Ecclesiastes 9

azerbaijan-2013

1بله‌جه بونلارین هامیسینی اوره‌یئمده آراشدیریب بو نتئجه‌یه گلدئم: صالحلر و حئکمتلی‌لر و اونلارین ائشلری تارینین اَلئنده‌دئر. ائستر سِوگی اولسون ائستر نئفرت، ائنسان قاباغینا نه چیخاجاغینی بئلمز.

2چونکی هامینین باشینا گلن احوالات بئردئر؛ صالحلرئن و پئسلرئن، یاخشی‌لارین و یامانلارین، طاهئرلرئن و نجئسلرئن، قوربان تقدئم ادنلرئن و قوربان تقدئم اتمه‌ینلرئن. نجه یاخشی‌لارادیر، اله ده گوناهکارلارادیر؛ آند ائچَنلره ده آند ائچمکدن قورخانلارا کئمی‌دئر.

3گون آلتیندا یرئنه یتئرئلَن بوتون شیلرئن پئسلئیی بوندادیر کی، هامیسینا راست گلن قدر بئردئر. دوغرودان دا کی، ائنسانلارین اوره‌یی پئسلئکله دولودور: نه قدر کی، یاشاییرلار، دَلئلئک اورَکلرئنده وار و اوندان سونرا اؤلولرئن یانینا گدئرلر.

4آمّا دئرئلر جاماعاتینا قوشولانین اومئدی وار، چونکی دئری بئر ائت اؤلو بئر شئردن یاخشی‌دیر.

5چونکی دئرئلر اؤله‌جکلرئنی بئلئرلر، لاکئن اؤلولر بئر شی بئلمئرلر و آرتیق اونلار اوچون اَجر یوخدور، چونکی اونلارین ذئکری ده یادلاردان چیخیب.

6اؤلولرئن سِوگئلری، نئفرتلری، اونلارین پاخیلّیقلاری دا چوخدان محو اولوبدور؛ گون آلتیندا یرئنه یتئرئلَن هچ بئر شیدن آرتیق پایلاری اولمایاجاقدیر.

7گت چؤره‌یئنی شادلیقلا یِه، شرابینی شاد اورَکله ائچ؛ چونکی تاری، اتدئکلرئندن چوخدان راضی‌دیر.

8قوی پالتارین همئشه آغ اولسون، باشیندان یاغ اَسکئک اولماسین.

9باطئل عؤمرونون بوتون گونلرئنده، سِودئیئن آروادلا خوش بئر حیات کچئرت؛ او عؤمرونده، تارینین گون آلتیندا سنه وردئیی بوتون باطئل گونلرئنده. چونکی حیاتینین پایی، گون آلتیندا چکدئیئن زحمتئن پایی اودور.

10اَللرئنئن اتمیه تاپدیغی هر شیی بوتون قووّتئنله ات؛ چونکی گده‌جیئن قبئرده نه ائش وار، نه دوشونجه، نه معرئفت وار نه ده حئکمت.

11گئنه باخدیم و گون آلتیندا گؤردوم کی، میدان بَرک قاچانلارینکی دیئل، موحارئبه ده پهلوانلارینکی. چؤرک حئکمتلی‌لرئنکی دیئل، ثروت ده آنلاقلی اولانلارینکی. ائلطئفات عالئملرئنکی دیئل، چونکی واخت و بخت اونلارین هامیسینین قاباغینا چیخیر.

12بوندان علاوه، ائنسان اؤز واختینی بئلمئر؛ بالیقلارین یامان بئر تورا دوشدویو کئمی، قوشلارین تله‌یه ائلئشدئیی کئمی، ائنسانلار دا پئس بئر زامانا دوشَرلر، او زامان کی، قَفئلدن اونلارین اوستونه گلر.

13گون آلتیندا بله بئر حئکمت ده گؤردوم و منه چوخ تأثئر اتدی:

14کئچئک بئر شهر وار ائدی، ائچئنده آز آدام. بؤیوک بئر پادشاه اونون ضئدّئنه قالخیب اونو آرایا سالدی و اونون اطرافینا بؤیوک تله‌لر تئکدی.

15اورادا فاغیر آمّا حئکمتلی بئر آدام یاشاییردی و او، حئکمتی ائله شهری خئلاص اتدی. لاکئن هچ کس بو فاغیر آدامی خاطیرلامادی.

16او زامان ددئم: حئکمت قودرتدن یاخشی‌دیر، لاکئن فاغیر آدامین حئکمتی تحقئر اولونور، و سؤزلری اِشئدئلمئر.

17حئکمتلی آداملارین سَس‌سئزلئکده ددئیی سؤزلر، سَفِهلرئن آراسیندا حاکئم اولانین قیشقیرتیسیندان داها یاخشی‌دیر.

18حئکمت موحارئبه سئلاحلاریندان یاخشی‌دیر؛ لاکئن بئر گوناهکار چوخ یاخشیلیغی آرادان آپارار.

← Chapter 8 Chapter 10 →