Deuteronomy 18

Azerbajani Bible (South) Used in Both Iran and Azerbaijan 2008

1لاوئلي کاهئنلرئن، بوتون لاوي قبئله‌سئنئن او بئري ائسرايئللی‌لرله بئرلئکده پايي و ائرثي اولماياجاق. اونلار ربّه اودلا تقدئم ادئلَنلرله و ربّئن پايي ائله دوياجاقلار.

2لاوئلی‌لرئن هموطنلري آراسيندا ائرثي تورپاقلاري اولماياجاق؛ اونلارين ائرثي رب اؤزودور، نجه کي، سؤز ورئب.

3خالق آراسيندا اؤکوز و يا قويون قورباني تقدئم ادنلرئن کاهئنلره وره‌جيي پاي بو اولاجاق: قول، چَنه و ائچ‌آلات.

4تاخيلينيزين، تزه شرابينيزين، زيتون ياغينيزين نوباريني و قويونلارينيزدان قيرخديغينيز ائلک يونو کاهئنلره ورئن.

5چونکي تارينيز رب اونلاري و اؤولادلاريني بوتون قبئله‌لرئنئز آراسيندان سچئب کي، دائم ربّئن آدينا خئدمتده دايانسينلار.

6اگر بئر لاوئلي ياشاديغي ائسرايئل شهرلرئنئن بئرئندن اؤز گؤيلو ائله ربّئن سچه‌جيی يره گلسه،

7اورادا تاريسي ربّئن حوضوروندا دايانان لاوئلي هموطنلري کئمي، ربّئن آدينا خئدمت اتسئن.

8اونلارين پايي بئر اولاجاق مگر نه کي، آتا مولکونون ساتيشيندان اَله گتئرئر.

9تارينيز ربّئن سئزه وره‌جيي تورپاغا گئردئيئنئز زامان، او مئلّتلرئن ائيرنج رسم-روسوملاريني اؤيره‌نئب تقلئد اتمه‌يئن.

10آرانيزدا اوغول و قيزيني اوددا قوربان ادن، فالچي، گله‌جيي دئيَن، باخيجي، جادوگر،

11اووسونچو، جئنلرله رابئطه ساخلايان، روحلار و يا اؤلولري چاغيران اولماسين.

12بله ائش گؤرَنلر ربّه ائيرنجدئرلر؛ و اله بو ائيرنج ائشلره گؤره تارينيز رب اونلاري سئزئن قاباغينيزدان قوواجاق.

13تارينيز ربّئن گؤزو قاباغيندا کامئل اولون.

14چونکي تورپاقلاريني آلاجاغينيز بو مئلّتلرئن گله‌جيي دئيَنلرئن و فالچيلارين سؤزلرئنه قولاق آسيرلار. آمّا سنه گلئنجه؛ تارينيز رب سئزئن اوچون بونا ائجازه ورمئر.

15تارينيز رب سئزئن اوچون آرانيزدان، اؤز هموطنلرئنئز ائچئندن منئم کئمي بئر پيغمبر يتئره‌جک. اونا قولاق آسين.

16چونکي خورِبده ييغيلديغينيز گون، تارينيز ربدن بونو آرزو اتمئشدئنئز: «قوي بئر ده تاريم ربّئن سَسئني اشئتمه‌يئم و بئر داها بو بؤيوک آلووو گؤرمه‌يئم، يوخسا اؤله‌رَم.»

17او واخت رب منه ددي: «ددئکلري دوغرودور.

18اونلار اوچون هموطنلري آراسيندان سنئن کئمي بئر پيغمبر يتئره‌جيم و سؤزلرئمي اونون آغزينا قوياجاغام. او امر اتدئيئم هر شيي اونلارا دئيه‌جک.

19منئم آديمدا دئيه‌جيي سؤزلره قولاق آسمايان آدامي من اؤزوم جزالانديراجاغام.

20لاکئن هانسي بئر پيغمبر اونا امر اتمه‌دئيئم سؤزو منئم آديمدا دِمَيه جورعت اتسه، و يا آيري آللاهلارين آديندا دانيشسا، او پيغمبر گرک اؤلدورولسون.»

21مومکوندور اوره‌يئنئزده دئيه‌سئنئز: «بو سؤزون رَبدن اولوب-اولماديغيني نجه بئلَک؟»

22اگر بئر پيغمبر ربّئن آديندا دانيشاندا، ددئيي سؤز باش ورمَزسه، و يا دوز چيخمازسا، اونو رب دمه‌مئشدئر. او پيغمبر گوستاخليقلا دانيشيب. اوندان قورخمايين.

← Chapter 17 Chapter 19 →