Leviticus 7

aymara-1997

1“Jucha luräwinakat wilañcha luqtäwix aski qullanawa. Uka tuqinakat yatichäwinakasti akanakawa:

2Yatkasin pantjasïwi jucha luratanakat luqtat uywax, kawkhantix nakt'ayañatak luqtat uywanakax kharinukuski uka chiqan kharinukusini, wilapampisti uka altaran thiyapar taqi tuqit ch'allsutäñapawa.

3Uka uywan taqi lik'inakapasti: kuna lik'itix wich'inkhan utjki, jiphillanakana,

4paypach maymurun lik'inakapa, jikhaninkki uka lik'inaka, k'iwchxankki uka lik'imppacha, ukanakax maymurunakamp chika apaqatäñapawa.

5Ukatsti sacerdotex taqi ukanak altarxaruw nakhantayxani, Tatitutak mä suma q'apkir waxt'a luqtatätap layku. Ukasti yatkasin pantjasïwi jucha luratanakat wilañcha luqtatawa,

6uka wilañcha luqtäwitsti taqi sacerdotenakaw manq'apxani, uka wilañchan qullanätapatxa, kawkhatix qullana chiqäki ukkhan manq'apxani.

7“Yatkasin pantjasïwi juch luratat wilañcha luqtäwisti, jucha luratat kunjämatix wilañchax luqtaski uka kipkarakiw luqtasiñapa, yatichäwinakasti paypachatakix uka pachparakiwa. Uka luqtatasti, kawkïr sacerdotetix jucha luratat pampachañatak luqtki ukatakïniwa.

8Uka kipkaraki, maynitix altarxan mä uywa nakt'ayañatak churani, uka uywan lip'ichipax wilañcha luqtir sacerdotetakïniwa.

9Granonak luqtäwinakatsti, kawkïrinakatix hornon qhathiyatäki, phukhuna, jan ukax sartenan qhathiyatäki ukanakax, uka waxt'a luqtir sacerdotetakïniwa.

10Uka kipkaraki taqi granonakata luqtatanaka, aceitemp chaputanaka, waña juyranaka, taqpachax Aaronan sacerdote yuqanakapatakïniwa, taqinirus ukkha pura churatarakïniwa.

11“Sumankthapiñatak wilañchanak churaña tuqitxa, kunatix Tatituru churaskani ukanakatxa, aka yatichäwinakaw utjaraki:

12Uka wilañchäwitix yuspagarañatakïchinixa, aceitempi chapt'ata jan levaduran t'ant'anaka, aceitempi warakipt'ata sillp'a t'ant'anaka, wali suma jak'uta aceitempi chapt'at t'ant'anak churapxäta,

13uka yuspagaräwita, ukhamarak sumankthapiñatak wilañchampi chiksti, levaduran t'ant'anak luqtapxarakïta.

14Taqi uka luqtäwinakatsti mä qawqha apaqt'apxäta, ukat Tatituruw mä luqtäwïkaspas ukham uñstayapxarakïta, ukasti sumankthapiñatak wilañchan wilap ch'allir sacerdotetakïniwa.

15“Kawkïri uywatix yuspagarañataki, ukhamarak sumankthapiñataki luqtaski ukan aychapax uka urpacha pachpan manq'antatäñapawa, janiw mä jisk'a aychas qhipürutakix jilt'ayatäñapäkiti.

16Mä uywatix mä arsüwi phuqhañataki, jan ukax chuymasatjama mä waxt'äwïni ukapachasti, ukan aychapax ukürpach manq'antatäxañapawa, ukat jilt'iristi qhipürus manq'atäskarakispawa;

17ukampis uka uywan aychapatix kimsürunsa utjaskakinixa, ukax taqpach nakhantayatäxañapawa.

18Ukampisa maynitix uka sumankthapiñataki wilañcha luqtatäki uka uywan aychap kimsïr urunsa manq'askakinixa, uka wilañchax janiw katuqatäkxaniti, janirakiw uka luqtatax kunatakis askïkxaniti; uka aychasti jan kunatak aski uñjatarakïniwa. Khititix uka aycha manq'kani ukasti juchanit uñt'atäxaniwa.

19“Kawkïr aychatix mä kuna q'añumpi jak'achasiyatänixa, uka aychax janiw manq'atäñapäkiti, jan ukasti ninar nakhantayatäñapawa. “Taqi khitinakatix q'umachatäki ukanakaw aychxa manq'apxarakini.

20“Kawkïri jaqitix jan q'umachatäkasin uka sumankthapiñatak Tatitur luqtata aycha manq'kani ukasti, markap taypit apanukutäxañapawa.

21“Kawkïri jaqitix mä kuna q'añunaksa llamkt'ani, mä jaqin q'añupäpasa, mä uywan q'añupäpasa, jan ukax kawkïr axtaskay yänakäpasa, ukat Tatitunkki uka sumankthapiñatak wilañcha luqtat aycha manq'kani ukasti, markap taypit apanukutäxaniwa.”

22Tatitusti Moisesarux saskakïnwa:

23“Israelitanakarusti akham sarakim: Urqu vacana, ovejana, cabran lik'inakapsa janipuniw manq'apxañapäkiti.

24Jiwata uywanakan lik'ipampi, ch'uminkir animalanakan jiwayat uywan lik'ipampis kunsa lurasipkaspawa, ukampisa janipuniw manq'apxañapäkiti.

25“Nakt'at waxt'äwi Tatitur luqtatäki uka uywanakan lik'ip manq'ir jaqisti, markap taypit apanukutäniwa.

26“Kawkhantix jumanakax jakapkäta, uka chiqanakan janipuniw jamach'inaka, jan ukax uywanakan wilapsa manq'apxätati.

27Khititix uka uywanakan wilap manq'kani ukasti, markap taypit apanukutäniwa.”

28Tatitusti Moisesaruw parläna, akham sasa:

29“Israelitanakarusti akham sarakim: Maynitix sumankthapiña wilañcha Tatitur luqtañatak mä uywa apani ukaxa, Tatitun nayraqataparuw apañapa.

30Jupa pachparakiw amparapampi nakhantayañat waxt'a Tatitun nayraqatapar apañapa, jaraphi aychampi, ukan utjkis uka lik'ipamppach Tatitun nayraqatapan mä uñstäwita luqtañataki.

31Uka lik'sti sacerdotew altarxar nakt'ayxani, ukampisa jaraphi aychax Aaronampitaki, yuqanakapampitakïniwa.

32Uka uywanakan kupi charapasti, kawkïritix sumankthapiñatak luqtatäki ukax, luqtäwi luratapat sacerdoter churatäxaniwa.

33Uka kupi charasti kawkïri sacerdotetix lik'sa, wilsa sumankthapiñatak wilañchanak luqtki ukatakïxaniwa,

34kuna wilañchanaktix israelitanakax sumankthapiñatak nayar luqtapkitu uka jaraphi aychanakxa, mä suma luqtäwïkaspas ukham katuqta, lankhu charsti, mä churäwïkaspas ukhamaraki, uka waxt'anaksti Aaronampiru, sacerdote yuqanakapampiruw churxta, jupanakarupun wakt'atap layku.”

35Kuna waxt'anakatix Tatitutaki nakt'ayatäki ukanakax Aaronampiru wawanakapampiruw wakt'i, kunürutix Tatitux jupanakar sacerdotëpxañapatak utt'ayaski uka uruta.

36Tatitusti israelita jaqinakaruw ukham churapxañapatak mayïna, wiñayatak mä luräwïkaspas ukhama, awkinakat qalltasina wawanakapan wawanakapkama.

37Nakhantayañatak luqtäwi tuqita, granonakat luqtäwi tuqita, jucha luratata, yatkasina jucha luratanakata, Tatitur katuyasiñ waxt'a tuqita, sumankthapiñatak waxt'a luqtañ tuqitsa taqi ukanakaw yatichäwinakaxa.

38Tatituw uka kamachinak Sinaí qullu patan Moisesar churäna, kunapachatix uka Sinaí wasaran israelitanakarux waxt'anak churapxañapatak siskäna uka uru.

← Chapter 6 Chapter 8 →