Ecclesiastes 5

azerbaijan-2013

1تارینین اِوئنه گتدئیئن زامان، آیاغینا موواظئب اول. قولاق آسماق اوچون یاخینلاشماق، سَفِه‌لرئن قوربانینی تقدئم اتمکدن داها یاخشی‌دیر، چونکی اونلار نه پئس ائش اتدئکلرئنی بئلمئرلر.

2آغزین تَلَسمه‌سئن، اوره‌یئن بئر مطلبی تارینین حوضورونا گتئرمکده عجله اتمه‌سئن. چونکی او گؤیلرده‌دئر و سن یر اوزونده‌سن. بونون اوچون سؤزلرئن آز اولسون.

3نجه ائشئن چوخلوغو ائله رؤیالار گلر، سؤزون چوخلوغو ائله ده سَفِهئن سَسی گلر.

4تارییا نذر اتدئیئن زامان، اونو یرئنه یتئرمکده یوبانما، چونکی او، سَفِه‌لردن خوشلانماز. نذر اتدئیئنی یرئنه یتئر.

5نذر اتمه‌مه‌یئن، نذر ادئب اونو یرئنه یتئرمه‌مه‌یئندن داها یاخشی‌دیر.

6قویما سؤزلرئن سنی گوناها باتیرسین. سؤز گتئر‌نه ده دمه کی، «اتدئیئم نذر سهو ائدی.» نه اوچون تاری سنئن سؤزونله قضبلنسئن و سنئن اَللرئنئن ائشئنی محو اتسئن؟

7چونکی رؤیالارین چوخلوغوندا و سؤزلرئن چوخلوغوندا باطئل شیلر چوخ اولار. سن آنجاق تاریدان قورخ.

8اگر گؤرورسن کی، بئر وئلایتده فاغیرلارا ظولم ادئلئر، عدالت و صالحلئک آیاق آلتیندا تاپدالانیر، گؤردویونه تعجّوب اتمه. چونکی هر منصب صاحئبئنه اؤزوندن اوستون بئر نظارتچی قویولوب و اونلارین باشیندا دا اؤزلرئندن اوستون اولانلار وار.

9زَمئنئن سورولمه‌سئنی ائسته‌یَن بئر پادشاه، اؤلکه اوچون هر باخیمدان فایدالی‌دیر.

10پولو سِوَن پولدان دویماز، مال-دؤولتی سِوَن ده قازانجدان. بو دا باطئلدئر.

11مال چوخالینجا، اونو یئینلر ده چوخالار. گؤزلری ائله اونو گؤرمکدن ساوایی صاحئبئنه نه فایداسی وار؟

12فحله‌نئن یوخوسو شئرئندئر، فرق اتمز آز یسئن یا چوخ. آمّا وارلی آدامین توخلوغو قویماز کی، او یاتسین.

13گون آلتیندا گوردویوم بؤیوک بئر پئسلئک ده وار: ساخلانمیش ثروت، صاحئبئنئن جانینا بلا اولور.

14همئن ثروت پئس ائشله آرادان گدئر، صاحئبئنه اوغول دوغولاندا، اونا بوراخماغا آرتیق اَلئنده هچ بئر شیی یوخدور.

15آناسینین قارنیندان نجه لوت دوغولوب، لوت ده قاییداجاق؛ گلدئیی کئمی گده‌جک. اؤز زحمتئندن اَلئنده گؤتورمک اوچون هچ بئر شی آپارمایاجاق.

16بو دا بؤیوک بئر پئسلئکدئر: ائنسان نجه گلئر، تامامن اله ده گدئر و یل اوچون زحمت چکمه‌سئندن اونا نه قالیر؟

17عؤمور بویو قارانلیقدا یِیئر، بؤیوک سیخینتی، ناخوشلوق و قضب ائچئنده.

18باخ، ائنسان اوچون منئم گؤردویوم یاخشی و گؤزل شی بودور کی، یِسئن، ائچسئن، و تارینین اونا وردئیی نچه گون عؤمرونده، گون آلتیندا چکدئیی بوتون زحمتلرئندن کف اتسئن؛ چونکی اونون پایی بودور.

19هم ده، تاری هر کسه ثروت و دؤولت ورئب، اونا بو قودرتی ده ورئب کی، اونلاردان یِسئن، پایینی آلسین و زحمتئندن کف اتسئن؛ بو تارینین هدئیّه‌سی‌دئر.

20اونا گؤره ده بله ائنسان عؤمرونون گونلرئنی چوخ یادا سالماز. چونکی تاری، اونو اوره‌یئنئن سوئنجی ائله مشغول ساخلاییر.

← Chapter 4 Chapter 6 →