Job 19

balinese

1Dane Ayub tumuli nyaurin sapuniki: “Napi awinannya semeton kantun kewanten nyakitin tiang antuk baos?

3Semeton tan mari nganistayang tiang, samaliha nenten maderbe kimud nemah misuh tiang.

4Dipradene upami tiang sampun malaksana iwang, punapike punika nyakitin semeton?

5Semeton mitaenang ragan semetone becikan ring tiang, tur nganggep kamewehan tiange punika makadados bukti kiwangan tiange.

6Punapike nenten kacingak antuk semeton, mungguing Ida Sang Hyang Widi Wasa sane sampun ngardi puniki? Ida sampun masang jeet buat ngejuk tiang.

7Tiang ngaturang protes marep ring angkara murkan Idane punika, nanging nenten wenten anak nglinguang. Nenten wenten anak nglinguang jeritan tiange buat nunas kadilan.

8Ida Sang Hyang Widi Wasa sampun ngempetin margine, tur tiang nenten mrasidayang nglintang. Ida sampun ngengkebang margine sane marginin tiang ring petenge.

9Ida sampun ngrampas kasugihan tiange, tur nyirnayang kabinawan tiange.

10Ida nglempag tiang saking kiwa tengen, saking arep miwah ungkur. Ida mungkatang pangajap-ajap tiange, tur manggayang tiang layu miwah padem.

11Ida Sang Hyang Widi Wasa menggah piduka ring tiang, tur Ida nadosang tiang meseh Idane sane pinih kaon.

12Ida ngutus wadua balan Idane buat ngebug tiang. Ida makarya bangbang tur ngurung kemah tiange.

13Ida Sang Hyang Widi Wasa sampun ngawinang nyama-nyamaan tiange ngutang tiang. Tiang dados wong sunantara pabuat anake sane pecak uning ring tiang.

14Kadang warga miwah sawitran tiange sampun pada makaon.

15Anake sane madunungan ring umah tiange sampun pada lali ring tiang. Wang jeron tiange sampun nganggep tiang dados wong sunantara.

16Rikalaning tiang ngaukin parekan tiange, ipun nenten masaur, yadiastun tiang ngidih tulung ring ipun.

17Somah tiange nenten mrasidayang ngadek engkah tiange, tur nyama tugelan tiange nenten nyak nganampekin tiang.

18Alit-alite pada nemberang tiang, tur ipun pada ngedekin tiang.

19Parasawitran tiange sane pinih raket pada seneb manggihin tiang. Anak sane pinih tresnain tiang sampun ngelen ulat ring tiang.

20Kulit tiange madeket ring tulang-tulang tiange, tiang sampun tambis-tambis padem.

21Semeton puniki parasawitran tiange, olasinja tiang. Tangan Ida Sang Hyang Widi Wasa sampun manteg tiang.

22Napi awinannya semeton nyakitin tiang sakadi Ida Sang Hyang Widi Wasa? Punapi durung cukup semeton nyakitin tiang?

23Sapunapi antuk tiang nunas, mangda wenten anak ngelingang baos tiange, miwah nyuratang ring cakepane?

24Wiadin ngukir baos tiange antuk paet ring batune miwah nulis baose punika mangda kantun manggeh salami-laminipun.

25Nanging tiang uning wenten anak ring suargan, sane jaga rauh ring pamuput dados patindih tiange.

26Yadiastun sasampun kulit tiange kateda antuk pinakit, sakantun ipun neket ring dewek tiange, tiang jaga ngeton Ida Sang Hyang Widi Wasa.

27Tiang jaga ngeton Ida antuk matan tiange, tur Ida nenten dados anak sunantara pabuat tiang. Manah tiange dekdek renyuh duaning semeton mabaos:

28‘Sapunapike jaga antuk iraga nyakitin ipun?’ Semeton ngrereh dadalan jaga ngebug tiang.

29Nanging sane mangkin, ajerihja semeton ring pedange, inggih punika pedang sane mamuat temah Ida Sang Hyang Widi Wasa marep ring dosane, mangdane semeton uning, mungguing wenten pangadilan.”

← Chapter 18 Chapter 20 →