Job 5

balinese

1Inggih semeton Ayub, indayang sane mangkin semeton jerit-jerit nunas tulung. Punapike wenten anak sane jagi nyaurin semeton? Punapike wenten satunggaling malaekat genah semetone nunas tulung?

2Jadmane nambet padem malantaran sakit ati miwah jadmane jugul apunggung padem malantaran iri ati.

3Tiang sampun manggihin jadma-jadma sane nambet sane pakantenanipun sutrepti, nanging tan pasamodana tiang nemah pumahanipune.

4Pianak-pianakipune nenten naen muponin raharja, tan wenten anak sane matindih ring ipun ring ajeng pangadilane.

5Jadmane sane seduk jaga nunas pamupon anake sane nambet punika, kantos kayang kapantun sane mentik ring bet duine miwah jadmane bedak jaga ngedotang kasugihanipune.

6Kajaatane punika nentenja mentik ring tanahe, wiadin kamewehane punika nentenja tumbuh saking pretiwine.

7Nenten pisan wenten kadi asapunika. Manusane ngardi kamewehan pabuat dewekipune niri, tan bina sakadi lelatun genine medal saking genine.

8Yening tiang sakadi semeton, sampun sinah tiang nunas ica ring Ida Sang Hyang Widi Wasa, tur ngaturang saluiring kawentenan tiange ring Ida.

9Iraga nenten mrasidayang ngresep ring pakardin Idane sane agung miwah ring katawahan-katawahan sane kardi Ida, sane tan keneng winilang akehnya.

10Ida nurunang sabeh ka jagate miwah ngecokin pategalane antuk toya.

11Inggih sawiakti pisan, Ida Sang Hyang Widi Wasa ningtingang jadmane sane nista miwah mapaica kaliangan ring sakancan anake sane kaduhkitan.

12Ida nguugang rencanan jadmane sane ririh miwah nyeet jadmane wicaksana antuk rencananipune niri, ngantos saluiring pakaryanipune nenten sida karya,

14kantos rikalaning kali tepet ipun pada patigadab kapetengan.

15Nanging Ida Sang Hyang Widi Wasa ngluputang anake tiwas saking baya pati. Ida ngluputang jadmane kakirangan saking anake sane ngereh ipun.

16Ida mapaica pangajap-ajap ring jadmane tiwas tur Ida mungkem jadmane sane dursila.

17Bagia anake sane kaglemekin antuk Ida Sang Hyang Widi Wasa. Sampunangja semeton pedih, yening semeton dukain Ida.

18Ida Sang Hyang Widi Wasa medbed tatu sane kardi Ida. Tangan Idane sane natunin semeton tur tangan Idane sane nguasang.

19Nyabran rahina Ida ledang ngluputang semeton saking karusakan.

20Rikalaning masan sayah, Ida ledang nguripang semeton. Ring sajeroning paperangan Ida ngluputang semeton saking baya pati.

21Ida Sang Hyang Widi Wasa ledang ngluputang semeton saking pisuna, tur Ida ledang ngluputang semeton rikalaning semeton katempuh antuk karusakan.

22Semeton jaga ngedekin indik kabramantian miwah kasedukan, tur semeton tan jaga ajerih ring sato-sato galak.

23Pategalan sane tekapin semeton nenten jaga madaging batu kaang miwah semeton tan jaga naen kasarap antuk sato galak.

24Samalihipun semeton jaga muponin sutrepti ring kemah semetone. Rikala semeton nyingakin biri-birin semetone, ipun panggihin semeton pada rahayu.

25Semeton jaga madue putra sakadi don padange sane ring pategalane akehipun.

26Sakadi gandume sane wayah rikalaning masan ngampung, kadi asapunika taler semeton jaga nutugang tuuh kantos lingsir pisan.

27Inggih semeton Ayub, indike punika sampun saking sue antuk tiang mlajahin. Indike punika patut pisan. Duaning punika sane mangkin ledang semeton makayun-kayunin.”

← Chapter 4 Chapter 6 →