Deuteronomy 20

Azerbajani Bible (South) Used in Both Iran and Azerbaijan 2008

1دوشمنلرئنئزئن ضئدّئنه دؤيوشه چيخاندا، آتلاري، دؤيوش عارابالاريني و سئزدن بؤيوک بئر قوشونو گؤرنده قورخمايين، چونکي سئزي مئصئر تورپاغيندان چيخاردان تارينيز رب سئزئنله‌دئر.

2کاهئن دؤيوشدن قاباق قوشونون يانينا گلئب خالقلا دانيشسين.

3اونلارا بله دسئن: «ای ائسرايئللی‌لر، قولاق آسين! بو گون دوشمنلرئنئزله دؤيوشه چيخيرسينيز. اوره‌يئنئز اوزولمه‌سئن. اونلاردان قورخوب اورکمه‌يئن، اونلارين قاباغيندا دا اَسمه‌يئن،

4چونکي تارينيز رب سئزئنله گدئر کي، دوشمنلرئنئزله دؤيوشسون و سئزه نئجات ورسئن.»

5افسرلر ده خالقا بله دسئنلر: «کئم وار کي، تزه اِو تئکئب و ائچئنده حله اوتورماييب؟ قوي اِوئنه قاييتسين. اولماسين کي، دؤيوشده اؤلسون و اِوئنده آيري آدام ياشاسين.

6کئم وار کي، اوزوم باغي ساليب، محصولونو حله ييغماييب؟ قوي او دا اِوئنه قاييتسين. اولماسين دؤيوشده اؤلسون و محصولونو آيريسي ييغسين.

7کئم وار کي، بئر قيزا نئشانلي اولوب، آمّا حله اِولَنمه‌يئب؟ او دا دؤنوب اِوئنه قاييتسين. اولماسين کي، دؤيوشده اؤلسون و نئشانليسيني آيري بئري آلسين.»

8افسرلر خالقلا دانيشماغا داوام ورئب بله دسئنلر: «کئم وار کي، قورخوسوندان اوره‌يئني ييئر؟ او آدام دؤنوب اِوئنه قاييتسين اِله کي، هموطنلرئنئن ده اوره‌يئني اؤز اوره‌يي کئمي اوزمه‌سئن.»

9افسرلر قوشونلا دانيشماقلاريني قورتاراندان سونرا خالقا قوشون رهبرلري تعيئن اتسئنلر.

10دؤيوشمَک اوچون هانسي شهرئن ضئدّئنه يوروش اده‌سئنئز، اوّل اونون خالقيني باريشا چاغيرين.

11اگر حاضير اولوب سئزئنله صولح اتسه‌لر و دروازالاريني سئزه آچسالار، او واخت اورانين بوتون اهالئسي سئزه ائجباري چاليشيب خئدمت اتسئنلر.

12يوخ، اگر سئزئن باريش دعوتئنئزي ردّ ادئب، دؤيوشه باشلاسالار، اوندا شهري موحاصئره‌يه آلين.

13تارينيز رب شهري سئزه تسلئم ادنده، اورانين بوتون کئشئلرئني قيلينجدان کچئردئن.

14آروادلاريني، اوشاقلاري، حيوانلاري و شهرده اولان بوتون ماللاري دا تالان ادئن. تارينيز ربّئن سئزه وردئيي دوشمن ماليني اؤزونوزه صرف اده بئلرسئنئز.

15سئزدن اوزاقلاردا يِرلَشَن شهرلرئن هاميسينا دا کي، ياخينينيزدا اولان مئلّتلرئن ديئللر، بله رفتار ادئن!

16آنجاق تارينيز ربّئن ائرث اولاراق سئزه وره‌جيی بو مئلّتلرئن شهرلرئنده نَفَسي اولان هچ بئر جانليني بِله، صاغ بوراخمايين.

17خئتلئلري، اِمورلولاري، کَنَعانليلاري، پِرئزلی‌لري، خئولی‌لري، يِبوسلولاري تارينيز ربّئن سئزه امر اتدئيي کئمي کامئل محو ادئن کي،

18آللاهلارينا اتدئکلري بوتون ائيرنج شيلرئن اتمه‌يئني سئزه اؤيرتمه‌سئنلر و سئز تارينيز ربّئن ضئدّئنه گوناه اتميه‌سئنئز.

19هر هانسي بئر شهرله دؤيوشَنده، اگر اورانين موحاصئره‌‌سي اوزون چکسه، آغاجلاري بالتالاييب محو اتمه‌يئن. بو آغاجلارين محصولوندان يئيه بئلرسئنئز، آمّا اونلاري قيرمايين. مگر چؤلده‌کي آغاجلار ائنساندير کي، اونلاري موحاصئره‌يه آلاسينيز؟

20آنجاق او آغاجلاري کَسئب محو اده‌بئلرسئنئز کي، اونلارين بار ورمه‌مکلرئني بئلئرسئنئز. سئزئنله دؤيوشه چيخان شهري آلاناجاق، موحاصئره عملئيّاتيندا بو آغاجلاردان ائستئفاده اده بئلرسئنئز.

← Chapter 19 Chapter 21 →