Job 28

aymara-1997

1Qullqimpi, qurimpix qhuyanakat apsutawa, ukanakasti ninampi q'umachatarakiwa.

2Hierrox uraqit apsutawa; cobresti qalanak umatatayasin apsutarakiwa.

3Jaqix ch'amakanak tukusiyi: uraqi manqhanakaruw manti; uka ch'amak manqhin suma qalanak thaqharaki.

4Mä wiskat warkuqtasin uraq manqhanakaruw mantapxi; qarqanak p'iyantapxi, kawki chiqantix jaqis jan sarnaqki uka chiqana, markanakat jayana.

5Uraqix, patxan trigo achuyaski, manqhatsti ninampjam muyuntatawa.

6Ukan zafiro sat suma qalanakax utji, quris laq'ampi kittatarakiwa.

7Janipuniw pakalinakasa, aycha manq'an jamach'inakas uka chiqanak uñjapkiti.

8Jaqi manq'an animalanakas janipuniw uka chiqar takt'apkiti; janirakiw leonanakas uka chiqan aywinaqapkiti.

9Jaqix ch'ullqhi uraqi amparapamp katji, qullunakan saphip tinkuyi.

10Qarqanakansti p'iyanak jist'ji, ukansti wali suma imatanak jikxati.

11Kawkittix jawiranakax sartanki ukakamaw puri, imantat yänaksti qhanaruw apsuraki.

12Ukampisa, ¿kawkitarak yatiñ kankañast jutisti? ¿Kawkhanarak ch'ikhi kankañast utjasisti?

13Jaqix janiw yatkiti ukanakan wali jila alanïtapxa, janirakiw akapachansa ukanak jikxatkiti.

14Jach'a lamar qutax siwa: “Janiw akankkiti” sasa. Jisk'a qutasti sarakiwa: “Janiw amparaxankkiti” sasa.

15Janiw qurimpi jikxatatäkaspati, janirakiw qullqimpis alatäkaspati.

16Janiw wali suma qurimpis alatäkaspati, janirakiw cornalina, zafiro suma qalanakampis alatäkaspati.

17Cristalat sipana, qurit sipan juk'ampi jila alaniwa; janiw suma quri yänakampis lantitäkaspati.

18Yatiñ kankañax coral suma qalat sipan juk'amp sumawa, perlanakat sipan juk'ampi jila alanirakiwa.

19Etiopiankir crisólito suma qalasa janiw yatiñ kankañampix kikipaskaspati, janirakiw suma q'uma qurimpis alatäkaspati.

20¿Kawkitarak yatiñ kankañasti jutisti? ¿Kawkinkarak ch'ikhi kankañasti?

21Taqpach jakirinakan uñjatäñat imantasi, alaxpach jamach'inakan uñjatäñat imantasiraki.

22Manqhapachampi, jiwampix sapxiwa: “Nanakax jupat parlirik ist'apxta” sasa.

23Ukampis Diosax yatiñ kankañan thakhip uñjiwa; jupa sapakiw yati kawkhan jikxatañsa.

24Diosax akapach mä thiyat mä thiykam uñji, alaxpachat aynachan utjki taqi ukanaksa uñjarakiwa.

25Kunapachatix Diosax thayar ch'amapa churkäna, umanakan qurpapsa uskkarakïna,

26jalluna puriñapatakis pachanak utt'aykäna, jach'a thayarus thakhipa uñacht'aykarakïn ukapachaxa;

27yatiñ kankañarux uñjarakïnwa, askïtap yatïna, sum uñakipäna, ukatsti walikiw sarakïnwa.

28Jaqinakarusti Diosax sänwa: “Yatiñ kankañax: Tatitur taqi chuyma jaysañawa; ch'ikhi kankañax: ñanqhat jithiqtañawa” sasa.

← Chapter 27 Chapter 29 →