Job 18

aymara-1997

1¿Kunapachkamarak ukataqi parlaskakïtasti? Nayraqat sum amuyt'asim, ukat parlasiñäni.

3¿Kunatarak nanakar animalanakarjam uñjapxistasti? ¿Kunatarak pisi chuyma jaqinakarjam uñjapxistasti?

4¿Jumasti amuytati, janchim ukham jurqhinuqasis aka uraqin ch'usa wasarar tukuñapa, jan ukax, qarqanakan yaqha chiqar sartañapsa?

5Ñanqha lurir jaqinakan jakañapax micha qhanar uñtataw jiwt'awayxi;

6uta qhanar uñtatawa, akatjamat jiwt'awayxi.

7Kayunakapas khathatxakiniwa, pachpa sipitaparuw jalt'arakini.

8Sartataparusti mä qäna uskusini, uka qänamp katuntataw uñjasirakini.

9Kayunakaparusti mä wiskampiw chint'asini, kayu muqunakapasti ñach'antatarakïniwa.

10Sipitasti thakhin imantatäskaniwa, saraskani ukapach jupar katjañataki.

11Taqi tuqit axsarayataw uñjasi; sapa sartäwipan arknaqat amuyasi.

12Ch'amanakapax manq'atjam tukusiwayxi, aynacht'añasti jupxar puriñatakix jank'akiwa.

13Usux janchip juk'at juk'at manq'anti; jiwañasti amparanakampi, kayunakamp manq'suskaraki.

14Samarat jakasiñ utapat waysutaw uñjasi, axsarayir reyin nayraqatapar qatatitaw uñjasi.

15Utaparusti ninampiw wiyantasi; yänakapasti azufrempi ch'axchsutawa.

16Ñanqha lurir jaqinakax waña saphini, suwarat layminakani quqamp sasiwa.

17Jan mayampi amtaskañatakiw aka uraqit chhaqtxani, sutipasti janirakiw mayampis aytaskxaniti.

18Qhanat ch'amakar jaqunukutaw uñjasini; akapachat apanukutaw uñjasirakini.

19Markap taypinsti janiw wawanakapax utjkxaniti; utapankirinakas taqiniw jiwarat uñjasipxani.

20Ukham tukusiñap yatipxani ukapachasti, inti jalsu tuqinsa, inti jalanta tuqinsa, axsarañat khathatkiriw uñjasipxani.

21Ñanqha jaqin jakañapax ukhamaw tukusi, Diosar jisk'achir jaqin jakañapas tukusiraki.

← Chapter 17 Chapter 19 →