Leviticus 8

aymara-1997

1Tatitux Moisesaruw parläna, akham sasa:

2“Jichhax Aaronampiru, wawanakapampir irpxarum, ukatsti sacerdotenakan isinakapa, luqtañatakïki uka aceite, kuna urqu vacatix jucha luratata Tatitur luqtaski uka, paypach urqu ovejanaka, uka kipkarak kawkïri walayatix jan levaduran t'ant'anaka churañatak uskutäki taqi ukanak apxarum,

3ukatsti taqi israelita jaqinakarux Tatitump Jikisiñ Carpar mantañäkis uka chiqar tantacht'arakim” sasa.

4Moisesasti, kunjämtix Tatitux siskatayna ukhamarjamaw phuqhäna, taqi jaqinakasti Tatitump Jikisiñ Carpar mantañäkis uka chiqaruw tantacht'asipxäna.

5Ukat jaqinakarux sarakïna: “Tatitux ukham lurañas mayistu” sasa.

6Ukat Aaronampiru, yuqanakapampiruw jak'achasinipxañapatak mayïna, ukatsti umampiw jariqarakïna.

7Ukatsti Aaronarux sacerdote isimpiw isintayäna, mä wak'ampiw wak't'ayarakïna. Ukxarusti túnica sat isimpiw uskuntäna, uka patxarux pectoral sat isimpiw isintayäna, pachpa pectoralan chint'añapampiw uka túnica chint'arakïna.

8Ukxarusti pectoralampiw uskuraki, uka patxarusti Urim, Tumim uka qalanak ucharaki, uka jisk'a qalanakax Tatitun munañap yatiñatakïnwa.

9Ukatsti mä ch'uqañampiw p'iqit ch'uqanti, paraparusti, qurit lurata mä placa ucharakïna, uka placaw sacerdoter tukuyxäna, kunjämtix Tatitux Moisesar siskatayna ukhamarjama.

10Ukxarusti Moisesax luqtañ aceite aptäna, ukatsti kawkhatix qullanäki uka patxaruw warxatäna, kunanakatix uka manqhan utjkän ukanakarusa, ukhamat taqi ukanakax Tatitur luqtatäxarakïna.

11Uka pachpa aceitempirakiw altarxa paqallqu kuti ch'allt'äna, kunanakatix altaran utjkän ukanakxaru, ampar jarisiñ llatakxaru, qunt'añapxaru, ukhamat taqi ukanakan Tatitur luqtatäñapataki.

12Ukxarusti Moisesax Aaronan p'iqipxaruw uka aceitempix warxatäna, ukhamat sacerdotet Tatitur luqtxañataki.

13Ukhamarakiw Aaronan wawanakaparus jak'achasinipxañapatak mayïna, ukatsti sacerdote isimpiw taqpachanir isintayäna, wak'anakampi wak't'ayasa, ch'uqasiñanakampi p'iqinakapar ch'uqt'asa, kunjämtix Tatitux Moisesar siskatayna ukhamarjama.

14Ukxarusti Moisesax kuna urqu vacatix jucha luratat luqtatäkani uk irptayanïna, ukatsti Aaronampi, yuqanakapampix uka urqu vacan p'iqipxaruw amparanakap luqxatapxäna.

15Ukatsti Moisesax uka urqu vaca kharinukxäna, luk'anap uka wilar juricht'asaw altaran utjkän uka waxranakar jawirt'äna, ukhamat q'umachañataki, ukat jilt'ir wilsti altar kayuruw warnuqxarakïna, ukhamat uka altarax q'umachata, ukhamarak Tatitur luqtatäxäna ukawjan juchanakat pampachatäñ jikxatañataki.

16Ukxarusti Moisesax jiphillanakan taqi lik'inakap katüna, k'iwchxan utjkis uka lik'inaka, paypach maymurxankkis uka lik'inaka, ukatsti taqi uka lik'inak altarxaruw nakt'ayxäna;

17Ukampis lip'ichipa, aychapa, phusnunakapsa, campamentot anqäxan ninampiw nakhantayxäna, kunjämtix Tatitux Moisesar siskatayna ukhamarjama.

18Ukatsti Moisesax kuna urqu ovejatix nakhantayasin luqtatäkani uk irptayanïna, ukatsti Aaronampi, yuqanakapampiw uka urqu ovejan p'iqipxar amparanakap luqxatapxäna.

19Ukat Moisesax uka oveja kharinukxäna, uka ovejan wilapsti altar muytaruw waratatxäna,

20uka ovejan aychapsti jisk'a jisk'a kharinuqäna, ukatsti p'iqimpi, lik'imppach nakhantayxarakïna;

21ukatsti uka ovejan jiphillanakapa, chhuchhullinakap jariqxarakïna, taqi ukanaksti, Tatitutakix mä suma waxt'äkaspas ukham altarxarux nakt'ayxäna, kunjämtix Tatitux Moisesar siskatayna ukhamarjama.

22Ukatsti Moisesax jank'akiw yaqha urqu oveja irptayaniraki, kawkïritix Tatitur luqtasiñatak uskutäki uka, Aaronampi, yuqanakapampisti uka ovejan p'iqipxaruw amparanakap luqxatapxäna.

23Ukat Moisesax kharinukxäna, mä juk'a wila aptasasti, Aaronan kupi jinchuparu, kupi amparapan tayka luk'anaparu, kupi kayupan tayka luk'anaparuw jawintäna.

24Ukatsti Aaronan yuqanakaparuw jupar jak'achasinipxañapatak mayïna, uka kipkarakiw jupanakarux kupi jinchuparu, kupi amparan tayka luk'anaparu, kupi kayun tayka luk'anapar jawirt'äna; ukat wila jilt'irïki uksti, uka altar muytaruw waratatxarakïna.

25Moisesasti uka urqu ovejan wich'inkhapa, kuna lik'inakatix jiphillanakana, k'iwchana, paypach maymurun utjkäna, kupi charampi, taqi ukanak aptäna.

26Jan levaduran t'ant'a uchañ walayatxa, kawkïritix Tatitun nayraqatapar uchatäki ukatxa, Moisesax jan levaduran mä t'ant'a aptäna, aceitempi chapt'ata mä t'ant'a, mä sillp'a t'ant'amp kuna, taqi ukanaksti lik'inakampi, uka kupi charampi chik apnuqarakïna;

27ukatsti taqi ukanak Aaronan amparapxaru, yuqanakapan amparanakapxaruw katuyxaraki, ukhamat Tatitun nayraqatapar kunjämatix luqtañax wakiski ukhamarjam lurapxañapataki.

28Uka luqtäwi tukuyatatsti, Moisesax taqi ukanakxa jupanakan amparanakapat apaqxarakïna, ukatsti altarxaruw kawkïr uywatix luqtañatak churatäkän uka uywampi chika nakt'ayxarakïna, ukasti Tatitutakix mä suma q'apkir waxt'äwïnwa.

29Ukxarusti Moisesax uka uywan jaraphi aychap katusaw Tatitun nayraqatapar uñstäna kunjämarutix wakiski ukhamarjama. Kuna urqu ovejatix Tatitur luqtañatak wilañchat churatäkän ukatxa, uka jaraphiw Moisesarux wakt'äna, kunjämtix Tatitux siskatayna ukhamarjama.

30Ukatsti Moisesax jank'akiw kuna aceitetix Tatitur luqtasiñatak uskutäkän uk aptäna, kuna wilatix altar patxankkäna ukampi, ukatsti ukanakampiw Aaronaru, ukhamarak yuqanakaparux ch'allt'äna, uka kipkaraki jupanakan sacerdote isinakapxarusa. Aaronaru, wawanakaparu, uka kipkarak sacerdote isinakaparus ukham Tatitur luqtxäna.

31Ukatsti Moisesax Aaronampiru, yuqanakapampirux sarakïnwa: “Uka aychxa Tatitump Jikisiñ Carpar mantañäkis uka chiqan qhathiyapxam, ukatsti uka pachpan Tatitur luqtañ walayan utjki uka t'ant'amp manq'apxam, kunjämtix Tatitux ‘Aaronampi, yuqanakapampiw aka t'ant'xa manq'apxani’ siskitu ukhamarjama.

32Ukatsti jilt'kani uka aychsa, t'ant'sa q'al nakhantayapxam,

33ukhamarus Tatitump Jikisiñ Carpat janipuniw sarapxätati paqallqu uru phuqhasiñapkama, uka paqallqu urun jumanakan Tatitur luqtasipxatamax phuqhasirakini.

34Tatitusti siwa, jucha luratanakamat pampachäwi jikxatañatakisti, kunjämtix jichhax lurapkta uka kipkarak lurapxäta.

35Ukhamasti, jumanakax paqallqu uruw Tatitump Jikisiñ Carpar mantañäkis uka chiqan qhiparapxäta, uruy arumaw paqallqu uru phuqhasiñkam ukankapxäta. Tatitun arunakaparusti ist'apxapunim, ukatsti janiw jiwapkätati, uka arunak nayax Tatitut katuqta” sasa.

36Aaronampi, yuqanakapampisti, kuntix Tatitux Moisesar siskatayna ukhamarjamaw phuqhapxäna.

← Chapter 7 Chapter 9 →