Job 3

balinese

1Pamuputipun Dane Ayub tumuli ngawitin mabaos, sarwi nemah rahina piodalan danene, sapuniki baos danene:

2“Duh Ratu Sang Hyang Widi Wasa, temahja rahina palekadan titiange, samaliha temahja wengine daweg titiang ngawit kabelingang.

4Duh Ratu Sang Hyang Widi Wasa, dadosangja rahinane punika peteng dedet, tur sampunangja malih elinganga rahinane punika. Samaliha sampunangja icena galange nyinarin rahinane punika.

5Dadosangja rahinane punika remrem tur peteng dedet, likubja ipun antuk gulem, tur icalangja suryane.

6Icalangja wengine punika saking cacakan sasih miwah taune, tur sampunang malih ipun etanga.

7Dadosang ipun wengi sane suung mangmung, sane nenten madaging kaliangan.

8Banggayang rahinane punika katemah antuk paratukang sihire miwah antuk anake sane mrasidayang mrentah Lewiatane.

9Sampunang icena bintang siange masinar, tur sampunang icena ipun manggihin galang kangin.

10Temahja wengine punika, santukan ipun sampun manggayang titiang lekad, saha nenten dohanga kamewehan miwah kaduhkitane saking titiang.

11Becikan titiang padem ring garba wasan memen titiange, wiadin padem riwau titiang lekad.

12Napi awinannya memen titiange raris ngabin titiang? Napi awinannya ipun raris manyonyoin titiang?

13Sujatinipun, yen titiang sampun padem, sane mangkin titiang mrasidayang mararian saha tentrem,

14miwah pules sakadi pararatu miwah parapamrentah sane ngwangun malih puri-purinnyane sane sampun uug duke nguni.

15Samalihipun titiang jaga pules sakadi parapangerane, sane ngebekin purinnyane antuk mas miwah perak,

16wiadin titiang jaga pules sakadi rarene sane lekad kruron tur kengkebang, sane nenten naenin ngeton galang.

17Ring pati loka, jadmane durjana wusan mambek dursila miwah anake sane tuyuh makarya prasida mararian.

18Kadi asapunika taler paranarapidanane pada muponin kaliangan miwah dame, ipun nenten malih miragi suara sane keras miwah kasar sane mrentah ipun.

19Makasami jadmane wenten irika, inggih punika jadmane sane kabinawa miwah sane nista miwah sakancan panjake pamuputipun pada merdeka.

20Napi awinannya jadmane sane nandang pakewuh kicen kantun urip miwah jadmane sane kaduhkitan kicen galang?

21Ipun pada ngati-ati padem, nanging sang pati nenten rauh. Ipun ngedotang pati loka bangetan ring ngedotang arta brana.

22Ipun nenten jaga liang, yen ipun durung padem tur katanem.

23Ida Sang Hyang Widi Wasa ngengkebang indik sane pacang rauh ring ipun, tur ngurung ipun saking milehan.

24Panulamen titiange puniki dados tetedan titiange, tur titiang tan papegatan masesambatan.

25Saananing paindikan sane ajerihin titiang punika makasami rauh nibenin titiang.

26Titiang nenten prasida molih sutrepti, nenten prasida mararian tur kamewehan titiange nenten rered-rered.”

← Chapter 2 Chapter 4 →