Jeremiah 18

balinese

1Ida Sang Hyang Widi Wasa ngandika ring tiang sapuniki:

2“Kemaja ka umah tukang payuke. Ditu Ulun lakar ngwarahang pituduh Ulune teken kita.”

3Raris tiang mamargi ka umah tukang payuke punika. Ipun panggihin tiang sedeng itehe makarya ring jantrannyane.

4Rikala satunggaling payuk sane sedeng kakaryanin punika rusak, raris ipun ngambil tanah legite iwau tumuli kawangun malih kadadosang barang sane tiosan.

5Irika Ida Sang Hyang Widi Wasa ngandika ring tiang sapuniki:

6“Apake Ulun tusing wenang ngarap bangsa Israel buka tukang payuke ngarap tanah legite ento? Kita tansah ada di liman Ulune buka tanah legite di liman tukang payuke.

7Yen nuju Ulun ngandika mungguing Ulun lakar ngabut, nguug wiadin lakar ngeseng satunggaling bangsa wiadin kaprabon,

8nanging yen bangsane ento suud matingkah dursila, Ulun tusing payu nyalanang apa ane suba sabdayang Ulun.

9Tungkalikane, yadian Ulun suba ngandika mungguing Ulun lakar numbuhang wiadin ngwangun satunggaling bangsa wiadin kaprabon,

10sakewala bangsane ento tusing nyak pageh nuut sapatitah Ulune, tur ia tansah malaksana dursila, Ulun masih lakar tusing nglaksanayang apa ane suba janjiang Ulun.

11Ane jani, kema orahin rakyat Yehuda muah Yerusaleme mungguing Ulun ane jani sedek ngrencanayang buat nglawan tur ngukum ia. Orahinja ia apanga suud ngae dosa, tur apang ia ngesehin tingkahne ane suba-suba.

12Ia lakar masaut kene: ‘Napi awinanipun kadi asapunika? Tiang jaga pageh mamengkung tur ngambekang kadursilan manut sapakitan tiange.’ ”

13Pangandikan Ida Sang Hyang Widi Wasa, asapuniki: “Tegarangja takonin bangsa-bangsane makejang, apake taen ada ane kene. Bangsa Israele suba ngae paundukan ane jele pesan!

14Apa taen muncuk gunung batu kaange di Libanon tusing kakaput baan salju? Apake yeh tukad pagunungane ane dingin ento bisa nyat?

15Nanging kaulan Ulune jeg bisa engsap teken Ulun. Ia morbor pasepan buat paradewane. Ia suba katanjung di mambahannyane suang-suang. Ia tusing enu majalan di margane ane tua. Ia suba majalan di rurunge ane salah.

16Ia suba nadiang tanahe ene tanah ane ngresresin, ane kanistayang salawas-lawasne. Sawatek anake liwat lakar tengkejut nepukin unduke ento. Buina ia pada ngep enggang kabatek baan angobne.

17Ulun lakar mrarakang kaulan Ulune di arepan musuhne buka abune ampehang angin uli kangin. Ulun lakar ngutang ia, tur Ulun tusing lakar nulungin ia dikalaning bencanane ento teka.”

18Irika rakyate pada mabaos sapuniki: “Jani jalanja iraga ngae pangindrajala marep teken Nabi Yeremia, sawireh tusingja kuangan pandita ane lakar ngurukang iraga, anak wicaksana ane lakar mituturin iraga muah ane lakar ngwarahang sabdan Ida Sang Hyang Widi Wasa. Jani jalan alih-alihin pelihne tur suud madingehang munyinne.”

19Irika tiang ngastawa sapuniki: “Duh Ratu Sang Hyang Widi Wasa, pirengangja atur titiange, tur pirengangja napi sane sampun baosanga antuk meseh titiange ngeniang indik titiange.

20Punapi wenten anak ngwales kabecikan antuk kajaatan? Nanging ipun sampun makarya bangbang buat jaga nuludang titiang mrika. Ledang Palungguh IRatu eling mungguing titiang sampun mapinunas ring Palungguh IRatu, mangda sampunang Palungguh IRatu jaga ngrauhang piduka ring ipun.

21Nanging sane mangkin duh Ratu, banggayang pianakipune padem kasayahan, banggayang sampun ipun padem ring payudan. Banggayang somahipune balu miwah kicalan pianak, banggayang sampun mangda jadmane sane muani-muani padem antuk sakit tur truna-trunannyane padem ring payudan.

22Ledang Palungguh IRatu tan pawangsit ngrauhang prampok buat ngrampas umahipune sane ngawinang ipun jerit-jerit nandang takut. Ipun sampun ngardi bangbang pabuat titiang mangda titiang labuh irika, tur ipun sampun masang jeet jaga ngejuk titiang.

23Nanging Palungguh IRatu wikan ring sakancan pangindrajalannyane buat ngamademang titiang. Sampunangja ampurayanga kajaatan wiadin dosanipune. Banggayang ipun kaon ring payudan, tur tepasinja ipun rikalaning IRatu bendu.”

← Chapter 17 Chapter 19 →