Jeremiah 41

azerbaijan-2013

1یدّئنجی آیدا پادشاه نسلئندن و اعیانلاردان اولان اِلئشاماع اوغلو نِتَنیا اوغلو ائسماعئل اون نفرله بئرلئکده مئصپایا، اَخئقام اوغلو گِدَلیانین یانینا گلدی. اورادا بئرلئکده یمک یئیَرکَن

2نِتَنیا اوغلو ائسماعئل و اونونلا بئرلئکده اولان اون نفر قالخیب شافان اوغلو اَخئقام اوغلو گِدَلیانی کی، بابئل پادشاهی اونو اؤلکه‌یه باشچی قویموشدو، قیلینجلا ووروب اؤلدوردولر.

3ائسماعئل مئصپادا گِدَلیا ائله بئرلئکده اولان بوتون یهودئلری و اوراداکی کَلده عسگرلرئنی ده اؤلدوردو.

4گِدَلیانین اؤلدورولمه‌سئندن بئر گون سونرا، حله هچ کس بوندان خبردار اولمایارکن،

5هشتاد نفر ساقّاللاری قیرخیلمیش، پالتارلاری جیریق، بدنلرئنه یارا وورموش شِکِمدن، شئلودان و سامئره‌دن گلدئلر و ربّئن معبدئنه تاخیل تقدئمی و کوندور گتئردئلر.

6نِتَنیا اوغلو ائسماعئل آغلایا-آغلایا مئصپادان اونلارین پئشوازینا گلدی. اونلارا یِتئشدئکده ددی: «اَخئقام اوغلو گِدَلیانین یانینا گلئن.»

7آداملار شهره گئرنده نِتَنیا اوغلو ائسماعئل و یانیندا اولان آداملار اونلاری اؤلدوروب جسدلرئنی قویویا آتدیلار.

8آمّا اونلارین آراسیندان اون نفر ائسماعئله ددئلر: «بئزی اؤلدورمه، چونکی بئزئم زَمئده گئزله‌دئلمئش بوغدا، آرپا، زیتون یاغی و بالیمیز وار.» ائسماعئل ده فئکرئندن دؤنوب اونلاری یولداشلاری ائله بئرلئکده اؤلدورمه‌دی.

9او قویو کی، ائسماعئل اؤلدوردویو گِدَلیا ائله آداملارینین جسدلرئنی اورایا آتمیشدی، آسا پادشاه ائسرایئل پادشاهی بَعشانین موقابئلئنده مودافئعه تدبئری اولاراق قازمیشدی. نِتَنیا اوغلو ائسماعئل اونو اؤلدورولَنلرله دولدوردو.

10سونرا ائسماعئل مئصپادا قالان بوتون خالقی و پادشاه قیزلارینی اسئر توتدو؛ کشئکچئلر ریئسی نِبوزَره‌دان اونلاری اَخئقام اوغلو گِدَلیانین ائختئیارینا ورمئشدی. نِتَنیا اوغلو ائسماعئل مئصپادا قالان بوتون خالقی اسئر گؤتوروب عَمّونلولارا سیغینماق اوچون یولا دوشدو.

11قارِاَخ اوغلو یوخانان و اونونلا بئرلئکده اولان بوتون قوشون باشچیلاری نِتَنیا اوغلو ائسماعئلئن اتدئیی بوتون پئسلئکلر باره‌ده اشئتدئلر.

12او واخت بوتون آداملارینی گؤتوروب نِتَنیا اوغلو ائسماعئلله ووروشماغا گتدئلر. اونو گئبعونداکی بؤیوک حوووضون یانیندا تاپدیلار.

13ائسماعئلئن یانیندا اولان بوتون خالق قارِاَخ اوغلو یوخانانی و اونونلا اولان بوتون قوشون باشچیلارینی گؤرنده سِوئندئلر.

14ائسماعئلئن مئصپادان اسئر اتدئیی بوتون خالق دؤنوب گری قاییتدیلار و قارِاَخ اوغلو یوخانانین یانینا گتدئلر.

15لاکئن نِتَنیا اوغلو ائسماعئل سکّئز نفرله بئرلئکده یوخاناندان قاچیب قورتولدولار و عَمّونلولارین یانینا گتدئلر.

16قارِاَخ اوغلو یوخانان و یانینداکی بوتون قوشون باشچیلاری صاغ قالانلارین هامیسینی-اَخئقام اوغلو گِدَلیانی اؤلدورن نِتَنیا اوغلو ائسماعئلئن مئصپادان اسئر آپاردیغی دؤیوشچولری، آروادلاری، اوشاقلاری و حرم آغالاری گئبعوندان گؤتوروب گتئردئلر.

17کَلدانئلردن قاچماق اوچون مئصئره طرف یولا دوشدولر و بیت‌لِحِمئن یاخینلیغینداکی گِروت-کئمهامدا قالدیلار.

18اونلار کَلدانئلردن قورخوردولار، چونکی نِتَنیا اوغلو ائسماعئل بابئل پادشاهینین اؤلکه‌یه باشچی قویدوغو اَخئقام اوغلو گِدَلیانی اؤلدورموشدو.

← Chapter 40 Chapter 42 →