Job 41

aymara-1997

1¿Cocodrilo sata animalarusti anzuelompi katjasmati? ¿Laxrapsa mä ñach'añampi ñach'antasmati?

2¿Nasapat mä wiskampi chinuntasmati, jan ukax, laka änkhapsa p'iyjasmacha?

3¿Uka animalax jumar achikt'asir jutaspati, jan ukax, axsarañampicha parliristamxa?

4¿Jumasti ukarux juman uywatamäñapatakit arsuyarakisma?

5¿Mä jisk'a jamach'impjamat jupamp anatasmasti? ¿Imill wawanakaman anatasiñapatakit chinkatarakismasti?

6¿Alakipa jaqinakax jisk'a jisk'a ukar jalanuqasax aljapxaspati?

7¿Mich'inakampit lip'ichip chhuqsusmasti, jan ukax, maxañanakampich p'iqipat jununtasmaxa?

8Jumatix jupar luqxatasmaxa, jan mayampis armaskañamatakiw nuwjiristamxa, ukatsti janiw mayampsa jumax uk lurkxasmati.

9Cocodrilo animalar uñjasakiw, khitis axsarañat jiwt'añ munaspa.

10Maynin turiyataxa, jupax luqhiptiwa; janiw khitis jupampi nuwasiñ munkaspati.

11¿Jupampi nuwasiñ munirix, jan kuna kamacht'atakit uñjasispasti? ¡Janiw maynis aka uraqin jupampi nuwasirix utjkiti!

12Kayunakapat parlañsa, jach'a ch'amapat parlañsa janiw amukt'käti.

13¿Khitirak janchip imt'iri lip'ichip iqaraspasti, jan ukax khitich imxatir lankhu janchipsa maysat maysar junsuspasti?

14¿Khitis lakap ansatatayaspa, ari laka ch'akhanakap uñjañatakisti?

15Jikhanipax jach'a ch'akhanakan siqintatawa, qalar uñtat ch'ullqhirakiwa.

16Sinti jak'apurar ñiqintatawa, janiw samanas uka chiq mantkaspati.

17Wali jak'ar k'anantatawa, janiw khitis jaljtaykarakispati.

18Ujurt'asitapas lliju llijur uñtatawa; nayranakapasti willjta intir uñtataw k'aji.

19Nina lawranakaw nasa p'iyanakapat mistsuni nina sank'anakaw willisiniraki.

20Nasapat jiwq'iw mistuni, wallaqir phukhut jiwq'ix mistki ukar uñtata.

21Samanapax sank'anak aqtayi, nasa p'iyapatsti ninaw mistuniraki.

22Ch'amapax kunkapankiwa, jupa nayraqatan taqiniw axsarayasipxi.

23Janchipasa wali qhuluwa, jan jununtkayawa, hierror uñtat ch'ullqhirakiwa.

24Chuymapasti qarqar uñtat ch'ullqhiwa, k'iyañ qalar uñtat ch'ullqhirakiwa.

25Jupax thalaraski ukapachasti, juk'amp ch'amaninakas axsarañat chhuktawayxapxi.

26Janiw espadasa, lanzasa, mich'inakas jupar katuntañatakix kunatakïkisa.

27Jupatakix hierrosa mä ch'illiwäkaspasa ukhamakiwa, bronces ñusantat lawäkaspas ukhamakiwa.

28Antutt'at mich'inakax janiw juparux jaltaykiti, qalampi jaqt'añasti, jichhumpis jaqt'atäkasp ukhamakiwa.

29Hierro k'uphañampi jupar k'uphantañasa, mä suqusampi jawq'antatäkaspa ukhamakiwa, mich'inakan khuyusis saratap ist'asas larusiwa.

30Ñiq'in qatatnaqtki ukapachasti, qhulliñampjamaw sukanak sukachsu.

31Jach'a quta manqhir jalantki ukapachasti, umax wallaqir phukhur uñtatawa.

32Umsti janq'uk jupuqtäwayi, k'ajkir qaqa ñik'utanakjama.

33Janiw aka uraqin jupjamax utjkiti; jan kuns axsarañatak irnuqataw jupaxa.

34Jupat juk'ampi ch'amaninakarus saykataskakiwa, taqi jach'a axsarkañ animalanakan jilïripawa.

← Chapter 40 Chapter 42 →