Job 17

balinese

1Wates umur tiange sampun nampek. Angkihan tiange sampun seksek. Wantah kuburan kewanten sane kantun nyantosang tiang.

2Kaduhkitan tiange tan sipi, ngantos sakancan anake sami nganistayang tiang.

3Duh Ratu Sang Hyang Widi Wasa, titiang matur saking nulusing ati. Pirengangja atur titiange. Nenten wenten malih jadma sane ngilonin titiang.

4Palungguh IRatu sampun nutup pepinehipune, mangda ipun nenten maderbe daya. Sampunangja ipun icena ngaonang titiang.

5Wenten sloka sane nguni maosang, mungguing jadmane sane nilas sawitranipune ulihan ipun kuduan ring jinah, kenginan malantaran punika pianak-pianakipune jaga nemu sangsara.

6Tur sane mangkin anake pada nepekang slokane punika ring titiang. Ipun pada rauh tur ngecuhin muan titiange.

7Kaduhkitan titiange sampun tambis-tambis ngawinang titiang buta, tur lima miwah buntut titiange waluya sakadi lawat kewanten.

8Jadmane sane jujur sami pada tengkejut, tur ipun sareng sami pada ngukum titiang sakadi jadma sane tan pawidi.

9Jadmane sane patut, sayan sue sayan andel ring dewekipune sawiakti patut.

10Nanging yening ipun sareng sami punika pada rauh tur majujuk ring arep titiange, adiriko nenten jaga wenten jadma pradnyan sane panggihin titiang ring pantaranipune.

11Tuuh titiange sampun lintang. Rencanan titiange nenten sida labda karya, tur pangajap-ajap titiange sampun telas.

12Nanging parasawitran titiange maosang mungguing wengine punika rahina. Ipun maosang mungguing galange sampun nampek, nanging titiang uning, mungguing titiang kantun sajeroning peteng.

13Sane ajap-ajap titiang wantah pati loka kewanten, irika titiang jaga pules sajeroning petenge.

14Bangbang setrane punika jaga wastanin titiang bapan titiange, miwah uled-ulede sane neda dewek titiange punika wastanin titiang meme miwah nyaman titiange luh.

15Duaning punika, ring dijake pangajap-ajap titiange? Sapasirake sane uning, mungguing titiang maderbe pangajap-ajap?

16Yening titiang mamargi ka pati loka, pangajap-ajape punika nenten jaga nyarengin titiang mrika.”

← Chapter 16 Chapter 18 →