tukang mas. Dane mecikang kantos rauh ring genah pangayahe sane makarya ring Perhyangan Agung miwah genah parasudagare sane wenten ring arepan Gapura Panaptare tur rauh ring kamar sane baduur ring bucun temboke.

32Saking irika kantos rauh ring Gapura Biri-birine, kabecikang antuk paratukang mas miwah sudagare.

← Chapter 2 Chapter 4 →