Psalms 42

aymara-1997

1Diosaxay, kunjämatix tarujax umat pharjatax jalkir uma thaqkixa, ukhamaw nayax jumar thaqsma.

2Nayax jakkir Diosat pharjatätwa: ¿Kunapacharak Diosan nayraqatapar uñstir sarästi?

3Urus arumas jachaxakiw manq'añaxaxa, ukchañkamasti uñisirinakaxax wal jiskhipxitu: “¿Kawkinkarak Diosamasti?” sasa.

4Ukanakxat amthapisisasti, jan chuymachkayaw jachta. Diosan utapar jaqinakar irpataxat amtasta, q'uchunakampi, yuspagarañanakampi. ¡Khä urunakax kusiskañ urunakänwa!

5¿Kunatarak chuym mayjt'ayasïsti? ¿Kunatarak llakthaptästi? Diosarukiw nayax suyt'ä, juparukiw yupaycharakï. ¡Jupaw Qhispiyirixaxa, Diosaxasa!

6Wali mayjt'atapuniw jikxatasta. Ukat jumat walpun lup'ta, Jordán jawiratpacha, Hermón, Mizar qullunakatpacha.

7Uka manqhanakatpach ist'asi, uma waraqtaman qhuthutinakapaxa; juman apayanit lluxlla uma waraqtanakax, naya patanjam llumikipi.

8Uru tuqirux Tatituw khuyapayasitu, arum tuqirusti janiw q'uchuñ qarjaskti, janirakiw jakayir Diosaxat mayisiñsa armaskti.

9Arxatir Diosaxarux sistwa: “¿Kunatarak armasistasti? ¿Kunatarak llakit sarnaqañaxasti wakisi, uñisirixansa t'aqhisiyat kunasti?” sasa.

10Timanakaxan sawkasitanakapatxa, ch'akhanakaxamppachaw usutu, sapa kutiw jiskhipxitu: “¿Kawkinkarak Diosamasti?” sasa.

11¿Kunatarak chuym mayjt'ayasïsti? ¿Kunatarak llakthaptästi? Diosarukiw nayax suyt'ä, juparukiw yupaycharakï. ¡Jupaw Qhispiyirixaxa, Diosaxasa!

← Chapter 41 Chapter 43 →