Job 27

aymara-1997

1¡Diosax chuyma ust'ayitu, janiw chiqapar uñjañ munkituti, ukampis sutipxaruw arsta,

3jupan nayar jakañ churañapkamasti,

4janipuniw k'ari arunak siskäti, janirakiw jan chiqap arunak arskäti!

5Jakañaxkamax, jan juchanïtaxat arsusiskakipunïwa; ¡janiw jumanakan juchañchatanakamarux jayskäti!

6Aski kankañanïtaxat arsusiskakipunïwa, janiw kunat p'inqasiñaxas utjkituti.

7¡Nayar uñisirinakasti, ñanqha lurir jaqinakan puriñapar purpan!

8¿Kuna suyt'äwirak juchan jaqitakisti utjaspa, Diosax jakañap apaqxani ukapachasti?

9Jupax jan walt'añanakan jikxataskani ukapachax, Diosax janiw achikt'asitanakap ist'kaniti.

10Ñanqha lurir jaqix janiw Diosar munaskiti, janiw kunapachas jupar art'askarakiti.

11Nayax Diosan jach'a ch'amap uñacht'ayapxäma, Taqi ch'aman Diosan amtatanakap yatiyapxäma.

12Jumanakatix ukanak yatxapxsta ukasti, ¿kunatarak ukataq luqhi arunak parlapxtasti?

13Diosax suyt'askiwa ñanqha jaqinakar mutuykani ukapacha; mutuyäwipax akäniwa:

14wawanakapas waljanïskpan, nuwasïwin jiwarxapxani jan ukax, manq'atjam jiwarxapxarakini.

15Jiwañat qhispirinakarusti usunakaw jiwarayani, ijma warminakapasti janiw jupanakat jachapkaniti.

16Ñanqha lurir jaqix laq'ar uñtatsa qullqip qutuchaskpan, isipas walja q'ipinaka utjaskpan;

17uka isinaksti aski jaqiw isisxani, uka qullqsa aski jaqiw katusxarakini.

18Ñanqha lurir jaqin utapax, jamach'i tapar uñtata t'unjtirikiwa, yapunak uñjirin chhujllapar uñtatakiwa.

19Jupax qamiriw ikintaskani; qhipür willjtasti, jan kunaniw sartxani.

20Axsarañax uru qhanan jupatak purinini, arum ch'amakan jach'a thayax apasxarakini.

21Inti jalsu ch'aman thayaw utapat jaqunukuni;

22jaltañ munaskani ukasa, jan khuyapt'ayasisaw jupatak thayt'anini.

23Ukhamaw ñanqha lurir jaqinax tukusipxani, khuych'ukita, p'inqachjata.

← Chapter 26 Chapter 28 →