Job 26

aymara-1997

1¡Jumax wali sumsa jan ch'amanirux yanapt'irïtätaxä, wali sumsa ch'amap pist'ayasirirus qhispiyirïtätaxä!

3¡Wali sumsa iwxanaksa churirïtätaxä, pisi amuyunirusa amuyt'ayirïtätasä!

4¿Khitirak uka arunak arsuñatak yanaptamsti? ¿Khitirak ukham parlañatak amuyt'aytamsti?

5Jach'a quta manqhan utjir jiwatanakax, uka jach'a quta manqhan axsarañat khathatipxi.

6Janiw khitis Diosat imantaskaspati, janirakiw t'unjir jiwas imantaskaspati.

7Diosax alaxpach jan kunxarukiw janatatäna, akapachsa jan kunxarukiw warkt'arakïna.

8Jupaw umanak qinayar apxäsiraki, qinayanakas janiw uka jathi umampix phallkiti;

9mä qinayampi imantasaw phaxsina ajanupsa ch'amakt'ayi.

10Qhanampina, ch'amakampin qurpapsti jach'a quta tukuyaruw uskuraki.

11Axsarkañ arunak Diosax arsuni ukapachasti, alaxpach apxäsir qullunakas axsarañat khathatipxi.

12Ch'amapampiw jach'a quta apnaqi; ch'ikhi kankañapampiw Rahab axsarkañ animalarus atipji.

13Samanapampi phust'asakiw alaxpach qinayanaksa chhaqtayi; amparapampiw qatatnaqtir katarirus jiwayaraki.

14Taqi ukanakasti, luräwinakapat mä uñacht'äwikiwa, ist'ktan ukasti, k'achat arxayat arsutakiwa. ¿Khitirak jach'a ch'amampi arsutap amuyt'aspasti?

← Chapter 25 Chapter 27 →