Psalms 17

azerbaijan-2013

1منئم حاقلی سؤزومو اشئت، یارب، فریادیما قولاق آس! حئیله‌سئز دوداقلاردان چیخان دوعاما قولاق ور!

2قوی گوناهسیزلیغیم سنئن حوضوروندان اعلان اولسون؛ قوی سنئن گؤزلرئن دوغرو اولانلاری گؤرسون.

3اوره‌یئمی ائمتاحان ادئبسن، گجه منی یوخلاییبسان؛ منی ائمتاحان اتمئش ده اولاسان، هچ بئر شی تاپماییبسان. نئیّت اتدئم کی، آغزیملا هچ گوناه اتمه‌یئم.

4ائنسانلارین ائشلرئنه گلئنجه - سنئن دوداقلارینین کلامی ائله، ظالئم آدامین یوللاریندان اؤزومو ساخلادیم.

5قدملرئم سنئن یوللارینی برک توتوب، آیاقلاریم سوروشمه‌یئب.

6سنی چاغیریرام، ای تاری، چونکی سن منئم سسئمی اشئدرسن؛ منه قولاق ور و سؤزومو اشئت.

7وفالی اولدوغونو عجئب ائشلرئنده گؤرسد؛ سن کی، دوشمنلرئندن سنه پناه گتئرن آداملارا صاغ الئنله نئجات ورئرسن.

8گؤزونون قاراسی کئمی منی حئفظ ات؛ منی قانادلارینین کؤلگه‌سی آلتیندا گئزلَت:

9منه دارلیق ورن پئس آدامدان، اطرافیمی آلان جان دوشمنلرئمدن.

10یاغ باغلامیش اورَکلری مرحمت اوزونه باغلانیب؛ آغیزلاری بؤیوک لافلار وورور.

11هر یاندان ائندی منی دؤوره‌له‌یئرلر، گؤزلرئنی دئکئب منی یره چیرپماق اوچون فورصت آختاریرلار.

12پارچالاماغا حرئص بئر آصلان کئمی‌دئرلر؛ کمئنده اوتورموش جاوان بئر آصلان کئمی.

13قالخ، یارب! اونلارین قاباغیندا سن دور؛ اونلاری یره چیرپ؛ حیاتیمی پئس آدام الئندن قیلینجلا خئلاص ات.

14ائنسانلاردان، یارب، دونیانین آداملاریندان منی الئنله خئلاص ات؛ اونلارین حئصّه‌سی بو حیاتدادیر. قوی قارینلاری آنبار اتدئکلرئنله دولسون، قوی اوشاقلاری دا دویسونلار، قوی اؤولادلارینا دا ثروت بوراخسینلار.

15لاکئن من، صالحلئکده سنئن اوزونو گؤره‌جیم؛ اویانان واخت سنئن صورتئندن دویاجاغام.

← Chapter 16 Chapter 18 →