Job 42

aymara-1997

1Nayax yattwa, jumax taqi kunatakis ch'amanïtawa, janiw jumatakix kunas jan lurkayäkiti.

3¿Khitïtsa nayaxa, juman jach'a kankañamat pächasiñatakixa, ukhamat pisi amuyt'an jaqïtax uñacht'ayañatakixa? Nayax jan amuyt'käyät ukanakat parlaskäyäta, muspharkañ yänakata, nayatak jan amuyt'añjamäk taqi ukanakat parlaskäyäta.

4Jumax sarakistawa: “Ist'ita, nayax parlañ munsma; aka jiskt'anakar arusxatanim” sasa.

5Jichhakamasti, nayax mayninakan parlatap tuqik jumarux uñt'ayäsmaxa, ukampis jichhax pachpa nayraxampiw uñkatsma.

6Ukatpï jichhax laq'a taypina, qhilla taypin qunt'ata taqi arsutanakaxat chuym liq'istxa.

7Tatitusti Job chachampi parlasin, Elifaz chacharuw parlarakïna, akham sasa: “Jumatakix wali q'apisitätwa, ukhamaraki uka pani masimatakisa; jumanakax janiw nayxatxa kunatix chiqapäki uk parlapktati; kunjämtix Job luqtirixax parlki ukhama.

8Jichhasti paqallqu urqu vacampi, paqallqu urqu ovejampi katupxam, ukatsti Job luqtirixan ukaru sarapxam, ukatsti nakt'ata wilañcha jumanakataki luqtapxarakim. Job luqtirixaw jumanakatak mayini, nayasti jupan mayitapxa ist'arakïwa, janiw kuna ñanqhsa jumanakarux lurapkämati, jumanakar mutuyañas wakiskchi ukasa, nayxat jan chiqapar qhanañchapxatam layku, kunjämtix Job luqtirixax qhanañchki ukhama” sasa.

9Ukatsti Elifazampi, Bildadampi, Zofar chachampix, kunjämarutix Tatitux siskatayna ukhamarjamaw phuqhapxäna, Tatitusti Job chachan mayisitapar ist'arakïnwa.

10Job chachan, jilat masinakapataki mayirapkän uka qhipatsti, Diosax Job chacharux nayra qamir kankañap kuttayxänwa, qawqha yänakapatix nayrax utjkän ukat sipan pä ukkhampi churxäna.

11Ukatsti taqi jilanakapa, kullakanakapaw jupar tumpt'ir sarapxäna, ukhamaraki nayra pacha uñt'at jaqinakasa; ukatsti utapan mä jach'a manq'äwi lurapxarakïna. Taqi jan walt'añanakapat Job chachar chuymachapxäna, kuna t'aqhisiñanaktix Tatitux jupxar apayankatayna taqi ukanakata; jupanakat sapa maynirakiw mä qawqha qullqimpi, mä quri anillompi jupar churapxäna.

12Diosasti Job chacharux nayra maranakat sipan aski waxt'äwinak juk'amp churxarakïna. Ovejapas tunka pusini waranqäxänwa, camellonakapasti suxta waranqa, urqu vacanakapas pä waranqa, qachu asnonakapasti waranqarakïxänwa.

13Ukxarusti tunka pusin yuqall wawani, kimsa imill wawanïxarakïnwa.

14Jilïr phuchhaparux Paloma sutimpiw sutichäna, ukxarüki uka phuchhaparusti Jazmín sutimpi, sullkïr phuchhaparux Azucena sasaw suticharakïna.

15Job chachan phuchhanakapjama wali suma uñnaqt'ani warminakax janipuniw aka uraqpachan utjkänti. Awkipasti jupanakampiru, jilanakapampirux yänakap churxäna.

16Uka qhipatsti Job chachax patak pusi tunkan marampiw jakaskäna, wawanakaparus uñjasiwaykänwa, allchhinakan allchhinakapkama. Ukatsti Job chachax wali chuymankam jakasaw jiwxäna.