Nehemiah 2

balinese

1Ring sasih Nisan, ring taun sane kaping kalih dasa panyeneng Ida Sang Prabu Artahsasta, tiang polih kaonangan buat nyodayang anggure punika ring ajeng ida sang prabu. Ida nyingak tiang masemu sedih, sane sadurung punika tiang nenten naenin kadi asapunika.

2Duaning punika ida sang prabu tumuli mataken ring tiang sapuniki: “Ngudiang dadi sedih pesan sebeng pamane? Paman tusingja sakit. Yen keto pasti paman nandang kaduhkitan.” Tiang raris rumasa ajerih pisan.

3Tiang tumuli matur ring sang prabu sapuniki: “Mugi ida sang prabu dirga yusa. Sapunapiang titiang nenten jaga ucem sebeng titiange, yening kota genah leluur titiange kapendem sampun uug maglaturan tur gapura-gapurannyane sami telas kateda antuk geni?”

4Ida sang prabu tumuli ngandika ring tiang sapuniki: “Yen keto kenken kenah pamane jani?” Tiang raris ngastawa ring Ida Sang Hyang Widi Wasa,

5tur sasampun punika tiang raris matur ring sang prabu sapuniki: “Yen palungguh iratu ledang nagingin pinunas titiange, lugrainja titiang mamargi ka Yehuda, ka kota genah paraleluur titiange kapendem, mangda titiang prasida ngwangun malih kotane punika.”

6Rikala punika sang pramesuari malinggih ring samping idane. Sang prabu tumuli nagingin pinunas tiange, sarwi ngandika ring tiang sapuniki: “Kudang dina makelonne paman majalan kema, tur buin pidanke paman lakar malipetan mai?” Irika tiang raris nguningayang ring ida indik suen tiange ring margi.

7Tiang tumuli matur ring sang prabu sapuniki: “Yen palungguh iratu ledang, lugrainja titiang surat-surat pabuat paragubernure sane ring dauh Tukad Eprate, mangda dane nglugrain titiang nglintang kantos titiang prasida rauh ring Yehuda.

8Tios ring punika titiang taler nunas surat pabuat Dane Asap, sane dados pangenter alas druene, mangda dane ngicen titiang taru-taru balok sane pacang pasang titiang ring gapuran bentenge sane nawengin Perhyangan Agunge, miwah pabuat tembok kotane, miwah jaga anggen titiang umah padunungan titiange.” Ida sang prabu nagingin pinunas tiange, santukan Ida Sang Hyang Widi Wasa ngiangin tiang.

9Tiang raris ngrauhin paragubernure ring dauh Tukad Eprate tur nyerahang surat ida sang prabu ring dane. Ida sang prabu ngutus parasenapati miwah wadua bala sane nunggang kuda buat nyarengin tiang ring margi.

10Rikala Dane Sanbalat wong Bet-Horon miwah Dane Tobia sane dados prakangge ring propinsi Amon mireng indike punika, dane rumasa tan seneng, mungguing wenten jadma rauh ngusahayang paindikan sane becik pabuat wong Israele.

11Tiang tumuli rauh ring Yerusalem.

12Sasampune tigang rahina tiang irika, tiang tumuli bangun rikala tengah wengi kasarengin antuk makudang-kudang anak sane nyarengin tiang. Tiang nenten nyritayang ring sapasira jua pawisik Ida Sang Hyang Widi Wasa sane wenten ring manah tiange. Samaliha tiang nenten makta ingon-ingon sajawining sane tegakin tiang kewanten.

13Rikala wengi, tiang medal nglintang ring Gapura Lebak, ka margine sane ngungsi ka Toya Klebutan Nagane miwah Gapura Lulune. Tiang nlektekang pisan tembok-tembok Yerusaleme sane sampun uug miwah gapura-gapurannyane telas teda geni.

14Tiang nglanturang mamargi ka Gapura Toya Klebutan miwah Tlaga Sang Prabu. Duaning keledae sane tegakin tiang nenten mrasidayang nglintang irika,

15tiang menek tur nuluh tlabahe punika buat nureksain temboke punika. Sasampun punika tiang raris mawali, tur ngranjing nglintang ring Gapura Lebake, ngraris budal.

16Paraprakanggene nenten pada uning kija pamargin tiange miwah napi sane laksanayang tiang, santukan kantos rauh ring rahinane punika, tiang durung mapitau ring wong Yehudane, yadiastu parapandita, yadian parapamimpin, ring pangageng miwah ring parapetugas sane tiosan.

17Sasampune punika tiang raris mabaos ring dane ipun sapuniki: “Parasemeton sampun ngaksi indik kamewehan sane tandangin iraga. Kota Yerusaleme sampun dados rugrugan rerubuhan, tur gapurannyane sampun puun katunjel. Ngiring iraga ngwangun malih tembok Yerusaleme, mangda sampunang malih iraga kanistayang.”

18Rikala tiang nartayang ring dane ipun, indik sih pasuecan Ida Sang Hyang Widi Wasa, sane setata ngiangin tiang, kadi asapunika taler indik pangandikan ida sang prabu ring tiang, dane ipun raris mabaos sapuniki: “Tiang nyadia pacang ngwangun!” Dane miwah ipun tumuli makarya antuk panelas kakuatannyane buat ngarap pakaryan sane luih punika.

19Rikala Dane Sanbalat wong Bet-Horone miwah Dane Tobia wong Amone, taler Dane Gesem wong Arabe, mireng indike punika, dane raris nemberang miwah nganistayang tiang sareng sami. Sapuniki baosnyane: “Apa ane gae jerone? Apake jerone lakar brontak nglawan ida sang prabu?”

20Tiang raris mabaos ring dane sapuniki: “Ida Sang Hyang Widi Wasa, Widin suargane, sane pacang ngawinang tiang sida karya. Tiang parakaulan Idane sampun nyadia pacang ngwangun. Nanging ragane nenten madue hak wiadin bagian, tur nenten pacang kalinguang ring Yerusalem.”

← Chapter 1 Chapter 3 →