Job 40

aymara-1997

1Jumax nayar taripäwi qalltañ munäyätaxa, naya, taqi ch'aman Diosar juchañchaña, ¿jichhax arsusiñ munaskaktati?

3¿Kunarak naya jan kunatak aski jaqisti arsusiriststi? Nayax amukt'xakïwa.

5Mayampi, mayamp nayax arsusxta, janiw kuna arsusiñaxas utjkxituti.

6Tatitux jach'a thaya taypitpach Job chachar wasitat parlxayani:

7Jichhax jan axsarirïtam uñacht'ayita, ukatsti jiskt'käma ukanakar arusxatanim.

8¿Jumax nayar jan chiqapätaxatti juchañchañ munista, ukhamat jumax jan juchani mistuñamatakixa?

9¿Jumax nayjam ch'amanïtati? ¿Jach'at arsutamas nayan arsutaxjamati?

10Ukhamächi ukasti, jach'a kankañam uñacht'ayam, ¡ch'aman kankañam uñacht'ayarakim.

11Taqi jach'a jach'a tukur jaqinakar uñtam: jupanakar jisk'achjam, q'apisiñaman samarasim.

12May uñtasak ukanakarux jaqurpayam, ñanqha lurir jaqinakarux kawkhan jikxatasas takxatam.

13Uraqirkam taqpachanir imantam, jiwatanakan utjäwipar jist'antarakim.

14Ukapachasti naya kipkaw yatirakï ch'amamamp juman atipjaskatama.

15Behemot sata jach'a axsarkañ animalar uñtam, ukax nayan irnuqatawa, kamisatix jumar irnuqksma ukhama: urqu vacanakjam quranakarak manq'i;

16uñtam kunja ch'amanis kallachipaxa, janchinakapax kunja ch'amanirakisa.

17Wich'inkhapax cedro quqar uñtata ch'ullqhiwa, kayu ankunakapas taqi tuqir k'anantatawa.

18Ch'akhanakapax broncet luratjamawa, charanakapas hierrot luratjamarakiwa.

19Ukax nayan wali suma lurataxawa; naya sapa, jupar irnuqirikiwa, juparux t'unjiristxa.

20Kawkhantix pampa animalanakax anatasipxi; uka ch'uminakat quranak manq'añapatak apanirapipxi.

21Alinak k'uchuruw jipt'asi, juqhun utjir suqusanak taypiruw imantasiraki.

22Quqanakaw ch'iwicht'ayi, jawir thiyankir saucenakaw muyuntaraki.

23Jawir uman jilxattanitapatsa janiw mulljaskiti; umax nasakamas makhataskpa, janiw axsarkiti.

24¿Khitirak ch'amanïspa katuntasin nayrap k'ilsuñataki, jan ukasti, nasapatsa wiskampi chinuntañatakisa?

← Chapter 39 Chapter 41 →