Psalms 148

aymara-1997

1¡Tatitur yupaychapxañäni! ¡Tatiturux alaxpachatpach jach'añchapxpan! ¡Tatiturux alaxatpach yupaychapxpan!

2¡Tatitun angelanakapa, jupar jach'añchapxam! ¡Taqpach tamanakapa, Tatitur yupaychapxam!

3¡Inti, phaxsi, k'ajkir warawaranaka, Tatitur yupaychapxam!

4¡Alaxpacha, Tatitur jach'añcham, alaxpachankir umanaka, Tatitur yupaychapxam!

5Tatitun sutip jach'ar aptapxam, arupampi arsusakiw taqi kun utjayäna;

6jupaw wiñayatak taqi kun utt'ayäna, jan tukuskir kamachi aru ucharakïna.

7¡Tatiturux uraqitpach yupaychapxam, lamar quta, axsarkañ animalanaka!

8¡Tatitur jach'añchapxam, q'ixu q'ixu, chhijchhi, khunu, urpu! ¡Arunakap jaysir jach'a thaya!

9¡Yupaychapxam, jach'a qullunaka, jisk'a qullunaka! ¡Achu churir quqanaka, cedro quqanaka!

10¡Animalanaka, uta uywanaka! ¡Uraqinjam qatatnaqtir animalanaka, thuqnaqir jamach'inaka!

11¡Tatitur jach'añchapxam, akapachankir reyinaka! ¡Taqpach jilïrinaka, akapach apnaqirinaka!

12¡Chachanaka, warminaka, waynanaka, ch'ama qaritanaka! ¡Tatitur yupaychapxam!

13¡Tatitun sutip jach'ar aptapxam, sutipakiw muspharkañaxa! ¡Jach'a kankañapax alaxpachatsa, uraqitsa jilankiwa!

14¡Jupaw markaparux ch'amañchi! ¡Jupar iyawsirinakapax yupaychañäni, jupan ajllit Israel markapätanwa! ¡Tatitur yupaychapxañäni!

← Chapter 147 Chapter 149 →