Job 4

balinese

1Dane Elipas sane saking kota Teman, matur ring Dane Ayub sapuniki: “Inggih semeton Ayub, punapike semeton jaga duka, yen tiang matur abuku ring semeton? Tiang sampun nenten mrasidayang malih mendep kewanten.

3Semeton sampun katah pisan ngurukang anak miwah nguatang anake sane lemet.

4Yening wenten anak katanjung, lemet miwah lesu, baos semetone ngangsok ipun kantos ipun mrasidayang bangun.

5Sane mangkin semeton sane polih duman kamewehan, tur semeton kalintang bingung ngarepin indike punika.

6Semeton astiti bakti ring Ida Sang Hyang Widi Wasa, tur urip semetone tan wenten iwangnyane, punika awinannya semeton patut maderbe kapracayan miwah pangajap-ajap.

7Indayang kayun-kayunin. Naeninke wenten anak sane patut katempuh antuk bencana?

8Tiang sampun manggihin jadmane sane mapakardi ala miwah nandur kajaatan, sane mangkin ipun muponin ala miwah kajaatan.

9Tan bina sakadi angin ribute, kadi asapunika pidukan Ida Sang Hyang Widi Wasa nyirnayang ipun.

10Jadmane dursila aung-aung miwah gerem-gerem sakadi singane, nanging Ida Sang Hyang Widi Wasa mungkem ipun tur nustus gigin ipune.

11Ipun tan bina sakadi singa-singane sane nenten polih tetadahan, ipun padem, tur pianak-pianakipune pada sambeh.

12Wenten pawisik sane banban katiba ring tiang, nanging yadiastu kadi asapunika, pawisike punika kapiragi antuk kuping tiange.

13Tan bina sakadi ipiane sane kaon ngulgul pules tiange.

14Tiang ngejer tur ngetor, dewek tiange makaukud ngejer ulihan jejeh.

15Wenten angin ngasirsir nempuh muan tiange, bok tiange jering tengkejut.

16Wenten anak majelegan panggihin tiang ngadeg irika, jelegane punika nengneng tiang, nanging tiang nenten mrasidayang maosang, punapike sujatinipun jelegane punika. Sasampune punika tiang raris miragi suara rauh saking sunia, sapuniki:

17‘Wentenke anak mrasidayang patut ring ayun Ida Sang Hyang Widi Wasa wiadin suci ring ajeng Ida Sang Hyang Widi Wasa?

18Ida Sang Hyang Widi Wasa nentenja ngega parawadua balan Idane, paramalaekat Idane taler wenten sane kacingak iwang.

19Punapike semeton mitaenang mungguing Ida jaga ngega jadmane sane kakardi antuk tanah legit, sane malakar antuk buk, sane prasida kenyagang sakadi ngetngete?

20Menawita rikala semeng jadmane mrasidayang urip, nanging sadurung sandikala ipun padem tan karunguang.

21Paderbean ipune makasami kambil, ipun padem nanging ipun kantun katunan kawicaksanaan.’

← Chapter 3 Chapter 5 →