Psalms 3

Bashkir 2023 (Изге Яҙма)

1Дауыттың мәҙхиәһе. Улы Авшаломдан ҡасҡан ваҡытта әйтелгән.

2Йә Раббы! Дошмандарым ни тиклем күбәйҙе! Күптәр миңә ҡаршы баш күтәрҙе.

3«Алла уны ҡотҡармаясаҡ!» – тигәндәр Эргә-тирәмдә бихисап.

4Ә һин, Раббы, мине уратҡан ҡалҡанһың; Һин – даным, башымды юғары сөйҙөрөүсе.

5Раббыға мин ауаз һалам – Яуап ҡайтарыр изге тауынан.

6Ятам да йоҡлайым, йәнә уянам – Раббы мине һаҡлай.

7Ҡурҡыу юҡ солғаған ғәм халыҡтан, Ҡамап алһалар ҙа һәр тарафтан.

8Йә Раббым, ҡалҡ! Ҡотҡара һал, Аллам! Ҡундыр бар дошмандарымдың яңағына; Ҡыра һуҡ бөтә тештәрен яуыздарҙың.

9Ҡотолоу бары Раббынан! Халҡың өҫтөндә булһын фатихаң!

← Chapter 2 Chapter 4 →