Psalms 147

aymara-1997

1¡Tatitur yupaychapxañäni! ¡Diosasar q'uchuñax kusiskañawa! ¡Jupar suma q'uchunakampi yupaychañaw wakisi!

2Tatituw Jerusalenarux wasitat sayt'ayi, Israel markat ananukutanakarusti tantachthapiraki.

3Jupaw chuyma usuchjatanakarux waliptayi, chhuxrinakapsa k'umaracharaki.

4Jupaw warawaranak jakht'i, sapa mayarusti suti ucharaki.

5Diosasax jach'a ch'amanipuniwa, yatiñ kankañapax jan tukuskiriwa.

6Tatituw llamp'u chuymaninakarux jach'ar apti, ñanqha luririnakarusti, q'al aynacht'ayi.

7Yuspagarañamp Tatitur q'uchupxam; Diosasatakix arpampi chik q'uchupxam.

8Jupaw alaxpacharux qinayanakamp phuqhanti, uraqitak jallu wakichi, ch'umi manqhanakan quranak ch'uxñaptayi,

9jupaw uywanakarux manq'añ churi, juparakiw allqamarin chhiwlinakaparux wararipki ukapachax manq'añ churi.

10Janiw caballonakan ch'amapax Tatitur kusisiykiti, janirakiw jaqin ch'amapas kusisiykiti;

11jupar iyawsirinakaw kusisiyi, munasiñapar iyawsirinakaw kusisiyi.

12Jerusalén marka, Tatitur yupaycham; Sión marka, Diosamar jach'añcham.

13Jupaw punkunakaman jist'añanakap thuruñchi, wawanakamarusti marka taypin jach'añchi.

14Tatituw uraqimarux sumankañ uchi, jilarkir suma trigompiw sist'aytam.

15Jupaw arunakap uraqir apayani, arunakapasti jank'akiw yatiyasi.

16Jupaw khunurux t'awrar uñtat apayani, arum sullanakarusti laq'ar uñtat willtaraki.

17Jupaw chhullunkhayarux chhijchhir uñtat apayani; umasti thayampiw chhullunkhayar tuku.

18Jupax mä aruk arsu, ukampikiw chullurayi; thayampiw phust'ayi, ukat umax jaltaraki.

19Tatituw Jacoburux arunakap yatiyi, Israel markarusti kamachinakap churaraki.

20Janiw kawkïr markampis ukham lurkänti, uka markanakax janipuniw arsutanakap uñt'apkänti. ¡Tatitur yupaychapxañäni!

← Chapter 146 Chapter 148 →