Psalms 149

aymara-1997

1¡Tatitux jach'ar aptatäpan! Tatiturux machaq q'uchu q'uchupxam; iyawsirinakap taypin yupaychapxam.

2Israel markax utjayiripat kusispan, Sión markan wawanakapax Reyipat kusisipxpan.

3Thuqhuñanakampi sutiparux jach'añchapxam, arpanakampi, chhullu chhullunakampi q'uchupxam.

4Tatitux markapampix kusisiwa; llamp'u chuyman jaqinakarux atipt'ayiwa.

5Aski jaqinakax atipt'atapat kusisipxpan, ikkasas kusisiñat q'uchupxpan.

6Lakanakapan Diosar yupaychañax utjpan, amparanakapansti purapar arin espada ayt'atäpxpan;

7Diosar jan uñt'irinakar ukhamat ukham apsusiñataki, jach'a markanakar mutuyañataki,

8reyinakar ñach'antañataki, munañaninakarus cadenanakamp ñach'antañataki,

9Tatitun arsutapax jupanakamp phuqhasiñapataki. ¡Ukax taqpach iyawsirinakapar jach'ar aptirïniwa! ¡Tatitux jach'añchatäpan!

← Chapter 148 Chapter 150 →