Job 17

aymara-1997

1Jan ch'amaniw uñjasxta, jakañaxax tukusiñampïxiwa, jiwañakiw nayar suyt'askitu.

2Naya jak'ansti, jan walt'ayir jaqinakakiw utjaski, jupanakax jan khuyapt'ayasisaw t'aqhisiyapxitu.

3Ukampis jumax, Tatay, nayat arxatasitasmawa, jan jumäkät ukasti, ¿khitirak nayar arxatitaspasti?

4Jumax jupanakan lup'ïwinakap mayjt'aytawa, janiy jichhax jupanakan nayar atipjañap munamti.

5Khitinakatix kunsa katuqt'asiñ laykuki, jilat masipatak sayt'apki ukanakan wawanakapax manq'at t'aqhisipxani.

6Jumaw taqinirus nayataki jan wali parlaytaxa, ajanutsa thuskatayarakistaxa.

7Nayranakaxas t'aqhiskäwix chhurkt'xituwa; janchixas juk'atakikïxarakiwa.

8Ukanak uñjasinsti, aski jaqinakax muspharataw uñjasipxi; ñanqha lurir jaqinakatakiw q'apisipxaraki.

9Jupanak pachpaw askit uñt'asipxi, jan kuna juch luririw tukupxaraki.

10Jumanaka, taqpachan aksar jutapxam, janiw jumanak taypin mayni yatiñan jaqsa jikxatkäti.

11Jakañ urunakaxax saraki sarawayxi, amtatanakaxasa ina ch'usaruw tukusiwayxaraki.

12Ukampis jumanakax arumarux ururuw tukuyapxtaxa; ¡ch'amakansa: “Qhanäxiwa” sasipkaktawa!

13Jichhasti jiwañak suyxirista, ch'amakanakan liwitattasin ikt'awayxañ suyxarakirista.

14¡Awkixasa, taykaxasa, jilanakaxasa laq'unakampi sepulturampikïxiwa!

15¿Kawkinkarak suyt'añaxasti? ¿Kawkinkarak nayatak suma jakañasti?

16¿Nayampi chikati ukanakasti jiwañar saraqani, ukhamat mayaki laq'an samarapxañaxataki?

← Chapter 16 Chapter 18 →