Psalms 18 — azerbaijan-2013

1سنی سوئرم یارب، ای قووّتئم!

2منئم قایام، منئم قالام، منئم قورتاریجیم ربدئر؛ تاریم و پناه آپاراجاغیم قایادیر، قالخانیم، گوجلو خئلاصکاریم، منئم سیغیناق یرئمدئر.

3حمد اولسون! ربّی چاغیریرام، دوشمنلرئمدن خئلاص اولورام.

4اؤلوم ائپلری اطرافیما دولاشدی، هلاکت سل‌لری منی قورخوتدو.

5اؤلولر دئیارینین ائپلری اطرافیما ساریلدی، اؤلوم تله‌لری قاباغیما چیخدی.

6سیخینتیم ائچئنده ربّی چاغیردیم، کؤمک ائسته‌ین سسئمی تاریما اوجالتدیم. او، معبدئندن سسئمی اشئتدی، منئم کؤمک ائسته‌ین سَسئم اونون قولاقلارینا یتئشدی.

7اونون قضبئندن یر لرزه‌یه دوشدو، تئتره‌دی؛ داغلارین بونؤوره‌لری اسدئلر، لرزه‌یه دوشدولر.

8اونون بورنوندان دومان قالخدی، آغزیندان یاندیریب-یاخان اود چیخدی، کؤز کؤمورلر اوندان توتوشدولار.

9رب، گؤیلری یاریب اندی، قارا بولودلار اونون آیاقلاری آلتیندا ائدئلر.

10رب کرّوبا مئنئب اوچدو، یلئن قانادلاری اوستونده یوکسَلدی.

11قارانلیغی دؤوره‌سئنه اؤرتو اتدی، سو دولو قارا بولودلاری اؤزونه چادیر اتدی.

12اونون پاریلدایان حوضوروندان دولو و شئمشکلر قارا بولودلاری یاریب چیخدیلار.

13رب گؤیدن گورولدادی، اوجالاردا اولانین سسی سسلندی؛ دولو و شئمشکلرله.

14اوخلارینی آتیب اونلاری داغیتدی؛ بؤیوک ائلدیریملارینی سالیب، اونلاری کؤکوندن ووردو.

15سنئن تنبهئندن، یارب، بورنونون نفسئنئن ووروشوندان، دهنزلرئن دئبی گؤروندو، دونیانین بونؤوره‌لری آچیلدی.

16رب اوجالاردان الئنی اوزادیب، منی توتدو؛ منی او درئن سولاردان چیخارتدی.

17قودرتلی دوشمنئمدن منی قورتاردی؛ مندن نئفرت ادنلردن کی، اونلارا گوجوم چاتمیردی.

18بلالی گونومده ضئدّئمه قالخدیلار، لاکئن رب منه دایاق اولدو؛

19منی گنئشلئیه چیخاردیب قورتاردی، چونکی مندن خوشلاندی.

20رب صالحلئیئمه گؤره اجرئمی ورئب، اللرئمئن پاکلیغینین موطابئقئنده منه عوض ورئب.

21چونکی ربّئن یوللارینی توتموشام، و تاریما عوصیان اتمه‌مئشم؛

22اونون هامی حؤکملرئنی قاباغیما قویموشام، اونون امرلرئنئن ائطاعتئندن چیخمامیشام.

23اونون گؤزونون قاباغیندا کاماللا یاشامیشام، اؤزومو گوناهدان ساخلامیشام.

24رب صالحلئیئمه گؤره، گؤزونون قاباغیندا اولان اللرئمئن پاکلیغینین موطابئقئنده منه عوض ورئب.

25سنه وفالی قالانا، اؤزونو وفالی گؤرسدئرسن. کاماللا یاشایان آداما، اؤزونو کامئل گؤرسدئرسن.

26پاک آداما، اؤزونو پاک گؤرسدئرسن؛ لاکئن اَیری آدامین قاباغینی آلیرسان.

27فاغیر آداملارا نئجات ورئرسن، لاکئن تکبّورلو گؤزلری ذلئل ادئرسن.

28چیراغیمی یانار ساخلایان سنسن، یارب! قارانلیغیمی ائشیغا دؤندَرَن تاریمدیر.

29سنئنله بئر قوشونو ازه‌رم، تاریملا دووار اوستوندن اوچارام.

30تارینین یولو کامئلدئر؛ ربّئن سؤزو خالئصدئر، رب اونا پناه گتئرن هرکسه قالخاندیر.

31ربدن ساوایی تاری کئمدئر؟ بئزئم تاریدان ساوایی قایا کئمدئر؟

32منی قووّته سئلاحلاندیران تاری‌دیر، منئم یولومو او کامئل ادئر؛

33آیاقلاریمی مارال آیاقلاری کئمی ادئر، اوجا یرلرده منی برک دوردورور.

34اللرئمه دؤیوشمک اوچون تعلئم ورئر؛ قوللاریم بورونج کامانی دا اَیئر.

35سن منه نئجاتینین قالخانینی ورئبسن، صاغ الئن منی توتوب، عئنایتئن منی بؤیوک ادئب.

36آتدیغیم قدملرئن یرئنی گنئشلتدئن کی، آیاقلاریم سوروشمه‌سئن.

37دوشمنلرئمی قووالادیم، اونلارا یتئشدئم؛ اونلار محو اولوناجاق گری قاییتمادیم.

38اونلاری پایمال اتدئم کی، قالماغا بئر داها قودرتلری اولماسین؛ اونلار آیاقلاریمین آلتینا دوشدولر.

39موحارئبه اوچون منی قووّته سئلاحلاندیران سنسن. ضئدّئمه قالخانلاری، آیاقلاریمین آلتینا سالدین.

40دوشمنلرئمئن آرخاسینی منه دؤندَ‌ردئن، مندن نئفرت ادنلری محو اتدئم.

41کؤمک اوچون باغیردیلار، لاکئن اونلارین دادینا یتئشن هچ کس یوخ ائدی؛ ربّی چاغیردیلار، لاکئن اونلارا جاواب ورمه‌دی.

42اونلاری یل قاباغینداکی توز کئمی داغیتدیم، اونلاری کوچه‌لر پالچیغی کئمی آتدیم.

43خالقین چکئشمه‌سئندن منی قورتاریبسان؛ مئلّتلره منی ریئس ادئبسن، اله کی، تانیمادیغیم خالق دا منه قوللوق ادئر.

44مندن اشئتدئکلری زامان ائطاعت ادئرلر. قرئب آداملار منه بویون اَیئرلر.

45اورَکلری اوزولور، قالالاریندان تئتره‌یه-تئتره‌یه اشئیه چیخیرلار.

46رب دئری‌دئر! منئم قایاما حمد اولسون! قورتاریجیم تاری اوجالسین!

47ائنتئقامیمی آلان تاری‌دیر. خالقلاری منه موطئع ادن اودور.

48او تاری کی، دوشمنلرئمدن منی قورتاردی. ضئدّئمه قالخانلاردان منی چوخ اوجالدیبسان، قدّار آدامدان منی خئلاص ادئبسن،

49اونا گؤره ده، یارب، مئلّتلر آراسیندا سنه شوکور اده‌جیم. سنئن آدینا پرستئش نغمه‌لری اوخویاجاغام.

50رب پادشاهینا بؤیوک ظفرلر ورئر، مسح اتدئیئنه سوگی گؤرسدئر؛ داوودا و اونون نسلئنه، ابده کئمی.