Jeremiah 18

azerbaijan-2013

1ربدن اِرِمیایا بو سؤز نازئل اولدو:

2«قالخ، کوزه‌گرئن کارخاناسینا گت، اورادا سؤزلرئمی سنه اعلان اده‌جیم.»

3بله‌جه من کوزه‌گرئن اِوئنه گتدئم. گؤردوم کی، او، چرخ اوستونده ائشله‌یئر.

4پالچیقدان دوزَلتدئیی قاب اَلئنده خاراب اولاندا، کوزه‌گر نجه کی، ائسته‌یئردی، پالچیقدان باشقا بئر قاب دوزَ‌لدئردی.

5او واخت ربّئن سؤزو نازئل اولدو:

6«ای ائسرایئل نسلی، مگر من ده سئزئنله بو کوزه‌گرئن اتدئیی کئمی رفتار اده بئلمه‌رم؟» رب بویورور. «بئلئن کی، پالچیق کوزه‌گرئن اَلئنده نجه‌دئر، سئز ده منئم اَلئمده او جورسونوز، ای ائسرایئل نسلی.

7اگر بئر واخت بئر مئلّتئن و یا اؤلکه‌نئن کؤکوندن داغیداجاغینی، ییخیب محو اده‌جیئنی دِمئش اولسام دا،

8اگر منئم ائخطار وردئیئم بو مئلّت اؤز پئس عملئندن دؤنسه، قاباغیمی آلیب اونا ائسته‌دئیئم بلانی گؤندَ‌رمه‌رم.

9اگر باشقا بئر زامان بئر مئلّتئن و یا دا اؤلکه‌نئن اَکئلئب تئکئله‌جیئنی دِمئش اولسام دا،

10اگر بو مئلّت سؤزومه قولاق آسماییب منئم نظرئمده پئس اولانا عمل اتسه، او واخت قاباغیمی آلمارام و اونا وعده وردئیئم یاخشیلیغی اتمه‌رم.

11ائندی یهودا آداملارینا، اورشلئمده یاشایانلارا دِه کی، رب بله دیئر: ”من سئزه بئر بلا حاضیرلاییرام، سئزه بئر قصد قورورام. ائندی هر بئرئنئز اؤز پئس یولونوزدان دؤنوب یوللارینیزی و عمل‌لرئنئزی ائصلاح ادئن.“

12آمّا اونلار دئیه‌جکلر: ”فایداسیزدیر، بئز اؤز نئیّتلرئمئزئن دالینجا گده‌جیئک، هر بئرئمئز اؤز پئس اوره‌یئمئزئن عئنادینا گؤره رفتار اده‌جیئک.“»

13بونا گؤره رب بله دیئر: «ائندی مئلّتلر آراسیندا سوروشون: کئم بله سؤزلر اشئدئب؟ باکئره قیز ائسرایئل دهشتلی بئر ائش ادئب.

14لوبنانین قاری قایالی داغ یاماجلاریندان مگر هچ اَسکئک اولار؟ اوزاقدان آخان سویوق سولار مگر قورویار؟

15آمّا خالقیم منی یاددان چیخاردیب؛ ساختا آللاهلارا بوخور یاندیریر. بو آللاهلار اونلارین گده‌جیی یوللاردا، قدئم یوللاردا بودره‌مه‌لرئنه سبب اولدو، اونلاری هامار اولمایان دوزَ‌لمه‌مئش یوللاردا گزدئردئلر.

16اؤلکه‌لری وئران ادئله‌جک، ابدی کئنایه هدفئنه چِورئله‌جک. او واخت اورادان کچن هر کس حیرته گلئب باشینی ترپده‌جک.

17اونلاری شرقدن اَسن یِل کئمی، دوشمن قاباغیندا پَرَن-پَرَن سالاجاغام. اونلارین فلاکت گونونده، اونلارا اوزومو یوخ، آرخامی گؤرسده‌جیم.»

18او زامان اونلار ددئلر: «گلئن، اِرِمیایا قصد قوراق. چونکی کاهئن اؤیرده‌جک شرئعت، حکئم آدام وره‌جک نصئحت، پیغمبر گتئره‌جک سؤز هچ واخت اَسکئک اولمایاجاق. گلئن، اونا دئلئمئزله هوجوم اِدَک، سؤزلرئنه قولاق آسمایاق.»

19یارب، منه قولاق آس، منئمله چکئشَنلرئن سؤزونو اشئت.

20یاخشیلیغین عوضئنده پئسلئک مگر ادئلر؟ حال بو کی، اونلار منئم اوچون قویو قازیبلار. یاددان چیخارتما، من قاباغیندا اونا گؤره دایاندیم کی، اونلار اوچون شفاعت ادئم، و سن اونلاردان قضبئنی دؤنده‌ره‌سن.

21بونا گؤره ده اونلارین اؤولادلارینی آجلیغا ور، قیلینج آغزینا تسلئم ات. آروادلاری اوشاقسیز و دول قالسین، اَرلرئنی اؤلوم آپارسین. جاوانلارینی موحارئبه‌ده قیلینج اؤلدورسون.

22سن اونلارین اوستونه قَفلَتَن غارتچئلر گؤندَ‌رنده، قوی اِولرئندن شئون اِشئدئلسئن. چونکی منی توتماق اوچون قویو قازیبلار، آیاغیمین آلتیندا گئزلئنجه تله‌لر قوروبلار.

23آمّا یارب، منی اؤلدورمک اوچون قوردوقلاری بوتون قصدلری سن بئلئرسن. تقصئرلرئنی باغیشلاما، گوناهلارینی قاباغیندان سئلمه. قوی سنئن قاباغیندا ییخیلسینلار، قضبلی ائکن اونلارلا عمل ات.

← Chapter 17 Chapter 19 →