Psalms 26

aymara-1997

1Tatay, chiqaparuy uñjita, jakañaxax jan kamskayawa. Tatay, jumaruw taqpach katuyassma;

2chuymax uñantita, ¡yant'arakita!, ¡taqi amuyunakax yant'ita, chuymax manqhan amtatanaksa yant'arakita!

3Munasiñamat amtasipuntwa, jumarusti chiqpach chuymaxampiw arksma;

4janiw k'ari jaqinakampix qunt'askti, janirakiw ch'uxña chuyman jaqinakampis chikachaskti.

5Ñanqha lurir jaqinakan tantachasïwinakaparux uñistwa; ¡janipuniw ñanqha luririnakampix utjaskti!

6Tatay, amparanakaxas q'umachataw makhatansma, juchaxatsa pampachataw altaramar jak'achasinsma,

7jach'añchañ q'uchunak q'ucht'asisa, muspharkañ luräwinakam yatiyasa.

8Tatay, qullan utamarux munastwa, qhapaq kankañamax ukankiwa.

9Janikiy jucharar jaqinakampi chikax jakañax apaqistati; janikiy jaqi jiwayirinakarjamas puriyistati,

10uka jaqinakan amparanakapax ñanqha lurañanakampi, qullqi chilltayasiñanakampi phuqt'atawa.

11Sarnaqäwixasti jan kun kamskayawa; ¡nayar qhispiyasita, nayat khuyapt'ayasita!

12Kayuxax ch'ullqhi uraqxar suma takt'atawa; ¡Tatiturux qullan markap taypin jach'añchä!

← Chapter 25 Chapter 27 →