Isaiah 42

azerbaijan-2013

1باخ، منئم ساخلادیغیم، جانیم ائسته‌یَن سِچئلمئش قولوم! من اؤز روحومو اونون اوستونه قویموشام. او، مئلّتلره عدالت گتئره‌جک.

2چیغیرمایاجاق، سَسئنی قالدیرمایاجاق، کوچه‌لرده سَسی اِشئدئلمیه‌جک.

3اَزئلمئش قامیشی قیرمایاجاق، کؤزه‌رن پئلته‌نی سؤندورمیه‌جک. او، عدالتی صداقتله یایاجاق.

4او، یِر اوزونده عدالتی قوراجاق، طاقتدن دوشمه‌یه‌جک، اَزئلمیه‌جک، ساحئل‌نشئن خالقلار اونون قانونونا اومئد باغلایاجاقلار.

5گؤیلری یارادیب اونلاری سَرَن، یری و اونون اوستونده‌کئلری دوزَ‌لدن، دونیاداکی آداملارا نفس ورن، یِر اوزونده گزن ائنسانلارا روح ورن، رب تاری بله دیئر:

6«من رَبّم، من سنی صالحلئیئمده چاغیرمیشام، سنی اَلئندن توتاجاغام، سنی حئفظ اده‌جیم، سنی خالق اوچون بئر عهد اده‌جیم، مئلّتلر اوچون بئر نور اده‌جیم کی،

7کورلارین گؤزلرئنی آچاسان، محبوسلاری زئنداندان، ظولمتده یاشایانلاری حبسخانادان آزاد اده‌سن.

8من رَبّم، آدیم بودور. اؤز شؤوکتئمی هچ کئمه ورمه‌رم، حمدلرئمی اویما بوتلره ورمه‌رم.

9باخ، قاباقکی شیلر حیاتا کچدی، ائندی من تزه شیلری خبر ورئرم، اونلار یِتئشمه‌مئشدن سئزه اعلان ادئرم.»

10ای دهنز سیّاحلاری، دهنزده‌کی بوتون جانلی‌لار، ساحئل‌نشئن خالقلار و اورادا یاشایانلار، ربّه تزه بئر نغمه اوخویون! دونیانین لاپ اوجقار یِرلرئندن اونا حمدلر اوخویون!

11قوی صحرا و اوراداکی شهرلر، قِدار خالقی یاشایان کَندلر سَسلرئنی اوجالتسینلار، قوی سِلَع ساکئنلری اوجادان اوخوسونلار، قوی داغلارین تپه‌سئندن شادلیق هارایی چکسئنلر.

12قوی اونلار ربّه عئزّت ورسئنلر، ساحئل‌لرده اونون حمدئنی اعلان اتسئنلر.

13رب جسور ائگئد کئمی چیخاجاق، جنگاور کئمی قیرته گله‌جک، چیغیریب دؤیوش نعره‌سی چکه‌جک، دوشمنلرئنی مغلوب اده‌جک.

14رب دیئر: «چوخ واختدیر کی، دئنمئرم، ساکئت قالمیشام، قاباغیمی آلمیشام، آمّا ائندی دوغوش آغریسی چکن آرواد کئمی قیشقیراجاغام، تنگنفس اولوب زارییاجاغام.

15داغلاری، تپه‌لری داغیداجاغام، بوتون یاشیل‌لیقلارینی قوروداجاغام، چایلاری ساحئل‌لره چِوئره‌جیم، حوووضلاری قوروداجاغام.

16کورلاری تانیمادیقلاری یوللا آپاراجاغام، اونلارا بئلمه‌دئکلری یوللاردا بَلَد اولاجاغام. قارانلیغی قاباقلاریندا ائشیغا، کَله-کؤتور یوللاری هامارلیغا چِوئره‌جیم. بونلار او شیلردئر کی، اونلار اوچون اده‌جیم، اونلاری ترک اتمیه‌جیم.»

17بوتلره بِل باغلایانلار، تؤکمه بوتلره «سئزسئز آللاهلاریمیز» دئیَنلر، گری قایتاریلیب بؤیوک بئر خجالت آلتیندا قالاجاقلار.

18ای کارلار، اِشئدئن! ای کورلار، باخین، بلکه گؤره‌سئنئز!

19قولومدان باشقا کور اولان مگر وار؟ گؤندَردئیئم قاصئددن باشقا کار اولان مگر وار؟ منئمله باریش ائچئنده اولاندان باشقا، یا دا ربّئن قولوندان باشقا کور اولان مگر وار؟

20سئز چوخ شیلر گؤردونوز، آمّا نظره آلماییبسینیز، قولاقلارینیز آچیقدیر، لاکئن هچ بئری اشئتمئر!

21رب اؤز صالحلئیئنئن خاطئرئنه خوشلادی کی، قانونو بؤیوک و شؤوکتلی اتسئن.

22آمّا بو، قارت اولونموش و سویولموش بئر خالقدیر. هامیسی ماغارالاردا تله‌یه دوشوب، زئندانلاردا گئزله‌دئلئب. اونلار شئکار اولوبلار و قورتارانلاری یوخدور. اونلاری قارت ادئرلر، «گری قایتارین» دئین یوخدور.

23سئزدن کئم بونا قولاق آساجاق، بوندان سونرا کئم قولاق آسیب اِشئده‌جک؟

24یعقوب نسلئنی کئم قارت اولونماغا قویدو؟ ائسرایئلی سویغونچولار اَلئنه کئم وردی؟ مگر رب دیئل کی، اونون ضئدّئنه گوناه اتدئلر، ائستمه‌دئلر کی، اونون یوللاری ائله گتسئنلر، قانونوندان ائطاعت اتمه‌دئلر؟

25بونا گؤره آلوولو قضبئنی، دؤیوشون شئدّتئنی اوستلرئنه یاغدیردی. اود اونلاری دؤوره‌یه آلدی، آمّا اونلار آنلامادیلار، اونلاری یاندیردی، آمّا اونا جئدّی فئکئر ورمه‌دئلر.

← Chapter 41 Chapter 43 →