Psalms 27

aymara-1997

1Tatituw qhanaxasa, qhispiyasiñaxasa, ¿khitirurak axsarästi? Tatituw jakañaxar arxati, ¿khitirurak axsarästi?

2Ñanqha lurir jaqinakasa, uñisirinakaxasa, nayar chhukxatasin jiwayañatakiw mayacht'asipxi; ukampis jupanakakiw lanqtasxapxi, tinkxapxaraki.

3Nuwasir tamas nayatak tantachasiskpan, chuymaxax janiw khathatkaniti; nayar jalxatañatakis wakichasisipkpan, janiw nayax llakiskäti.

4Tatitur mä mayisiñaxakiw utji, ukakirak munta: jakañaxkam utapan utjasiña, utapan jupar yupaychañataki, qhapaq kankañap uñjasin kusisiñataki.

5Jan walt'añ urunak purinkan ukapachaxa, Tatituw utapan imantitani; ch'iwipampiw imxäsitani. ¡Mä qarqa patxarjamaw sayt'ayitani!

6Ukapachaw p'iqix waytä, uñisirinakaxar aynacht'ayasa; ukapachaw utapan wilañchanak churä, kusisiñat arnaqasï, Tatituruw kusisiñat q'uchurakï.

7Tatay, jumaruw arnaqasinsma, ist'akitaya. Nayat khuyapt'ayasita, ¡jaysakitaya!

8Chuymaxax situwa: “Tatitur thaqtam.” Nayasti, Tatay, jumaruw thaqtsma.

9¡Janikiy nayatak imantasimti! ¡Janikiy q'apisiñampi jaqunukustati! ¡Jumakiw nayan arxatirixätaxa! Janikiy jan arxatirin sapak jaytanukustati, jumätaw Diosaxaxa, qhispiyirixasa.

10Awkixas, taykaxas apanukchitani, juma, Tatituw nayar uywasiskitäta.

11Tatay, thakhim uñacht'ayita; chiqa thakhiman irpita, uñisirinakaxan utjatap layku;

12janikiy uñisirixan amparapar katuyistati, k'ari irkatirinakaw nayatak sarti, qhuru jaqinakaw sartaraki.

13Nayasti aka jakañ uraqinxa, Tatitun munasiñap uñjapunïwa.

14¡Tatitur taqpach chuymamp iyawsam! ¡Ch'amañchasim, jan axsaramti! ¡Tatitur taqpach chuymamp iyawsam!

← Chapter 26 Chapter 28 →