Deuteronomy 19

Azerbajani Bible (South) Used in Both Iran and Azerbaijan 2008

1تارينيز رب، تورپاقلاريني سئزه وره‌جيی مئلّتلري محو ادنده، و سئز اونلارين مولکونو آليب شهرلرئنده و اِولرئنده ساکئن اولاندا،

2تارينيز ربّئن مالئک اولماق اوچون سئزه وره‌جيی تورپاغين مرکزئنده اؤزونوز اوچون اوچ شهر آييرين.

3اؤزون اوچون يوللار چکئب، تارينيز ربّئن سئزه مولک وره‌جيی اؤلکه‌ني اوچ بؤلگه‌يه آييرين. بله کي، آدام اؤلدورن بو شهرلردن بئرئنه قاچسين.

4صاغ قالماق اوچون اورايا قاچان قاتئل حاقّيندا، يعني قونشوسو ائله اوّلجه‌دن عداوتي اولمادان و بئلمه‌دن اونو اؤلدورن آدام باره‌ده قايدا بودور.

5مثلن، اودون کَسمَک اوچون قونشوسو ائله مِشه‌يه گدئب آغاج دوغراماق اوچون بالتا ووراندا، بالتانين دمئري ساپيندان چيخيب قونشوسونا دَيسه و قونشوسو اؤلسه، اؤلومه باعئث آدام بو شهرلردن بئرئنه قاچيب جا‌نيني قورتارسين.

6يوخسا قان قئصاصيني آلان قضبئنئن حئدّتئنده قاتئلئن دالينا دوشه بئلر. يول اوزاق اولسا، چاتيب اونو اؤلدوره بئلر، گرچي اونونلا قاباقدان عداوتي اولماديغينا گؤره اؤلوم جزاسينا لايئق ديئل.

7بونون اوچون سئزه امر ادئرم: اؤزوزه اوچ شهر آييرين.

8اگر تارينيز رب، آتالارينيزا آند ائچدئيي کئمي، سئزئن سرحدئنئزي گِنئشلَندئرسه و آتالارينيزا وعده وردئيي بوتون اؤلکه‌ني سئزه ورسه،

9اگر بو گون سئزه ددئيئم بو امري دئقّتله رئعايت اده‌سئنئز، يعني تارينيز ربّی سِوه‌سئز و همئشه اونون يوللاريندا يِرئيه‌سئنئز، او زامان اؤزونوز اوچون بو اوچ شهردن علاوه، اوچ شهر ده سِچئن.

10بلجه تارينيز ربّئن ائرث اولاراق سئزه وره‌جيی تورپاقدا گوناهسيز قان تؤکولميه‌جک؛ و هم ده قان تؤکمَکده تقصئرکار اولمازسينيز.

11لاکئن اگر بئرئنئن قونشوسو ائله عداوتي وار، و کمئنده دوروب اونو گؤزله‌سه و هوجوم اده‌رک اونو ووروب اؤلدورسه، و بو شهرلردن بئرئنه قاچسا،

12بو آدامين شهرئنئن آغساقّاللاري آدام گؤندرئب، اونو اورادان آليب، اؤلمَک اوچون قان قئصاصي آلانا تسلئم اتسئنلر.

13اونا رحم اتمه‌يئن. گوناهسيز قاني ائسرايئلدن تمئزله‌يئن کي، حياتينيز خوش کچسئن.

14تارينيز ربّئن مالئک اولماق اوچون مئراث آلاجاغينيز ائرثئنئزده، قونشونوزون اجدادلار طرفئندن قويولان سرحدئني ديئشدئرمه‌يئن.

15هر هانسي بئر تقصئر و يا گوناه باره‌ده تک بئر شاهئدئن شهادتي کئفايت ديئل؛ هر ائدّئعا ائکي و يا اوچ شاهئدئن سؤزو ائله تصدئق ادئلسئن.

16اگر بئر يالانچي شاهئد پئس مقصدله بئرئني تقصئرلَندئرسه،

17آرالاريندا موناقئشه اولان ائکي آدام ربّئن حوضوروندا، او دؤورده خئدمت ادن کاهئنلرئن و قاضي‌لارين قاباغيندا دايانسينلار.

18حاکئملر داعواني ياخشي آراشديرسينلار. اگر شاهئد يالانچي‌دير و هموطنئنه يالاندان ائتّئهام ووروب،

19اوندا هموطنئنه اتمک ائسته‌دئيئني، اونون اؤز باشينا گتئرئن. بلجه آرانيزدان بو پئسلئيي سئلرسئنئز.

20قالانلاري دا بونو اشئدئب قورخاجاقلار و بئر داها سئزئن آرانيزدا بو جور پئسلئک اتميه‌جکلر.

21بله آداما رحم اتمه‌يئن: جان عوضئنه جان، گؤز عوضئنه گؤز، دئش عوضئنه دئش، اَل عوضئنه اَل، آياق عوضئنه آياق.

← Chapter 18 Chapter 20 →