Nehemiah 4

balinese

1Rikala Dane Sanbalat mireng mungguing tiang wong Yahudi sedek ngwangun malih temboke punika, dane kalintang duka tumuli nganistayang tiang sareng sami.

2Ring arepan parakantin danene miwah wadua balan wong Samariane, dane mabaos sapuniki: “Apaya gaena jlema Yahudine ane nista ene? Apake ia makita buin ngwangun kotane ento? Apake ia ngaden ulihan ngaturang aturan, ia lakar nyidayang mragatang gegaene ento sajeroning awai? Apake ia nyidayang ngae wewangunan aji batu baan rugrugan rerubuhane ento?”

3Dane Tobia sane ngadeg ring samping danene tumuli nglanturang baose punika kadi asapuniki: “Tembok ane kenkenya ane lakar sida baana ngae? Miribne yen puuk cicing dogen temboke ento lakar pungkat.”

4Tiang raris ngastawa sapuniki: “Duh Ratu Sang Hyang Widi Wasa, ledang IRatu mireng baosipune nganistayang titiang. Dumadak IRatu malikang baosipune nganistayang titiang punika ring ipun. Mugi sakancan paderbeannyane telas karampas, tur banggayangja ipun kaselong ka dura negara.

5Sampunang IRatu ngampurayang laksananipune sane corah, tur elingangja dosa-dosanipune, duaning ipun sampun nganistayang titiang rikalaning titiang ngwangun.”

6Tiang sareng sami tumuli nglanturang nyujukang temboke punika tur gelis puput apatengaan tegehnyane, santukan rakyate santep pisan makarya.

7Dane Sanbalat, Tobia miwah wong Arab, wong Amon lan wong Asdod mireng mungguing tiang mrasidayang gelis malih ngwangun tembok Yerusaleme, tur song-song sane wenten ring temboke punika makasami sampun matampel, dane sareng sami tumuli duka pisan.

8Duaning punika dane sareng sami raris mapacukan buat ngrauhin saha ngebug kota Yerusalem tur ngwentenang iur.

9Nanging tiang sareng sami raris ngastawa ring Widin tiange tur tetep ngwentenang pajagaan rahina miwah wengi.

10Rakyat Yehudane ngidungang kakidunganipune sapuniki: “Tiang sayan leleh negen tetegenan, buina liu pesan rerubuhan ane patut kakisidang. Kudiang tiang lakar nyujukang tembok di dinane jani?”

11Meseh tiange mitaenang mungguing tiang sareng sami nenten ngeton ipun, wiadin nenten uning napi sane sedek rincikang ipun. Ipun mitaenang tan pararapan ipun jaga mrasidayang ngebug tur ngamademang tiang sareng sami miwah ngrarianang pakaryan tiange.

12Nanging nyabran rahina wenten wong Yahudi sane magenah ring pantaran imeseh punika rauh mapekeling ring tiang indik saluiring rencananipune sane jaga katibakang ring tiang.

13Duaning punika rakyate raris prentahang tiang mangda ngagem pedang, tumbak miwah panah, tur tiang ngenahang ipun ring ungkur temboke sane durung puput manut palingsehannyane.

14Tiang manggihin rakyate kaliput antuk rasa ajerih. Duaning punika tiang raris mabaos ring ipun miwah ring parapamimpin lan prakanggennyane sapuniki: “Sampunang semeton ajerih ring meseh iragane. Elingja ring Ida Sang Hyang Widi Wasa sane maha luur tur maha wisesa. Rarisang mayuda buat nindihin parakadang wargan semetone sane wenten ring kota, nindihin oka-okan semetone, rabi miwah umah semetone.”

15Meseh tiange miragi mungguing tiang uning indik Ida Sang Hyang Widi Wasa ngaonang saluiring rencanannyane. Sasampun punika tiang sareng sami raris nglanturang malih ngwangun temboke punika.

16Ngawit saking duk punika sapanglanturipun apahan rakyate makarya miwah sane malih apahan sayaga ngrangsuk pangangge perang, ngagem tumbak, tamiang miwah panah. Kadi asapunika taler parapamimpine tansah ngangsok manah rakyate,

17sane sedek ngwangun tembok punika. Anake sane ngajang barang-barang wewangunane punika, ipun makarya nganehin sarwi ngagem sanjata ring limannyane sane tiosan.

18Samaliha asing-asing rakyat sane makarya setata nyelet pedang ring bangkiangnyane. Anake sane maderbe tetegenan buat nyuarayang kulkul bulus makadados tanda wenten baya tansah majujuk ring samping tiange.

19Tiang mabaos ring rakyate, ring paraprakangge miwah pamimpinnyane sapuniki: “Genah iragane makarya sambrag tur madoh-dohan. Iraga pada mapalas-palasan ring duur temboke.

20Yen semeton mireng suaran kulkul bulus, semeton patut mapunduh ring saileh tiange. Ida Sang Hyang Widi Wasa pacang mayuda pabuat iraga.”

21Kadi asapunika mamargi nyabran rahina, saking semeng kantos bintang-bintange sampun endag rikalaning wengi, apahan saking pantaran tiange makarya ring duur temboke, tur sane malih apahan majaga ngagem tumbak.

22Ring masa-masa punika tiang mrentahang rakyate, parapangenter pakaryane, mangda ipun miwah anake sane ngayahin ipun meneng ring Yerusalem rikalaning wengi, mangda ipun mrasidayang nyaga kotane punika rikala wengi, pateh sakadi ipun makarya rikalaning rahina.

23Tiang nenten naenin ngelus panganggen tiange yadiastu ring dauh wengine, kadi asapunika taler anake sane nyarengin tiang, parapangayah miwah pangawal tiange. Sajaba punika tiang taler setata ngagem sanjata.

← Chapter 3 Chapter 5 →