Job 39

aymara-1997

1¿Kunapachas ch'uminkir cabritonakax qalluchapki uk yattati? ¿Qachu tarujanakan wawachasitap uñjaraktacha?

2¿Qawqha phaxsitsa wawachasipki uk yattati?

3Wawachasiñatakix k'umthapipxiwa, ukat qallunakapax yuripxi.

4Uka qallunakasti wali ch'amaniw jilarapxi, pampan jach'aptapxi, ukatsti jan mayamp kuttaniñatakiw sarxapxi.

5¿Khitirak ch'uminkir asnor antutnukusti? ¿Khitirak ukham antutnukut sarnaqayisti?

6Nayaw ukarux kawkhantix jakañapäki uk uñacht'ayta, wasarampi, qullpa pampanakamp uñacht'ayta.

7Janiw ukanakax markan uxutanakaparux yäqkiti, janirakiw uywa anakirinakan jariyataparus ist'kiti.

8Qullu patanakan quranak thaqhasaw sarnaqi, ch'uxña alinak jikxatañkama.

9¿Amuyatamat ch'uminkir urqu vacax jumar luqtiristamti, juman uywa uyuman mä arum ikt'añ munarakispati?

10¿Jumasti uka urqu vacar yapt'asina qhulliyasmati, jan ukax, juman qhipäxam jutasincha uraqi unxtayaspaxa?

11¿Jumasti uka urqu vacan ch'amanïtap layku alkatasismati, juman lurañanakam jupar lurayarakismati?

12¿Amuyatamat yapum apthapiñatak walikïspati, pirwamarkam granonak apthapiñapatakis walikïspati?

13Uñtam, suri jach'a jamach'iru, chhiqhanakap kusisitaw jawq'asi, cigüeña jamach'in chhiqhapat chhiqhanïkaspa ukhama,

14k'awnanakapsa ch'alla patarukiw apanukuwayi, lupin junt'upampi chhiwchhi qallunakap ansuñapataki.

15Jupax janiw amuykiti mä khitinsa ukanakar takxatañapxa, pampankir kuna animalan takxatat uñjasiñapsa.

16Chhiwchhinakapatakix wali qhuruw tuku, janis chhiwchhinakapäkasp ukham uñji, janiw jupatakix inamaya ch'ama tukutapax kunäkisa.

17Nayaw juparux amuyt'a jan churkti; suma amuyt'asiñsa jan churkaraktti.

18Ukampis chhiqhanakap janatataski ukkhasti, caballonakat sipan juk'amp jaltañ yati.

19¿Jumat caballor ch'am churtasti, jumati kunkapar suma t'asampi k'achacht'araktasti?

20¿Jumat caballor t'iju t'ijunakar uñtat thuqnaqaytasti, axsarkaña jixisiñapatakisti?

21Wali jach'a tukuñampiw uraqin thawirasi, nuwasïwirusti jan axsarasaw jalawayi.

22Janiw kunarus axsarkiti, janiw mulljaskarakisa, janiw espadataki qhipar kuttawaykiti.

23Jupa patan anttut'añ mich'inakax suxuqiski, lanzanakampi, jabalinanakampis paqaskaraki.

24Janis kunäkasp ukhamak wali jaya thakhinak jalawayi; trompeta phust'asipansti janiw inakt'irjamäkiti.

25Trompetan phust'atap ist'asasti qanchisiwa, jayatpach nuwasïwirux mukt'i, jilïrinakan jach'a arunakap ist'i, arnaqasitanak ist'araki.

26¿Jumasti wali yatiñanipunïtati pakalirus jalnaqañ yatichañataki, aynach tuqir tuytawayañapatakisti?

27¿Jumati pakali jach'a jamach'iru, qullu patanakar tapachasiyaraktasti?

28Pakalix uruy arumaw jach'a qarqa patanakan jaki, qarqanakan ch'utupan utjäwip utt'ayasi.

29Uka patatpach uñch'ukisini katuntkani ukar qhamisiyaraki.

30Pakali qallunakapax wila juchhapxi, kawkhantix jiwatanakax utjki ukawjan tantachasipxi.

← Chapter 38 Chapter 40 →