Job 18

balinese

1Dane Bildad raris masaur sapuniki: “Inggih semeton Ayub, punapike anake sakadi semeton nenten mrasidayang meneng. Yening semeton wusan mabaos, tur sedia mirengang, tiang jaga mabaos ring semeton.

3Punapike sane ngawinang semeton mitaenang tiang nambet sakadi ubuhan?

4Semeton ngraga sane nyakitin ragan semetone malantaran kapedihan semetone. Punapike jagate punika patut dados tegal melakang, ulihan semeton mamedih? Punapike Ida Sang Hyang Widi Wasa patut ngisidang gunung-gununge, buat murnayang pakayunan semetone?

5Galang jadmane dursila tan pariwangde jaga kadampeh tur endihipune nenten jaga malih masunaran.

6Lampu sane wenten ring kemahipune jaga kapademang mangda dados peteng dedet.

7Tindakan-tindakanipune manteb, nanging sane mangkin ipun katanjung. Ipun tumuli labuh keni sengkala malantaran pepinehipune niri.

8Ipun mamargi maranin jaring, tur buntutipune keni jaring.

9Wenten jeet sane nyeet entudipune tur negul ipun.

10Wenten jeet sane kapasang mengkeb ring tanahe miwah wenten jeet sane sampun kapasang ring margine sane jaga marginin ipun.

11Wenten wisia sane ngresresin tansah ngiter tur nyantosang ipun, tur wisia sane ngresresin punika nututin ipun saparilampah ipune.

12Ipun dot mamanah sugih, nanging sane mangkin ipun marasa seduk, tur bencanane tansah nyantosang ipun ring kiwa tengenipune.

13Dewekipune kalikub antuk pinakit sane ngawinang ipun padem, tur sane ngawinang lima miwah buntutipune berek.

14Ipun kapaid saking kemah genahipune madunung saha sutrepti, samaliha ipun kapaid nangkil ring Sang Pati Raja.

15Sane mangkin anak lian sane madunung ring kemahipune, sasampun kemahipune punika kasambehin werirang buat mresihin kemahe punika.

16Akah-akah miwah carang-carangipune pada layu tur tuh.

17Kabinawanipune jumah wiadin ring padesan sampun nenten kantun, samaliha nenten wenten malih anak sane eling ring ipun.

18Ipun jaga kentungang saking genah jadmane urip, ipun kentungang saking galange ka petenge.

19Ipun nenten maderbe katurunan tur tan wenten sane luput rahayu.

20Sakancan jadmane sane miragi kawentenanipune, saking kangin rauh kauh, sami pada tengkejut tur jejeh ngetor.

21Kadi asapunika kawentenan jadmane dursila, inggih punika jadmane sane nenten lingu ring Ida Sang Hyang Widi Wasa.”

← Chapter 17 Chapter 19 →